Judith Sportel

in Wikipedia, die vrye ensiklopedie
Jump to navigation Jump to search
Judith Sportel
Judith Sportel.JPG
Judith Sportel
Geboorte1972
Hoogeveen, Nederland
Beroep(e)Sanger
Tipe stemSopraan
Instrument(e)Stem, klavier
Webwerfhttp://www.judithsportel.nl/
Portal.svg Musiekportaal
Judith Sportel tydens 'n uitvoering in Desember 2010.

Judith Sportel (gebore 1972) is ’n Nederlandse sopraan wat gereeld optree saam met kore en reeds meegewerk het aan talle CD-opnames, veral van gewyde musiek.

Agtergrond en opleiding[wysig | wysig bron]

Sportel is gebore in Hoogeveen en het grootgeword in ’n huis waarin sy reeds op ’n jong ouderdom met musiek en sang in aanraking gekom het. Aangesien sy aan ’n musiekskool studeer het, waar sy klavier- en sanglesse geneem het by Gerrit Jan Rutgers, het sy vroeg al die keuse gedoen om musiek te gaan studeer.

Ná skool het sy klassieke sang studeer aan die konservatorium in Zwolle by Lodewijk Meeuwsen waar sy in 1996 afstudeer. Gedurende haar studie het sy kennisgemaak met ’n gevarieerde en uiteenlopende repertorium. Sy het meesterklasse by menige bekende sangonderwyser geloop. Haar huidige sangafrigter is Joke de Vin.

Sangloopbaan[wysig | wysig bron]

Die omslagfoto van Sportel se CD "My Gift" van 2008.

Reeds tydens haar studie het sy dikwels as soliste opgetree. Deesdae is sy ’n gesogte soliste vir verskeie kore, vokale ensembles en orkeste. Onder leiding van heelparty dirigente het sy in uiteenlopende oratoriums gesing, dikwels saam met vooraanstaande soliste. Van die glansuitvoerings waarin sy opgetree het, was Bach se Kersfees-oratorium, die Matteus- en Johannes-passie, Händel se Messias en Josua, en verskillende ander oratoriums, requiems, kantates, misse en motette van onder andere Vivaldi, Bach, Haydn, Mozart, Faure, Mendelssohn-Bartholdi en Rutter.

Sy tree ook op in liederuitvoerings in Nederland sowel as in die buiteland en hou konserte in groot katedrale in onder meer Parys, Londen, Praag, Brussel en Metz. Intussen sing sy ook gereeld as soliste in radio-, TV- en CD-opnames.

CD's en DVD's[wysig | wysig bron]

Sportel het tot dusver een solo-CD uitgereik en meegewerk as solis aan talle ander CD's, waarvan net enkeles hier gelys word.

  • Reeds in 1993 het sy saam met die Christelijk Mannenkoor Hollandscheveld, Eibert Everts (bariton), Ruth Pos (orrel) en Chris Jeursen (klavier) ’n CD opgeneem in die Hervormde Kerk in Hasselt. Dis nie meer in die handel verkrygbaar nie. In 2001 volg ’n tweede CD met dié koor, wat wel nog te koop is. Dis opgeneem in die Nederlands Hervormde Kerk in Coevorden. Die ander solis is Mirjam Feiker, mezzosopraan. Ruth Pos bespeel die sintetiese klavier, André van Vliet die klavier en sintetiese klavier en Ronald IJmker die orrel.[1]
  • Haar debuutsolo-CD, My Gift, is in 2008 uitgereik.[2]
  • Sportel kan gehoor word op ses snitte van 'n CD wat die koor Spirit of Joy van Nieuwleusen en die Gereformeerd Drachtster Mannenkoor in Oktober en November 2008 in die Burgwalkerk in Kampen opgeneem het. Naas die Kersfees-oratorium Een Nieuw Begin het albei kore ook ’n aantal ander Kersliedere vir dié CD opgeneem.[3]
  • Op Sondag 10 April 2011 is ’n CD wat sy saam met die Fries Mannen Esmemble opgeneem het in die Martinikerk in Bolsward bekendgestel. Dit is vroeër in dié kerk opgeneem. Die volle opbrengs van die CD is geskenk aan die stigting Nobody’s Child, wat gemoeid is met die onderwys aan ’n meisieskool in Sri Lanka waar weeskinders van die tsoenami van 2004 onderrig ontvang.[4]
  • Sy kan ook gesien word op die DVD Abba Vader, wat uitgereik is saam met ’n CD, wat opgeneem is in die Bovenkerk in Kampen. Talle kore en die soliste Marjo van Someren, sopraan, en Piet Baarssen, bariton, tree op dié DVD op. Die begeleiding word verskaf deur Het Groot Nationaal Strijkorkest. Die orreliste is Harry Hamer, Harm Hoeve, André de Jager en André van Vliet, terwyl Martin Zonnenberg die orrel sowel as die klavier bespeel en Johan Bredewout net die klavier.[5]
  • In Maart 2013 het sy meegewerk as solis aan ’n CD, Bron van Licht, van die Christelijk Mannenkoor Staphorst. Dis opgeneem in die Dominicanenkerk in Zwolle.[6]

Sy werk voltyds as ortodontis-assistent by Caroline Aelbers se ortodontis-praktyk.[7]

Bronne[wysig | wysig bron]

Verwysings[wysig | wysig bron]

  1. (nl) Die Christelijk Mannenkoor Hollandschevelde webtuiste. URL besoek op 4 Mei 2015.
  2. (nl) Besonderhede van die CD. URL besoek op 4 Mei 2015.
  3. (nl) Besonderhede op die webtuiste van die Gereformeerd Drachtster Mannenkoor. URL besoek op 4 Mei 2015.
  4. (nl) [1]. URL besoek op 4 Mei 2015.
  5. (nl) Besonderhede op Mirasound.nl. URL besoek op 4 Mei 2015.
  6. (nl) Die koor se webtuiste. URL besoek op 4 Mei 2015.
  7. (nl) Besonderhede oor die praktyk se werknemers. URL besoek op 4 Mei 2015.

Eksterne skakels[wysig | wysig bron]