Lionel Bowman

in Wikipedia, die vrye ensiklopedie
Lionel Bowman
GeboortenaamLionel Charles Bowman
Gebore11 Junie 1919
Koffiefontein
Sterf2006
Beroep(e)Konsertpianis, musiekdosent
InstrumenteKlavier

Lionel Bowman (1919–2006) was ’n Suid-Afrikaanse pianis en musiekdosent. Hy was die eerste Suid-Afrikaanse pianis wat al vyf van Beethoven se klavierkonserte as 'n eenheid uitvoer het. Van 1946 tot 1958 tree hy as konsertpianis saam met die vernaamste Westerse simfonie-orkeste op. In die tyd stel hy talle Suid-Afrikaanse komposisies aan internasionale gehore bekend. In 1999 stel hy die Lionel Bowman-Beethoven-prys in om die studie van uitvoerende musici aan die Universiteite van Stellenbosch en Kaapstad te ondersteun. Wallace Tate beskryf sy besondere klaviertegniek in The Magic Touch (2000).[1]

Lewensloop[wysig | wysig bron]

Lionel Charles Bowman is op 11 Junie 1919 in Koffiefontein gebore.[2] Hy het van jongs af 'n aanleg vir musiek openbaar en begin reeds op 9-jarige ouderdom met openbare optredes. Hy ontvang van 1928 tot 1937 musiekonderrig aan die Suid-Afrikaanse Musiekkollege in Kaapstad. In sy laaste jaar kry hy 'n beurs van die Universiteit van Suid-Afrika (UNISA) om aan die Royal Academy of Musiek in Londen (onder Vivian Langridge) te studeer.

Bowman wen 'n aantal klavierkompetisies en -pryse, onder meer die Roller-gedenkprys, Matthew Phillimore-prys en die Chappell Goue Medalje. In 1952 ontvang hy die Royal Academy se hoogste onderskeiding en word 'n vennoot van die Royal Academy of Music.

Tydens die Tweede Wêreldoorlog (1940-1944) was Bowman 'n klavier-dosent aan die Suid-Afrikaanse Musiekkollege en onderneem hy 'n aantal konserttoere deur Suid-Afrika. Hy het bekend geword vir sy Beethoven-vertonings en was die eerste Suid-Afrikaanse pianis wat al vyf van hierdie werke agtereenvolgens kon uitvoer. Hy het die Suid-Afrikaanse première van Prokofiëf se derde klavierkonsert aangebied, asook Da Falla se Nagte in die tuine van Spanje. Hy is voorts bekend vir die bekendstelling van die werke van Suid-Afrikaanse komponiste aan buitelandse gehore.

In 1946 keer hy na Londen terug, waar hy aktief as konsertpianis vir die volgende twaalf jaar sou optree. Hy tree vir die BBC in die Wigmore Hall, die Royal Albert Hall en die Royal Festival Hall op en onderneem toere na Frankryk, Nederland, Switserland, Skandinawië, Turkye, Israel, Australië, die VSA en 'n aantal Afrika-lande.

In 1958 word hy lektor aan die Universiteit Stellenbosch, 'n pos wat hy vir 26 jaar sou beklee. Hy sit sy internasionale optredes voort en word in 1976 tot mede-professor bevorder.

Op sy 80ste verjaardag (in 1999) stel hy die Lionel Bowman-Beethoven-prys by die Universiteite van Stellenbosch en Kaapstad in. Die eerste jaarlikse Lionel Bowman-Beethoven-kompetisie is in 2000 by hierdie instellings aangebied.

As gevolg van chroniese rugprobleme ontwikkel Bowman 'n spesiale klaviertegniek waarmee hy later geassosieer sou word. Hy is selfs as 'n besoekende professor na Australië genooi om hieroor te praat. 'n Boek oor sy metode, The Magic Touch, is in 2000 onder die outeurskap van Wallace Tate gepubliseer.

Bowman is in 2006 in die ouderdom van 87 oorlede. Die Bowman-versameling bestaan uit sy korrespondensie, foto's, bladmusiek en klankopnames. Dit beslaan 27 pamfletdose met ongeveer 120 klankopnames.

Sien ook[wysig | wysig bron]

Verwysings[wysig | wysig bron]

  1. HAT Taal-en-feitegids, Pearson, Desember 2013, ISBN 978-1-77578-243-8
  2. The life and career of South African pianist and teacher Lionel Bowman (1919–2006), deur John Zachariah Diutlwileng Ntsepe, Universiteit van Pretoria, 29 Maart 2010