Johann Wilhelm Redecker

in Wikipedia, die vrye ensiklopedie
Jump to navigation Jump to search
Die ou en nuwe kerk in Jöllenbeck, Redecker se geboortedorp, in 1876, 40 jaar ná sy geboorte.
Die Rynse Sendingkerk op Otjimbingwe is in 1867 opgerig, die jaar waarin Redecker daarheen verhuis het. Dis die oudste bestaande kerk in Namibië en in 1974 tot 'n nasionale gedenkwaardigheid verklaar.

Johann Wilhelm Redecker (Jöllenbeck, Duitsland, 29 September 1836Otjimbingwe, Suidwes-Afrika, 27 Januarie 1911) was ’n sendeling van die Rynse Sendinggenootskap in Suidwes-Afrika, handelaar en vader van die eerste argitek wat in die latere Namibië gebore is, Gottlieb Redecker, wat as staatsargitek tydens die Duitse koloniale bewind verantwoordelik was vir van Windhoek se bekendste bakens, soos die Tintenpalast en Christuskerk.

Redecker het op 15 Mei 1867 voet aan wal gesit op Walvisbaai as een van die Rynse sendelinge wat die baanbrekersendeling Carl Hugo Hahn in die gebied moes kom bystaan. Hy vestig hom op Omaruru en later Otjimbingwe, maar toe dié sendingstasie in 1874 tot niet gaan, bly hy daar agter as handelaar terwyl hy in die 1870’s (en waarskynlik nog daarna) sy eie winkel op die dorpie bedryf het. Volgens 'n ander weergawe van Redecker se verblyf in Suidwes-Afrika het hy hierheen gekom as handelaar-kolonis verbonde aan die Wuppertal-handelsmaatskappy, wat opgerig is deur die Rynse Sendinggenootskap. In 1870 is dit omskep in die Missions-Handels-Aktien-Gesellschaft (MHAG), wat takke gehad het op Otjimbingwe, Walvisbaai, Okahandja, Rehoboth en elders. Die maatskappy moes ontbind nadat dit swaar verliese gely het tydens die oorlog tussen die Namas en Herero’s van 1880. Redecker en Eduard Hälbich, wat saam met hom na Suidwes-Afrika verhuis het, het toe in die land aangebly as onafhanklike handelaars en wamakers.

Redecker was twee keer getroud: op 31 Maart 1869 met Lina Gronemeyer van Gütersloh, waar hul kinders ook skoolgegaan het, en in 1885 met Anna Maria Husemann. Altesaam agt kinders is uit albei huwelike gebore. Van dié kinders se oppasser was Johanna Gertze, wat op 25 Julie 1858 die eerste Herero-dopeling geword het.

Bronne[wysig | wysig bron]

Eksterne skakels[wysig | wysig bron]