Kaap Correntes
Kaap Correntes (Portugees: Cabo das Correntes) is 'n gewilde vakansiegebied in die suide van Mosambiek.
Die kaap is 'n noordoos-uitstekende skiereiland aan die Mosambiekkanaal en wat 'n baai vorm bekend as Baia de Inhambane. Op die landtong lê die nedersettings Inhambane, Praia do Tofo en Praia da Rocha. Reg wes van Inhambane oor die baai lê Maxixe. Op 'n lae onbeduidende rotswand staan 'n witgeverfde baken wat die presiese kaap aandui. Die koördinate daarvan is 23° 55′ 36″ suid en 35° 31′ 48″ oos.
Kaap Correntes is deur die vroeë seevaarders beskou as een van die mees vreesaanjaende en grootste struikelblokke op hul roete na die Spesery-eilande. Die probleem is die vinnig suidwaartsvloeiende Mosambiekstroom wat sterk draaikolke in die omgewing van die kaap veroorsaak. Ook is die streek berug om sy ruk- en werwelwinde. Daarom het die Arabiere met hul dhows selde verder suidwaarts langs die kus van Afrika gevaar en was die kaap dus die suidgrens van Arabiese invloed in Afrika. Legendes lui dat seemeerminne op die kaap matrose na hul dood gelok het.
Soos die gebruik was in die 16de eeu het die Portugese skepe op pad na die Ooste naby aan die kus gevaar en het dan weens die sterk seestroom en winde gesukkel om vorentoe te seil. Skepe op die terugvaart het weer deur die sterk stroom en winde te vinnig beweeg en soms op die rots- en sandbanke beland. Ook die feit dat die skepe van die retoervaart gewoonlik gans te swaar gelaai was en boonop dikwels swak onderhou was, het tot probleme gelei. In die 16de en 17de eeu het Portugal nêrens meer skepe verloor as juis by Kaap Correntes. Daarom is die skeepkapteins toe opdrag gegee om ooswaarts om Madagaskar via Réunion en Mauritius te vaar om so die verraderlike toestande om Kaap Correntes te vermy. Toe later beter instrumente beskikbaar kom om lengteligging te bepaal, is die Mosambiekkanaal weer gebruik, want nou kon die kapteins 'n roete in die middel van die kanaal gebruik.
Sien ook[wysig | wysig bron]
Bronne[wysig | wysig bron]
- (pt) Guinote, P.J.A. (1999) "Ascensão e Declínio da Carreira da Índia", Vasco da Gama e a Índia, Lisboa: Fundação Calouste Gulbenkian, 1999, vol. II, bl. 7–39. aanlyn
- (en) Theal, George McCall (1902) The Beginning of South African History. London: Unwin.