Jan Daniël Stulting

Ds. J.D. Stulting.

Ds. Jan Daniël Stulting (Brandfort, 16 Junie 1906 – Ladismith, Kaap, 18 Januarie 1971) was 'n leraar in die Nederduitse Gereformeerde Kerk.

Jan Stulting was die seun van ds. C.H. Stulting wat sy emeritaat in 1946 aanvaar het nadat hy agtereenvolgens leraar was van die NG gemeente Venterstad (1902), Brandfort (1905) en Humansdorp (1913). Ná sy toelating tot die bediening in 1931, het die jong ds. Stulting sy vader se hulpprediker op Humansdorp geword en twee jaar later sy medeleraar in dieselfde gemeente. In 1943 neem hy 'n beroep aan na die NG gemeente Vosburg en in 1950 word hy medeleraar van die NG gemeente Ladismith saam met ds. W.T. Badenhorst.

Weens ernstige siekte moes ds. Stulting sy emeritaat in 1969 aanvaar en in Januarie 1971 sterf hy op Ladismith. Volgens sy lewenskets in die NG Kerk se jaarboek was hy in sy gemeente 'n geliefde leraar wie se onvermoeide arbeid in die wingerd van die Meester op prys gestel is.

Bronne

• Jonas, G. (red.). 1972. Jaarboek van die Nederduitse Gereformeerde Kerke (Moeder-, Sending- en Bantoekerke) 1972. Kaapstad en Pretoria: N.G. Kerk-Uitgewers en -Boekhandel.