Jürgen Klopp
 Klopp in 2019 | |||
| Persoonlike inligting | |||
|---|---|---|---|
| Geboortedatum | 16 Junie 1967 | ||
| Geboorteplek | Stuttgart, Wes-Duitsland | ||
| Lengte | 1,91 m[1] | ||
| Speelposisie | Aanvaller, verdediger | ||
| Jeugloopbaan | |||
| 1972–1983 | SV Glatten | ||
| 1983–1987 | TuS Ergenzingen | ||
| Seniorloopbaan* | |||
| Jare | Span | Kere† | (Doele)† |
| 1987 | 1. FC Pforzheim | ||
| 1987–1988 | Eintracht Frankfurt II | ||
| 1988–1989 | Viktoria Sindlingen | ||
| 1989–1990 | Rot-Weiss Frankfurt | 0 | (0) |
| 1990–2001 | Mainz 05 | 325 | (52) |
| Spanne bestuur | |||
| 2001–2008 | Mainz 05 | ||
| 2008–2015 | Borussia Dortmund | ||
| 2015–2024 | Liverpool | ||
| * Kere vir seniorklub uitgedraf en doele is net vir die plaaslike liga.. † Kere uitgedraf (Doele). | |||
Jürgen Norbert Klopp (gebore 16 Junie 1967) is ’n Duitse sokkerbestuurder en voormalige afrigter en speler. Hy word wyd beskou as een van die grootste afrigters van alle tye. Sedert Januarie 2025 is hy Hoof van Globale Sokker by Red Bull GmbH.[2][3][4][5][6]
Klopp het die grootste deel van sy spelersloopbaan by Mainz 05 deurgebring. Hy is aanvanklik as ’n voorspeler gebruik, maar is later na die verdediging verskuif. Ná sy uittrede in 2001 het Klopp die klub se afrigter geword en in 2004 Bundesliga-promosie verseker. Ná relegasie in die 2006/07-seisoen en mislukte pogings om weer te promoveer, het Klopp in 2008 bedank as die klub se langsdienende afrigter. Hy het toe afrigter van Borussia Dortmund geword en hulle na die Bundesliga-titel in 2010/11 gelei, voordat hy Dortmund se eerste inheemse dubbel gewen het tydens ’n rekordbrekende seisoen. Klopp het Dortmund ook na die tweede plek in die UEFA Kampioeneliga van 2012/13 gelei voordat hy in 2015 vertrek het as hul langsdienende afrigter.[7]
Klopp is in 2015 as afrigter van Liverpool aangestel. Hy het die klub na die Kampioeneliga-eindstryde in 2018 en 2022 gelei en die trofee in 2019 gewen — sy eerste en Liverpool se sesde titel in die kompetisie. Klopp se span het tweede geëindig in die 2018/19 Premierliga, met 97 punte — toe die derde hoogste totaal in die geskiedenis van die Engelse topafdeling, en die meeste ooit deur ’n span wat nie die titel gewen het nie. In die volgende seisoen het Klopp die UEFA Superbeker en Liverpool se eerste FIFA Klubwêreldbeker gewen, voordat hy Liverpool se eerste Premierliga-titel besorg het, met ’n klubrekord van 99 punte en verskeie topvlak-rekords. Hierdie prestasies het hom twee agtereenvolgende FIFA Afrigter van die Jaar-toekennings in 2019 en 2020 besorg. Klopp het in 2022 ’n bekerdubbel van die EFL-beker en FA-beker gewen. Hy het nog ’n EFL-beker in 2024 gewen en dieselfde jaar vertrek.
Klopp is ’n bekende voorstander van Gegenpressing, waarvolgens die span, nadat hulle besit verloor het, onmiddellik probeer om dit terug te wen eerder as om terug te val en te hergroepeer. Hy het sy spanne beskryf as spelende Heavy metal-sokker, met verwysing na hul intense druk en hoë aanvalstempo. Klopp het sy grootste invloede genoem as die Italiaanse afrigter Arrigo Sacchi en sy voormalige Mainz-afrigter Wolfgang Frank. Die belangrikheid van emosie is iets wat Klopp deur sy hele afrigtingsloopbaan beklemtoon het, en hy het sowel bewondering as berugtheid verwerf vir sy entoesiastiese vieringe langs die kantlyn.
Verwysings
[wysig | wysig bron]- ↑ "Jürgen Klopp" (in Duits). 1. FSV Mainz 05. Geargiveer vanaf die oorspronklike op 13 Junie 1998. Besoek op 7 Augustus 2022.
- ↑ Mark White (23 Desember 2021). "Ranked! The 50 best managers in the world". fourfourtwo.com (in Engels). Besoek op 2 Mei 2022.
- ↑ "Will Jurgen Klopp usurp Pep Guardiola as the world's best coach if he wins the 2022 Champions League?". Eurosport UK (in Engels). 26 April 2022. Besoek op 2 Mei 2022.
- ↑ "'Klopp is now the best manager in football' – Liverpool boss has moved ahead of Guardiola, says Hamann". Goal. Besoek op 2 Mei 2022.
- ↑ "Jurgen Klopp has proven he's the best manager in the world". British GQ (in Engels). 24 Januarie 2020. Besoek op 2 Mei 2022.
- ↑ "Former Liverpool boss Jurgen Klopp agrees to become Red Bull's global head of soccer". Sky Sports (in Engels). Besoek op 3 November 2024.
- ↑ "Borussia Dortmund | 2012/13 | Season review". bundesliga.com - the official Bundesliga website (in Engels). Besoek op 20 Junie 2024.[dooie skakel]
