Lothar Matthäus

Lothar Matthäus

Matthäus in 2019
Persoonlike inligting
Geboortedatum	21 Maart 1961 (1961-03-21)
Geboorteplek	Erlangen, Wes-Duitsland
Lengte	1,74 m
Speelposisie	Midelveldspeler, sweeper (libero)
Jeugloopbaan
1971–1979	1. FC Herzogenaurach
Seniorloopbaan*
Jare	Span	Kere†	(Doele)†
1978–1979	1. FC Herzogenaurach	22	(20)
1979–1984	Borussia Mönchengladbach	162	(36)
1984–1988	Bayern München	113	(57)
1988–1992	Inter Milaan	115	(40)
1992–2000	Bayern München	189	(28)
2000	MetroStars	16	(0)
2018	1. FC Herzogenaurach	1	(0)
Totaal		618	(181)
Nasionale span
1979	Wes-Duitsland o/18	9	(3)
1979–1983	Wes-Duitsland o/21	15	(2)
1979–1981	Wes-Duitsland B	4	(1)
1980–2000	Wes-Duitsland / Duitsland	150	(23)
Spanne bestuur
2001–2002	Rapid Wien
2002–2003	Partizan
2003–2006	Hongarye
2006	Atlético Paranaense
2006–2007	Red Bull Salzburg (assistent)
2008–2009	Maccabi Netanya
2010–2011	Bulgarië
* Kere vir seniorklub uitgedraf en doele is net vir die plaaslike liga.. † Kere uitgedraf (Doele).

Lothar Herbert Matthäus (Duitse uitspraak: [ˈloːtaʁ maˈtɛːʊs]; gebore 21 Maart 1961) is ’n Duitse voormalige sokkerspeler en afrigter. Hy was die kaptein van Wes-Duitsland toe hulle die 1990 FIFA Wêreldbeker gewen het, en hy het dieselfde jaar die Ballon d'Or ontvang. In 1991 is hy aangewys as die eerste FIFA Wêreldspeler van die Jaar, en hy bly tot dusver die enigste Duitser wat dié eer ontvang het. In 2020 is hy ook opgeneem in die Ballon d'Or Droomspan.

Matthäus was die eerste buitespeler – en tweede speler algeheel ná die Meksikaanse doelwagter Antonio Carbajal – wat aan vyf FIFA Wêreldbekertoernooie deelgeneem het (1982, 1986, 1990, 1994 en 1998); hy is steeds een van slegs ses manlike spelers wat dit reggekry het, saam met Antonio Carbajal, Rafael Márquez, Lionel Messi, Cristiano Ronaldo en Andrés Guardado. Hy het ook die Europese Kampioenskap gewen en aan die Europese Kampioenskappe van 1984, 1988 en 2000 deelgeneem. In 1999, op die ouderdom van 38, is Matthäus weer aangewys as Duitse Sokkerspeler van die Jaar, nadat hy dié toekenning reeds in 1990 gewen het.

Matthäus is die speler met die meeste wedstryde vir Duitsland ooit, met ’n totaal van 150 verskynings (waarvan 83 vir Wes-Duitsland) oor ’n loopbaan van 20 jaar, en hy het 23 doele aangeteken. Hy is ook ’n lid van die FIFA 100, ’n lys van die beste lewende sokkerspelers wat deur Pelé saamgestel is. Diego Maradona het van Matthäus gesê: "Hy is die beste teenstander wat ek ooit gehad het. Ek dink dit sê alles oor hom."

As ’n veelsydige en volledige speler word Matthäus beskou as een van die grootste middelvelders van alle tye. Hy was bekend vir sy presiese aangee, uitstekende posisionele spel, goed getyde duikslae, en kragtige skote. Gedurende sy loopbaan het hy meestal as ’n “box-to-box”-middelvelder gespeel, hoewel hy later as ’n sweeper (libero) opgetree het.

Ná sy spelersloopbaan was Matthäus hoofafrigter van verskeie klubs en nasionale spanne. Hy het ook as rubriekskrywer vir die tydskrif Sport Bild gewerk, en as sokkerkenner vir verskeie televisiekanele opgetree. In 2023 het he mede-eienaar van die Ghanese sokkerspan Accra Lions geword.

Matthäus is die vader van vier kinders en was al vyf keer getroud, dikwels met jonger vroue. In 2025, op 64-jarige ouderdom, is daar gerugte versprei dat hy in ’n verhouding was met ’n 26-jarige Instagram-model.