Lindsay Eddie
| Lindsay Atkins Eddie | |
| Gebore | 1845 Grahamstad, Suid-Afrika |
|---|---|
| Oorlede | 13 Oktober 1913 (67–68 jaar oud) Grahamstad |
| Nasionaliteit | Suid-Afrikaans |
| Vakgebied | Sterrekunde |
| Bekend vir | Waarneming van komete |
| Toekennings | Mede-genoot van die Royal Astronomical Society |
Lindsay Atkins Eddie FRAS (1845 - 13 Oktober 1913) was 'n Suid-Afrikaanse amateur-sterrekundige, bekend vir sy waarnemings van Venus, Mercurius en Mars en 21 komete. Hy is in 1880 as mede-genoot van die Royal Astronomical Society verkies. Hy het in die Suid-Afrikaanse Weermag gedien en sy finale rang was dié van 'n Majoor.
Persoonlike lewe[wysig | wysig bron]
Eddie was die seun van 'n weermag-chirurg, William Cruikshank Eddie en Sarah Eddie (née Kaye). Hy het een broer en een suster gehad. Hy het in Grahamstad grootgeword en in 1878 by die staatsdiens van Kaapstad aangesluit. In 1892 was hy, as deel van sy werk as 'n klerk vir Regter Jones van die Oos-distrikhof, gevra om saam met William G. Atherstone die uitspraak van 'n lastersaak te ontleed omdat die jurie dit nie kon besluit nie. Die saak het rondom W.B. Shaw gedraai wat dekaan Williams van St Michael- en St George-katedraal beskuldig het dat hy 'n leuenaar was.[1]
Hy het vir 20 jaar in die weermag gedien. In 1876 was hy bevel van die Kaapse koloniale gewapende magte in Grahamstad tydens 'n inval van Xhosas net voor die 9de Xhosa-oorlog. In 1885 was hy 'n luitenant in bevel van die Betsjoeanaland-ekspedisie, wat gelei was deur Charles Warren. Sy finale rang was dié van 'n Majoor toe hy in 1901 afgetree het.[1]
Op 2 September 1873 het hy met Hermina Fredrica Upton getrou in die St. Bartholomews Anglikaanse kerk in Grahamstad en hulle het vyf kinders gehad. [2][3]
Hy is op 13 Oktober 1913 in Grahamstad dood.
Sterrekunde[wysig | wysig bron]
Tydens sy vroeë opleiding het hy tyd spandeer onder die leiding van Dr. Richards (later biskop Richards). Dié tyd het hom geïnspireer om sterre te bestudeer. Sy aanvanklike toerusting was 'n 9,5-duim-reflekterende teleskoop in Grahamstad, maar hy het later 'n 76 mm-refraktor gebruik en 'n kragtiger 240 mm-reflektor.[1]
Hy het baie nuttige waarnemings gemaak, insluitende waarnemings van 21 komete, hoewel hy nooit enige self ontdek het nie. Die oorgang van Venus op 6 Desember 1882, wat hy van Fort Selwyn, naby Grahamstad waargeneem het, was een van die hoogtepunte van sy waarnemingsloopbaan. Hy is bygestaan in hierdie waarneming deur die burgemeester van Grahamstown, J.S. Willcox, 'n juwelier wat 'n kronometer/horlosie voorsien het om die tydsduur van die waarnemings vas te stel. Twee sterrekundiges by die Royal Observatory in Kaapstad, David Gill en William Finlay, het 'n reeks tydseine na Eddie gestuur deur 'n telegraaf wat hom toegelaat het om die kronometer reg te stel.
Oor die 20 jaar van sy loopbaan is sommige van sy uitslae in sewe artikels gepubliseer in die maandelikse kennisgewings van die Royal Astronomical Society, insluitende 'n uitgebreide reeks waarnemings van Die Groot Komeet van 1882.[4]
Hy het verskeie ander referate in ander tydskrifte gepubliseer, soos sy waarneming van die maanverduistering van 11 Maart 1895 in Popular Astronomy en 'n eienaardige stert van 'n meteoriet wat op 22 Oktober 1895 in Grahamstad verskyn het en ook in Popular Astronomy gepubliseer was. Sy bydraes tot die joernaal van die British Astronomical Association bevat aantekeninge oor 'n helder meteoriet en die kleure- en spektrum van 100 suidelike sterre in 1894, so wel as die samehang van die maan met Venus in 1903. Hy het 'n oorgang van Mercurius in 1894 waargeneem en in 1907 het hy die planeet Mars bestudeer in groot besonderhede en tekeninge daarvan gepubliseer. Dit is hoogs aangeskryf deur E. M. Antoniadi van die Mars-afdeling van die British Astronomical Association.[1][4]
Hy is op 14 Mei 1880 vereer as 'n mede-genoot van die Royal Astronomical Society.[4] Van 1881 tot 1898 het hy gereeld sy kommentaar oor komete in die plaaslike koerant, die Grahamstadjoernaal gepubliseer. Die kommentare het waarnemings van Fabry se komeet (1886), Swift's Comet (1892) en Gale's Comet (1894) ingesluit.
Die Eddie-krater op Mars is 'n 89 km-wye krater wat in sy eer genaam is.[5]
Verwysings[wysig | wysig bron]
- ↑ 1,0 1,1 1,2 1,3 Plug, C. S2A3 Biographical Database of Southern African Science (Engels). URL besoek op 25 Maart 2019.
- ↑ Transcriptions of South African Marriage Entries: British 1820 Settlers to South Africa (Engels). 1820settlers.com. URL besoek op 25 Maart 2019.
- ↑ Lindsay Atkins Eddie (deceased) - Genealogy (Engels). Geni.com (2017). URL besoek op 25 Maart 2019.
- ↑ 4,0 4,1 4,2 Lindsay Atkins Eddie, Maj. - Obituary Notice (Engels) (PDF). URL besoek op 25 Maart 2019.
- ↑ Leeder, Mike (2017). Sedimentology and Sedimentary Basins, From Turbulence to Tectonics (in Engels). Cram101 textbook reviews. ISBN 9781478415534. Geargiveer vanaf die oorspronklike (Google e-boek) op 28 Maart 2019. Besoek op 27 Maart 2019.
