Juliana Morell

Juliana Morell

Juliana Morell (16 Februarie 1594 – 26 Junie 1653) was 'n Katalaanse Dominikaanse non en is beskou as 'n intellektuele wonderkind. Sommige bronne beweer dat sy in 1608 'n doktorsgraad in kanonieke reg in Avignon ontvang het. In 1941 het Sylvanus Morley dit nagespoor as 'n foutiewe interpretasie in 1859 van 17de-eeuse Latynse dokumente deur Joaquin Roca y Cornet en het toe andere aangehaal wat aangedui het dat, alhoewel haar vader wel wou hê dat sy 'n doktorsgraad moes verwerf, sy egter geweier het, aangesien dit onversoenbaar was met haar status as non.

Biografie

Morell is in Barcelona gebore as die dogter van 'n prominente bankier en sy vrou. Sy is moederloos gelaat toe sy baie jonk was en het haar eerste opleiding by die Dominikaanse nonne in Barcelona ontvang. Op die ouderdom van vier het sy onder die leiding van bekwame onderwysers Latyn, Grieks en Hebreeus tuis begin studeer. Toe sy sewe jaar oud was, het sy aan haar pa, wat weg was, 'n brief in Latyn geskryf.

Nadat hy daarvan beskuldig is dat hy aan 'n moord deelgeneem het, het Juliana se pa saam met sy dogter, toe agt jaar oud, na Lyon gevlug. By Lyon het Juliana haar studies voortgesit en daagliks nege ure aan retoriek, dialektiek, etiek en musiek gewy. Op die ouderdom van 12 jaar het sy haar tesisse in etiek en dialektiek summa cum laude in die openbaar verdedig. Sy het haar ten tye toegewy aan fisika, metafisika en kanonieke en burgerlike reg. Haar pa, wat intussentyd in Avignon gevestig het, wou gehad het dat sy dogter 'n doktorsgraad in die regte moes verwerf. Dit is bereik in 1608, toe sy haar regstesisse in die openbaar by die pouslike paleis van die vise-legaat voor 'n vooraanstaande gehoor, onder wie ondermeer die Princesse de Condé, voorgehou en verdedig het. Dit is nie duidelik watter liggaam die graad aan haar gegee het nie.

Volgens sommige bronne was Morell die eerste vrou wat ’n universiteitsgraad ontvang het, maar die omstandighede is onduidelik. Juliana Morell het tesisse in 1606 of 1607 in Lyon of dalk in Avignon aangebied en “verdedig”, alhoewel bewerings dat sy in 1608 'n doktorsgraad in kanonieke reg ontvang het, gediskrediteer is. Die eerste vrou wat 'n doktorsgraad in die moderne era ontvang het, was Elena Cornaro Piscopia in 1678 aan die Universiteit van Padua.

Met afwysings van rykdom en 'n voordelige huweliksaanbod, het sy gedurende 1608 die klooster van Saint Praxedes by Avignon betree. In 1609 het sy die Habit of the Order ontvang, en op 20 Junie 1610 die geloftes afgelê. By drie geleenthede is sy as priores aangewys. Twee jaar voor haar einde was sy in ernstige liggaamlike pyn en lyding en haar doodsangs het vyf dae geduur; sy is in 1653 te Avignon oorlede.

In 'n lofgedig verwys Lope de Vega na haar "as die vierde van die Genades en die tiende Muse". Hy sê ook “dat sy ’n engel was wat al die wetenskappe van die professorale leerstoele en skole in die openbaar onderrig het”.

Werke

Morell het 'n aantal godsdienstige geskrifte nagelaat:

• 'n Vertaling van die "Vita Spiritualis" van Vincent Ferrer, met kommentaar en aantekeninge by die verskillende hoofstukke (Lyons, 1617; Parys, 1619);
• Exercices spirituels sur l'éternité (1637);
• Franse vertaling van die Reël van St. Augustinus met byvoeging van verskeie verduidelikings en waarnemings vir die doel van onderrig (Avigon, 1680);
• Geskiedenis van die hervorming van die klooster van St Praxedes, met lewens van 'n paar vrome susters, in manuskrip;
• Latynse en Franse gedigte, sommige gedruk en sommige in manuskrip.

Sien ook

• Beatriz Galindo
• Francisca de Lebrija
• Isabella Losa
• Luisa de Medrano

Bronnelys

• Hierdie artikel gebruik teks van 'n bron wat nou in die publieke domein is: Herbermann, Charles, ed. (1913). "Juliana Morell". Catholic Encyclopedia. New York: Robert Appleton Company.
• Die inskrywing haal aan:
  • Quétif en Jacques Échard, Scriptores ordinis prædicatorum recensiti, notisque historicis illustrati ad annum 1700 auctoribuskode: la is verouderd II (1721), 845 vk.;
  • Baronius, Apologeticus, V, 326;
  • Nicolas Antonio, Bibliotheca hispana, II, (1672), 344–5.
• Morley, S. Griswold (Januarie 1941). "Juliana Morell: Problems". Hispanic Review. 9 (1): 137–150. doi:10.2307/469691. JSTOR 469691.
• Morley, S. Griswold (Julie 1941). "Juliana Morell: Postscript". Hispanic Review. 9 (3): 399–402. doi:10.2307/469606. ISSN 0018-2176. JSTOR 469606.