Koeraisj

Vir die 106de soera van die Koran, sien Al-'Kuraysh.

Die beweerde Koeraisj-vlag wat gewapper is gedurende die Slag van Siffin in Julie 657.

Die Koeraisj (Arabies: قُرَيْشٍ) is 'n Arabiese stam wat Mekka voor die opkoms van Islam beheer het. Sy lede is in 10 hoofclans verdeel, insluitende die Banoe Hasjim, waarin die Islam se stigter-profeet, Mohammed, gebore is. Teen die 7de eeu het hulle ryk handelaars geword wat die handel tussen die Indiese Oseaan, Afrika en die Middellandse See oorheers het. Die stam het in die somer karavane na Gaza en Damaskus gestuur en in die winter na Jemen, en hulle het ander ondernemings aan dié roetes gehad.

Geskiedenis

'n Kaart van die Arabiese Skiereiland voor die Islam.

Toe Mohammed die Islam begin predik, was die Koeraisj nie eintlik bekommerd nie. Hulle kommer het egter begin toeneem namate hy toenemend die politeïsme begin kritiseer het wat voor die Islam algemeen in Arabië was. Toe verhoudings verswak, het Mohammed en sy volgelinge na Medina migreer (die reis bekend as die Hidjra). Die twee kante kon nie 'n vreedsame oplossing vind nie en die Koeraisj het aangehou om Mohammed se gemeenskap te keer om pelgrimstogte na Mekka te onderneem. Hy het daarna strooptogte op hulle karavane uitgevoer om hulle te konfronteer. Dié strooptogte het eindelik in verskeie groot gevegte ontaard. Ná veranderings in Medina se politieke klimaat, insluitende die verbanning van drie Joodse stamme, het Mohammed na berig word die fokus van sy militêre veldtogte verskuif van die Koeraisj se karavane na Noord-Arabiese stamme.

Namate Mohammed se posisie in Medina meer gevestig geraak het, het houdings jeens hom in sy tuisstad verbeter. Die Verdrag van al-Hoedaibija het (vanaf Maart 628) 'n wapenstilstand van 10 jaar met die Koeraisj daargestel en Mohammed in staat gestel om die volgende jaar 'n oemra na Mekka te onderneem. Tydens dié pelgrimstog het hy met sy clan herenig geraak, soos gesimboliseer deur sy huwelik met Maimoena bint al-Harith. Verder het verskeie prominente inwoners van Mekka Mohammed se toenemende invloed in die Arabiese gemeenskap erken en hulle tot die Islam bekeer. Hulle het 'n groot rol gespeel in die vroeë Moslemse verowerings.

Volgens Moslembronne het die Koeraisj die Verdrag van al-Hoedaibija twee jaar ná die ondertekening daarvan verbreek; 'n strydlustige party in die stam wat teen die advies van hulle leier, Aboe Soefjan, opgetree het, het 'n clan gesteun in die konflik teen Banoe Choeza'ah, wat in 'n bondgenootskap met Mohammed was. Dit het hom genoop om met 'n leër van 10 000 man op te ruk vir 'n beleg van Mekka. Toe Aboe Soefjan met die inkomende mag gekonfronteer word, het hy Mohammed ontmoet om amnestie te vra vir alle Koeraisj-lede wat hom nie teenstaan nie. Dus het Mohammed en sy troepe Mekka byna ongehinderd binnegegaan, en feitlik al die stad se inwoners het hulle tot die Islam bekeer.

Ná Mohammed se dood in 632 het die leierskap van die Moslemgemeenskap tradisioneel gegaan aan iemand in die Koeraisj, soos die geval was met die Rasjidoen-, Omajjadiese en Abbasidiese dinastie, en na bewering met die Fatimidiese dinastie.

Verwysings

Bronne

• Lewis, Bernard (2002). The Arabs in History. Oxford, New York: Oxford University Press. ISBN 978-0-19-280310-8.
• Bosworth, C. E.; Lewis; Pellat; Donzel, E. J. van (1998). Encyclopaedia of Islam, Volume V (Khe-Mahi): [Fasc. 79-98, 98a]. Brill. ISBN 978-90-04-07819-2.
• "Fidjār". Encyclopedia of Islam (2nd) 2de C–G. (1965). Leiden: Brill. 883–884. ISBN 90-04-07026-5. 

• Watt, W. Montgomery (1961). Muhammad: Prophet and Statesman (in Engels). Oxford University Press. ISBN 978-0-19-881078-0.
• Watt, W. Montgomery (1986). "Kuraysh". Encyclopedia of Islam (Nuut) V: Khe–Mahi. Leiden and New York: Brill. 434–435. ISBN 90-04-07819-3. 

Skakels

• Hierdie artikel is in sy geheel of gedeeltelik uit die Engelse Wikipedia vertaal.