Een van die waterweë wat aan die delta gekoppel is, is die Sawoetirivier wat tot sowat 80 km (50 myl) noordoos van die uitgebreide binnelandse delta strek. Op 26 Mei 2012 het die Gevorderde Landafbeelder op NASA se Aardobservasie-1-satelliet (d.i. EO-1 ALI) hierdie beeld van water wat via die Sawoetirivier noordwaarts na die Sawoetimoeras vloei in natuurlike kleur vasgelê. Die moeras is geleë binne die Mababe-laagte van Botswana se Nasionale Chobewildtuin.
Die oorvloei van 2012 was anders as die tipiese seisoensvloede wat die delta jaarliks beleef, en Guido van Langenhove van Namibië se Hidrologiese Dienste het dit beskryf as “'n buitengewone hidrologiese gebeurtenis.”
Die reëns wat die Okawango vul, val eintlik nie oor die delta self nie, maar wel oor die Angolese hooglande vanwaar die waters oor sowat 450 km (280 myl) via meanderende riviere en oor 'n baie effense gradiënt afgevoer word. Gevolglik bereik die reënwater wat tipies van Oktober tot Maart in Angola val, gewoonlik nié die bekken van die Okawangodelta voor Julie nie. In Mei 2012 het water egter reeds die Okawango bereik en het dit na ander waterweë soos die Sawoetirivier oorgevloei.
“Die Okawangodelta ervaar nou reeds 'n paar jaar lank rekordvloede,” het Frank Eckardt van die Universiteit van Kaapstad gesê. “Ons het gevind dat die Botetirivier in vloed is sedert 2009, en het ook water in Xau-meer, suidoos van die delta, opgemerk. Verder sien ons nou water in die Selindakanaal, op pad na die Mababe-laagte, noordoos van die delta. Sommige van hierdie laagtes word net na dekadelange droogte met water gevul.”
Van Langenhove beaam dat die vloede waterweë in die streek herstel het wat deur sommige waarnemers as “fossielriviere” gereken is.