Jaco Barnard-Naudé

in Wikipedia, die vrye ensiklopedie

Jaco Barnard-Naudé is 'n Suid-Afrikaanse skrywer en is in die laat sewentigerjare in Pretoria gebore. Tans is hy Navorsingsprofessor in die Vrystaat Sentrum vir Menseregte aan die Universiteit van die Vrystaat.

Lewe en werk[wysig | wysig bron]

Hy gaan skool in Brits in die Noordwes Provinsie en studeer dan verder aan die Universiteit van Pretoria vir 'n B.Com.-graad in die Regte (wat hy in 2000 met lof behaal) en 'n LL.B.-graad (wat hy in 2002 summa cum laude behaal). Een van sy deurlopende byvakke is uitvoerende musiek en hy speel die tjello. Na voltooiing van sy voorgraadse studies is hy kortstondig betrokke in 'n prokureurspraktyk in Johannesburg, maar wend hom dan eerder tot die akademie. In 2003 skryf hy in vir 'n doktorsgraad in kritiese regsfilosofie wat hy in 2005 aan die Universiteit van Pretoria verwerf met 'n proefskrif oor die beregtiging in die Suid-Afrikaanse kontraktereg in transformasie.[1] Tydens sy regstudies verwerf hy vele bekronings vir sy prestasies, onder andere die Grotius-medalje, die Sanlam-prys vir Ekonomie en die Gauteng Regsraad-prys. Sedert 2004 is hy verbonde aan die Departement Privaatreg aan die regsfakulteit van die Universiteit van Kaapstad, waar hy tans professor is. 'n Gedeelte van elke jaar spandeer hy in Londen om as ere-navorsingsgenoot by die Birkbeck Instituut vir die Geesteswetenskappe aan die Universiteit van Londen te werk. Hy spandeer ook tyd aan navorsing aan die Max Planck Instituut vir Internasionale Privaatreg in Hamburg in Duitsland en die Regskool aan Birkbeck-Kollege aan die Universiteit van Londen.[2]

Hy skryf verskeie vakkundige artikels wat in tydskrifte soos The South African Journal on Human Rights, Law and Critique, Stellenbosch Law Review, South African Law Journal en die South African Journal on Criminal Justice verskyn. Hy is lid van die uitvoerende raad van die Instituut vir Geregtigheid en Versoening saam met Pumla Gobodo-Madikizela medestigter van die Living Reconciliation Forum aan die Universiteit van Kaapstad en die Universiteit van die Vrystaat. Aan die Universiteit van Kaapstad behaal hy in 2009 'n M.A.-graad in Kreatiewe Skryfkuns.

Skryfwerk[wysig | wysig bron]

Hy begin skryf in standerd agt. Na 'n mislukte poging tot 'n liefdesverhouding met 'n heteroseksuele man skryf hy aan die einde van standerd nege 'n aantal gedigte op 'n ou tikmasjien in sy koshuiskamer op Brits en stuur hierdie “bundel” na Tafelberg-Uitgewers.[3] Die antwoord is dat die manuskrip nie publiseerbaar is nie, maar Charles Fryer bring uitvoerige kommentaar in potlood op die manuskrip aan, wat dien as besondere motivering. Hy publiseer van sy gedigte op LitNet[4] en dit word dan opgeneem in “Nuwe stemme 5”.[5]

Ander Verwysings[wysig | wysig bron]

Verwysings[wysig | wysig bron]

  1. Universiteit van Kaapstad: http://www.privatelaw.uct.ac.za/pvl/staff/jbarnard
  2. LinkedIn: https://za.linkedin.com/pub/jaco-barnard-naud%C3%A9/6a/a2b/142[dooie skakel]
  3. Lourens, Amanda “Tydskrif vir Letterkunde” Jaargang 51 no. 2, Vierde reeks Lente 2014
  4. LitNet: http://www.litnet.co.za/author/jaco-barnard-naude/
  5. Crous, Marius “Beeld” 15 Julie 2013