Klára Würtz

Klára Würtz (1965, Boedapest) is 'n Hongaarse pianiste. Würtz doseer aan die Utrechtse Konservatorium.

Lewensloop

Würtz is die dogter van Ádám en Klára Würtz. Ádám Würtz was 'n skilder en liefhebber van klassieke musiek. Würtz se belangstelling in musiek is gewek toe haar suster 'n jazz-sangeres wou word. Klára begin reeds op haar vyfde lewensjaar klavier te speel, maar van haar 6de tot haar 14de lewensjaar was sy lid van die kinderkoor van die Hongaarse radiodiens. Volgens haar eie mededeling het die koor baie toewyding en harde werk vereis. Die kinderkoor het reise na verskillende lande en wêrelddele onderneem, iets wat in die kommunistiese Hongarye 'n besonderse voorreg was, en wat Würtz baie geniet het. Sy het dikwels die intermezzo gespeel tydens dié opvoerings.

In 1979 word sy toegelaat tot die Fakulteit vir Talentvolle Kinders aan die Franz Liszt-Akademie vir Musiek. Die ouderdom van kinders in dié klas (onder leiding van Miklósné Máthé) het gewissel van ongeveer 7 tot 8 jaar; en Würtz het haar in die klas baie bewus van haar ouderdom (van 14) gevoel. Toe sy 17 word, het sy lesse begin ontvang van Zoltán Kocsis, Ferenc Rados en György Kurtág. In 1985 woon sy die Ettore Pozzoli-Klavierkompetisie in Milaan by. Sy neem in 1988 deel aan die “Dublin International Piano Competition”, en wen verskeie pryse met haar vertolking van die werk van Schubert. 'n Lid van die beoordelingspaneel was 'n verteenwoordiger van "Columbia Artists Management" uit New York Stad, en het haar terstond 'n kontrak aangebied. Die kontrak het 'n projek behels om klassieke musiek na alle uithoeke van die Verenigde State te bring. In 1989 verwerf sy haar graad cum laude. Gevolglik reis sy dus in 1991 na die VSA, en tree in meer as honderd konserte in 38 verskillende state op. In haar eie woorde, was hierdie geleentheid 'n beslissende punt in haar loopbaan, omdat sy daarmee haar angs en worstelinge tydens opvoerings leer beheer en oorkom het.

Saam met Joan Berkhemer en Nadia David vorm sy later die Amsterdam Klaviertrio, en speel in die tyd ook in duetwerke saam met Janine Jansen. Later speel sy met reëlmaat saam met Timora Rosler. Aanvanklik het sy in Groningen gewoon, maar sedert 1996 woon sy in Amsterdam. Op uitnodiging van Pieter van Winkel van Brilliant Classics neem sy in 1998 die versamelde klaviersonates van Mozart op as deel van dié plaatetiket se Mozart Edition, welke opnames baie gewild was, en aan haar groot populariteit onder klassieke musiekliefhebbers verleen het. Würtz en Van Winkel het 'n hegte vriendskap ontwikkel en is na 5 jaar getroud. In 2001 het sy saam met die Nord-West Deutsche Philharmonie in Nederland en Duitsland getoer, met opvoerings van Schumann se Klavierconcerto in A mineur. In 2003 speel sy Mozart in die Carnegie Hall en die Boston Symphony Hall saam met die Boston Simfonieorkes onder leiding van Bernard Haitink. In 2006, die 250ste herdenking van Mozart se geboortejaar, word sy uitgenooi om tydens die Salzburger Festspiele te speel.

Na die geboorte van haar dogter in 2004 kon sy vir 'n jaar nie speel nie vanweë tenditis in haar hande. Volgens haar is dit egter nie haar ambisie om, soos sy self sê, "'n toppianiste" te word nie. Klára woon tans saam met haar gesin in Amsterdam en doseer aan die Utrechtse Konservatorium.

Privaatlewe

Aan die einde van die 1980's ontmoet Würtz vir Eddy Schaafsma van die dagblad Nieuwsblad van het Noorden, trou met hom en verhuis na Groningen. Later, na 'n egskeiding, trou sy 'n tweede keer, met die Nederlandse plaatetiketbestuurder, Pieter van Winkel van Brilliant Classics, saam met wie sy sedert 1996 in Amsterdam woon.

Diskografie

Würtz het reeds meer as 30 cd’s opgeneem. Haar opnames van Mozart se klaviersonates word beskou as gesaghebbende interpretasies van die werke. Haar opnames neem veral die Klassieke en Romantiese periodes in beslag, met opnames van Mozart, Beethoven, Brahms, Schubert, Schumann en Tsjaikofski.

Wetenswaardighede

• Haar gunsteling klavierstuk is die Fantasie vir Klavier van Schumann.
• Würtz het kort pinkies. Sy gebruik daarom soms haar ringvingers, waar sy normaalweg haar pinkies sou moes gebruik.
• Sy neem soms haar hond saam met haar op die podium.

Eksterne skakels

• VPRO Vrije Geluiden (alternatief, nr 1 t/m 8)
• Klára Würtz op Ellis Smit Producties
• Hogeschool voor de Kunsten^{[dooie skakel]}