Karakter (rekenaars)

in Wikipedia, die vrye ensiklopedie
Jump to navigation Jump to search

In rekenaar- en masjiengebaseerde telekommunikasieterminologie is 'n karakter 'n eenheid van inligting wat rofweg ooreenstem met 'n grafeem, 'n grafeemagtige eenheid, of 'n simbool, soos in 'n alfabet of sillabarium in die geskrewe vorm van 'n natuurlike taal.

Voorbeelde van karakters sluit in letters, numeriese syfers, algemene leestekens (soos "." of "-"), en wit spasie. Die begrip sluit ook kontrolekarakters in wat nie met sigbare simbole ooreenstem nie, maar eerder met instruksies om die teks te formatteer of te prosesseer. Voorbeelde van kontrolekarakters sluit in wa-terugloop (Engels: carriage return) of inkeep (Engels: tab), sowel as instruksies aan drukkers of ander toestelle wat teks vertoon of verwerk.

Karakters word gewoonlik gekombineer om stringe te vorm.

In die verlede is die term karakter ook gebruik om na 'n spesifieke aantal aaneenlopende bisse te verwys. Terwyl daar vandag gewoonlik aanvaar word dat die begrip karakter in hierdie konteks na 8 bisse (een greep) verwys, is ander definisies soos 4 of 6 bisse al in die verlede gebruik.