Kornalyn
.jpg)
Kornalyn (ook bekend as korneool of karneool) is ‘n halfedelsteen. Dit is ‘n variëteit van chalcedoon en is deurskynend en helder oranje-rooi van kleur, maar dit kan wissel van geel tot bruin en word hoofsaaklik aangetref in Indië, Brasilië en Japan. Kornalyn is die verjaardagsteen vir Julie en word dikwels gebruik in seëlringe.
Kornalynkrale
[wysig | wysig bron]Krale van kornalyn is in grafkelders in Egipte, in Mesopotamië, langs die kus van Palestina, die Soedan, in Groot-Zimbabwe en in Wes-Afrika aangetref. In verskeie museums in Suid-Afrika is sulke krale te sien. Dit is meesal opgetel langs die Wildekus of verkry van inwoners van Pondoland. Historici vermoed dat die krale afkomstig is van Feniciërs wat voor Christus langs die kus van Pondoland gevaar het en daar handel gedryf het. Ook was daar waarskynlik Arabiese slawehandelaars aktief. Toe Portugal met Afrika begin handel dryf het om goud en ivoor te verkry, wou die inboorlinge daarvoor betaal word in die vir hulle bekende kornalynkrale. Dus was die Portugese verplig om in Indië hierdie krale te verkry. En het die ou Portugese seilskepe dus dikwels ‘n groot aantal van die krale as vrag gehad. Verskeie van die skepe het aan die Wildekus vergaan en sedertdien spoel van hierdie krale gereeld aan die kus van kwaZulu-Natal en die Oos-Kaap uit. Die krale het verskillende vorms gehad: agtkantig tot ruitvormig. Wie die slypwerk en die ronde gaatjies daarin geboor het, het in die vergetelheid geraak.
Lees ook
[wysig | wysig bron]Bronnelys
[wysig | wysig bron]- Green, Lawrence G.: Almost forgotten, never told. A book of people and places, dramas and adventures along the South African coast, with a few voyages into deeper waters. Kaapstad: Howard Timmins, 1965
- Green, Lawrence G.: South African Beachcomber. Memories of the people of the shore and the stories they told; sand and dunes and treasure, seabirds and creatures of the sea; and personal impressions of certain islands in African waters. Kaapstad: Howard Timmins, 1958
- van Waart, Sue: Briewe uit die Tuin van Eden. Pretoria: J.P. van der Walt, 1993. ISBN 0-7993-1938-4
