Knysna (rolprent)
Knysna is 'n 100 minuut lange Afrikaanse romantiese komedie wat in 2014 vrygestel is.[1] Die film is deur André Velts geregisseer met 'n draaiboek deur Emilé Hager, vervaardig deur Mynard Kraak en versprei deur Ster-Kinekor.[1]
Sinopsis
[wysig | wysig bron]Dolf, 'n doodgewone man van die vakansiedorp Knysna aan Suid-Afrika se Tuinroete, is 'n produk van sy omstandighede en omgewing. Vasgevang in sy alledaagse lewe saam met sy vriende en eksentrieke grootouers, word sy wêreld omgekeer wanneer hy vir die beeldskone vreemdeling, Stephanie, val. Stephanie skuil by hom nadat sy koue voete gekry het vir haar troue met die Prins van Liechtenstein, slegs weke voor die geleentheid. Dolf, wat hom niks steur aan glanspersoonlikhede of die voorblaaie van glanstydskrifte nie, is onbewus van Stephanie se ware identiteit. Die eenvoud van sy lewe trek Stephanie aan, en sy begin smag na die vryheid om haarself te wees, weg van die kollig. Wanneer die waarheid egter onthul word, bevind Dolf hom in 'n tweestryd. Hy is verlief op Stephanie, maar begin ook 'n minderwaardigheidskompleks ervaar. Alhoewel hy dalk nie in Prins Rafael se sosiale of finansiële liga is nie, bied Dolf 'n lewenswyse waarmee Stephanie kan identifiseer, vry van die las van koninklike verwagtinge en internasionale media.[1]
Rolverdeling
[wysig | wysig bron]Die rolverdeling is Neels van Jaarsveld, Marguerite Wheatley, Julie Strydom, Cintaine Schutte, Juanita de Villiers, Kaz McFadden, Emilé Hager, Shaleen Surtie-Richards, Morné du Toit, en Terence Bridgett.[1]
Verwysings
[wysig | wysig bron]- 1 2 3 4 Steyn, Christa. Die argivering van die Afrikaanse film (1916 – 2014). MA-verhandeling: Universiteit van die Vrystaat.