Koning Boudewyn-stadion

Koning Boudewyn-stadion
Ligging	Laeken, Brussel, België
Koördinate	50°53′45″N 4°20′3″E
Kapasiteit	50 093
Oppervlak	Gras
Konstruksie
Geopen	23 Augustus 1930 (1930-08-23)
Huurders
Belgiese nasionale sokkerspan Belgiese nasionale rugbyspan Royale Union Saint-Gilloise (slegs vir UEFA-kompetisies)

Die Koning Boudewyn-stadion (Nederlands: Het Koning Boudewijnstadion, Frans: Stade Roi Baudouin), vernoem na Koning Boudewyn (België se koning van 1951 tot 1993) en vroeër bekend as die Jubelstadion en die Heizelstadion, is ’n multifunksionele sport- en konsertstadion geleë in die Heizelgebied in Brussel. Elke jaar bied dit groot sportbyeenkomste aan, soos die Belgiese nasionale sokkerspan se wedstryde, die eindstryd van die Belgiese Sokkerbeker, die prestigeryke atletiekkompetisie Memorial Van Damme en meer. Dit het ook konserte aangebied deur van die wêreld se grootste musikante, insluitend die Rolling Stones, U2, Madonna, Beyoncé, Céline Dion, Robbie Williams, Bruce Springsteen, Coldplay, Rammstein en vele ander. Met 50 093 sitplekke is dit die grootste stadion in België.

Geskiedenis

In 1927 is die Jubelstadion op hierdie plek gebou. Ná die Tweede Wêreldoorlog is die naam in 1946 verander na die Heizelstadion, vernoem na die woonbuurt waarin die stadion geleë is. Die Heizelramp, wat op 29 Mei 1985 in hierdie stadion plaasgevind het, was een van die grootste rampe in die sokkergeskiedenis. Voor die eindstryd van die Europabeker I van die 1984/85-seisoen tussen die Engelse span Liverpool en die Italiaanse span Juventus het onluste uitgebreek toe Liverpool-ondersteuners die neutrale vak bestorm het wat met Juventus-ondersteuners gevul was. Tydens die voorval is 39 mense (waarvan 32 Italianers) dood en sowat 400 is beseer.

Modernisering

In ’n eerste opknappingsfase, wat in September 1994 begin volgens ’n ontwerp van die die Vlaamse argitek Robert "bOb" Van Reeth, word die stadion deeglik onder hande geneem. Onder andere die pawiljoene (tribunes) word in hierdie fase hernu. Op 23 Augustus 1995, presies 65 jaar ná die opening van die Jubelstadion, word die vernieuwde stadion plegtig geopen in die teenwoordigheid van die koninklike familie en almal van betekenis in die Belgiese sportwêreld. Van toe af heet dit die “Koning Boudewijnstadion”.

Toe België en Nederland saam die reg verwerf om Euro 2000 (die Europese Sokkerkampioenskap) aan te bied, moes die stadion verder gemoderniseer word. ’n Verdere verdieping met tribunes moes bygevoeg word, en die ou Tribune 2 moes heeltemal herbou word.

Die oorspronklike fronton, versier met fresco’s, is behou en kom goed tot sy reg; dit behou sy hoofrol as ingang tot die stadion.

In 1996 is ’n nuwe, blitsvinnige atletiekbaan met nege bane tydens die atletiekkompetisie Memorial Van Damme plegtig in gebruik geneem.

Die tweede fase van die opknappingswerk begin op 27 Januarie 1997. Die hedendaagse stadion word voltooi en plegtig geopen op 28 Augustus 1998, tydens die Memorial Van Damme. Om volledig te voldoen aan die UEFA se vereistes, word net voor Euro 2000 nog verdere werke uitgevoer om die veiligheid en gerief van besoekers te verbeter. In April 2024 is die kleedkamers verbou, wat die sporters se ervaring nog aangenamer maak.