James Hogue
| James Arthur Hogue | ||
| Gebore | 22 Oktober 1959; Kansas City, Kansas | |
| Land | VSA | |
| Beroep | Swendelaar | |
| Ander name |
| |
| Misdaadbesonderhede | ||
| Misdaad | Diefstal; vervalsing; onder 'n vals naam by die Princeton-universiteit ingeskryf | |
James Arthur Hogue (gebore 22 Oktober 1959) is 'n Amerikaanse identiteitsrower wat aan die Princeton-universiteit ingeskryf het terwyl hy voorgegee het hy is 'n selfgeleerde weeskind.
Vroeë lewe
[wysig | wysig bron]Hogue het in 'n werkersklasgesin in Kansas City, Kansas, grootgeword en in 1977 sy skoolloopbaan aan 'n staatskool voltooi.[1]
Hy het in die 1980's aan die Universiteit van Texas in Austin, Texas, studeer, maar nie 'n graad verwerf nie.[1] In die laat 1970's was hy 'n student aan die Universiteit van Wyoming, maar het opgeskop toe hy nie goed vaar in die landloopspan nie.[2][3]
Misdaadloopbaan
[wysig | wysig bron]In September 1985 het Hogue, toe 25 jaar oud, die identiteit gesteel van ’n oorlede baba en as student by die Palo Alto-hoërskool ingeskryf as Jay Mitchell Huntsman, ’n 16-jarige weeskind van Nevada.[4] Op 7 Oktober 1985 het hy deelgeneem aan Stanford-universiteit se uitnodigingslandloopbyeenkoms.[4] Hogue het die wedloop gewen, maar nie by die beamptetafel aangemeld nie, wat agterdog gewek het.[4] As gevolg van sy geheimsinnige agtergrond en fisieke vermoë, het plaaslike sportverslaggewers hom die "Misterieseun" gedoop.[2] Jason Cole, ’n verslaggewer wat die geleentheid vir die destydse Peninsula Times Tribune gedek het, het Hogue se identiteitsdiefstal ontbloot en Hogue het die dorp verlaat.[5]
In 1987 het Hogue aansoek gedoen aan Princeton-universiteit onder die alias Alexi Indris-Santana, ’n selfgeleerde weeskind van Utah, waar hy toe gewoon het. In sy aansoekdokumente het hy beweer hy het buite in die Grand Canyon gewoon, skape opgepas en filosofieboeke gelees.[6] Princeton het Hogue in die herfs van 1988 toegelaat, maar hy het toelating vir 'n jaar uitgestel en aan Princeton gesê sy ma was sterwend.[2] In werklikheid het hy skuld beken aan die besit van gesteelde fietstoerusting en is hy tot vyf jaar tronkstraf gevonnis.[3]
Hogue het nege maande daarvan uitgedien voordat hy in Maart 1989 op parool uit die Utah-staatsgevangenis vrygelaat is.[3] Nadat hy ook ’n studietoelae van Princeton ontvang het, het hy onmiddellik na die universiteit vertrek, in stryd met die voorwaardes van sy parool.[1] Vir die volgende twee jaar het hy as Santana geleef, was hy lid van die atletiekspan en is hy toegelaat tot die Ivy Club, een van Princeton se eksklusiefste klubs.[4]
Sy ware identiteit is ontbloot toe Renee Pacheco, ’n voormalige klasmaat uit sy dae as "Jay Huntsman" aan die Palo Alto-hoërskool, hom herken het. Sy het die verslaggewer Jason Cole gekontak en hy het Hogue ’n tweede keer ontmasker. Op 26 Februarie 1991 is Hogue in die klas gearresteer en aangekla van diefstal en die vervalsing van rekords.[7] In Oktober 1992 het hy skuld beken aan diefstal vir die aanvaarding van meer as $22 000 in beursgeld en hy is tot nege maande tronkstraf gevonnis.[7] Hogue het 134 dae in die tronk deurgebring.[8]
In die een of ander stadium in 1992 is Hogue kortliks deur die Harvard-mineralogiemuseum in Cambridge, Massachusetts, aangestel as ’n deeltydse katalogiseerder.[8] Terselfdertyd het hy ’n kursus in mineralogie aan die Harvard-uitbreidingskool gevolg.[8] In April 1993 het die museum ontdek edelstene, mineraalmonsters, mikroskope en ander items ter waarde van $50 000 het verdwyn. Hogue is as verdagte beskou na aanleiding van ’n wenk.[8]
Op 10 Mei 1993 het die polisie Hogue in Somerville, Massachusetts gearresteer en hom van diefstal aangekla.[8] Op 26 Mei 1993 het Harvard-polisiemanne teruggekeer na Hogue se woonstel in Somerville en $600 se elektroniese toerusting teruggevind wat as gesteel aangemeld is van ’n elektronikamaatskappy in New Jersey waar Hogue in die somer van 1992 gewerk het.[9] In Junie 1993 is hy aangekla op twee aanklagte van diefstal en een aanklag van die ontvangs van gesteelde eiendom deur die Middlesex-aanklaerskantoor.[9]
Hogue het die voorwaardes van sy parool oortree deur terug te keer na Princeton en om op die kampus rond te hang onder die naam Jim MacAuthor; hy was nie amptelik ingeskryf nie, maar het sosiale funksies bygewoon en in die kafeteria geëet. Nadat ’n nagraadse student hom herken het, is hy op 19 Februarie 1996 in hegtenis geneem. Hy is egter vrygelaat.[10] Hy is later in die Mercer-korreksiesentrum opgesluit ná ’n skuldigbevinding aan betreding.
Hogue is in 1997 uit die tronk vrygelaat en het uit die openbare oog verdwyn. Tussen 1997 en 2003 is hy minstens twee keer vir diefstal in hegtenis geneem.[11]
In Januarie 2005 het die polisie Hogue se huis in Colorado met ’n lasbrief deursoek en 7 000 items ter waarde van meer as $100 000 gevind wat gesteel is uit nabygeleë huise waar Hogue as ’n herstelwerker en opknapper gewerk het. "Sy huis en ’n klein geheime kompartement wat hy gebou het, was volgepak" met gesteelde goedere.[12] Hy is op 4 Februarie 2006 in Tucson, Arizona aangekeer. Op 12 Maart 2007 het Hogue skuld beken aan diefstal in ruil vir ’n beperkte vonnis en die skrapping van bykomende aanklagte.[13] Hy is in 2012 op parool vrygelaat.
Op 3 November 2016 is Hogue in Aspen in hegtenis geneem op ’n lasbrief vir diefstal in Boulder, Colorado, uitgereik is.[14] Die Aspen-polisie het ontdek Hogue woon in ’n onwettig geboude, gekamoefleerde skuiling op die berg Aspen[11] en was moontlik besig om ’n tweede onwettige struktuur op die berg te bou.[14] Hogue het ’n vals naam gegee toe hy gearresteer is en kan aangekla word van identiteitsnabootsing.[14]
Verwysings
[wysig | wysig bron]- 1 2 3 Barron, James; Farber, M.A. (Maart 4, 1991). "Tracing a Devious Path to the Ivy League". The New York Times. The New York Times Company. ISSN 0362-4331. Besoek op Oktober 18, 2021.
- 1 2 3 Stannard, Matthew B. (Maart 18, 2002). "Documentary probes life of 'Mystery Boy' / Filmmaker and ex-classmate analyzes drifter who duped Palo Alto High, Princeton". San Francisco Chronicle. Hearst Newspapers. Besoek op Oktober 18, 2021 – via SFGate.
- 1 2 3 Leduc, Daniel (Maart 1, 1991). "Marathon Hoax: Track Star, Liar, Ex-Princeton Student In Jail". The Seattle Times. The Seattle Times Company. Besoek op Oktober 18, 2021.
- 1 2 3 4 Samuels, David (Augustus 20, 2001). "The Runner". The New Yorker. Condé Nast. Besoek op Oktober 18, 2021.
- ↑ Lofholm, Nancy (Maart 25, 2006). "The con artist next door". The Denver Post. MediaNews Group, Inc. Besoek op Oktober 18, 2021.
- ↑ Gamble, Luke (Maart 1, 2016). "The unbelievable story of the imposter who came to Princeton". The Tab. Tab Media Ltd. Besoek op Oktober 18, 2021.
- 1 2 "Princeton 'Student' Gets Jail Sentence". The New York Times. Associated Press. Oktober 25, 1992. Section 1, Page 38. Besoek op Oktober 18, 2021.
- 1 2 3 4 5 "Bogus Princeton Student Held in New Crime". The New York Times. Associated Press. Mei 16, 1993. Section 1, Page 25. Besoek op Oktober 18, 2021.
- 1 2 Wright, Andrew L. (Junie 7, 1993). "Student Indicted for Stealing Gems From Harvard Museum". The Harvard Crimson. The Harvard Crimson, Inc. Besoek op Oktober 18, 2021.
- ↑ "Phony Student Arrested Again at Princeton". The New York Times]. The New York Times Company. Associated Press. Februarie 25, 1996. Section 1, Page 36. Besoek op Oktober 20, 2010.
- 1 2 Auslander, Jason (November 3, 2016). "Cops: Aspen Mountain shack squatter is notorious con man". The Aspen Times. Swift Communications, Inc. Besoek op Oktober 18, 2021.
- ↑ "Hogue Pleads Guilty to Theft". The Watch. Telluride Daily Planet. Maart 16, 2007. Besoek op Oktober 18, 2021.
- ↑ "Hogue pleads guilty to felony theft charge". The Denver Post. MediaNews Group, Inc. Maart 17, 2007. Geargiveer vanaf die oorspronklike op September 30, 2007. Besoek op Oktober 20, 2021.
- 1 2 3 Auslander, Jason (November 3, 2016). "Con man arrested at Pitkin County Library". The Aspen Times. Swift Communications, Inc. Besoek op Oktober 20, 2021.
Skakels
[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
