Laerskool M.W. de Wet

in Wikipedia, die vrye ensiklopedie
Jump to navigation Jump to search

Die Laerskool M.W. de Wet is ’n primêre parallelmediumskool in Edenvale aan Gauteng se Oos-Rand.

Dit is sedert 2010 die enigste staatskool in Edenvale waaraan enige onderrig deur medium Afrikaans gebied word, nadat die Laerskool Edenvale in 1992 met dié skool saamgesmelt het en die Hoërskool Edenvale (gestig in 1956) van 2008 tot 2010 Engelsmedium geword het en sedertdien as Dowerglen High School bekendstaan om dit van Edenvale High School te onderskei.[1]

Geskiedenis[wysig | wysig bron]

Die geskiedenis van die Laerskool M.W. de Wet kan teruggevoer word tot 15 Oktober 1947 toe dit amptelik geopen het met 118 leerlinge en vier tydelike onderwysers onder die hoofskap van F.J. Potgieter. Die skool het aanvanklik as Rietfontein Landbouhoeweskool bekendgestaan en was op die hoek van Willow- en Highweg, 1 km soos die kraai vlieg noordoos van die huidige perseel.

Op 4 November 1947 is die naam van die skool amptelik na M.W. de Wet verander ter ere van M.W. de Wet, skoolhoof van 1903 tot 1923 van die goewermentskool in Edenvale. De Wet het nie alleen ’n rol gespeel as hoof van die skool nie, maar ook in die ontwikkeling van Christelike waardes en op die gebied van opvoeding en kultuur. Die skool het op 14 Desember 1951 na sy huidige perseel op die hoek van 15de Laan en Tweede Straat, Edenvale, verhuis.

Weens die afname in Edenvale se Afrikaanse inwoners en die algemene krimpende kindertal van wit mense in Suid-Afrika, het die Laerskool M.W. de Wet op 6 Januarie 1992 met die Laerskool Edenvale, wie se terrein 1,7 km noordnoordwes van M.W. de Wet s’n was, saamgesmelt onder laasgenoemde se naam en op hul perseel. Die Laerskool Edenvale se ou terrein word nou gebruik vir etlike afdelings van die Ekurhuleni-stadsraad. Op 8 Januarie 1992 het M.W. de Wet met 473 leerlinge heropen. Die skool het sy 50-jarige bestaan op 15 Oktober 1997 gevier en op 12 Januarie 1998 sy eerste gr. R.-klas geopen.

Omdat die daling in Edenvale se Afrikaanse gemeenskap voortgeduur het, is besluit om M.W. de Wet vanaf 16 Januarie 2002 ’n parallelmediumskool te maak. Op hierdie dag het die eerste twee Engelse klasse, gr. R. en gr. 1, geopen. Net ’n jaar later, op 13 Januarie 2003, is die skool se naam amptelike ná langer as 50 jaar na die Laerskool M.W. de Wet Primary School verander.[2]

Afrikaanse kerk krimp ook[wysig | wysig bron]

In onderstaande tabel kan die uitwerking van Edenvale se kleinerwordende Afrikaanse gemeenskap, wat gelei het tot die sluiting van een skool, gedeeltelike verengelsing van nog een en die algehele verengelsing van die derde een, gesien word:

Kerkgenootskap Bel. lidmate: 1989/'90 Dooplidmate: 1989/'90 Bel. lidmate: 2000/'01 Dooplidmate 2000/'01 Bel. lidmate: 2017/'18 Dooplidmate 2017/'18
Gereformeerde kerk 225 86 179 49 154 14
Hervormde kerk 405 182 197 58
NGK Edenvale 912 284 726 198 1 005 277
NGK Edenvale-Noord 536 253 296 86
Totaal 2 078 805 1 355 391 1 159 291

Verwysings[wysig | wysig bron]

  1. (en) Die geskiedenis van die skool op sy webtuiste. URL besoek op 11 Februarie 2018.
  2. (en) Die skool geskiedenis weergegee op sy webtuiste. URL besoek op 11 Februarie 2018.