Loving Adults
| Loving Adults | |
|---|---|
| Regisseur | Barbara Topsøe-Rothenborg |
| Met | Dar Salim Sonja Richter |
| Uitgereik | 26 Augustus 2022 |
| Speeltyd | 104 minute |
| Land | Denemarke |
| Taal | Deens, oorgeklank in Engels |
| IMDb-profiel | |
 |
Loving Adults (Deens: Kærlighed for voksne, "Liefde vir Volwassenes") is 'n Deense riller en raaiselrolprent van 2022 wat deur Barbara Topsøe-Rothenborg geregisseer is.[1][2] Die fyn lyn tussen liefde en haat raak dodelik toe 'n vrou uitvind haar man verkul haar – en albei tot uiterstes gaan om te kry wat hulle wil hê.[3] Die hoofrolle word deur Dar Salim en Sonja Richter vertolk.
Hoofakteurs
[wysig | wysig bron]- Dar Salim - Christian
- Sonja Richter - Leonora
- Sus Wilkins - Xenia
- Mikael Birkkjær - Polisiehoof
Storielyn
[wysig | wysig bron]'n Polisiekommissaris vertel vir sy dogter die storie van die getroude paartjie Christian en Leonora Holm. Christian werk as 'n kontrakteur saam met sy vriend Peter. Leonora is 'n huisvrou wat haar loopbaan as vioolspeler jare gelede uitgestel het ter wille van die paartjie se seun, Johan, wat eindelik in remissie is en binnekort met skool klaarmaak.
Een nag vieruur ontvang Christian 'n teksboodskap en beweer dit is van Peter. Toe Leonora daarop aandring om die boodskap te sien gooi Christian sy foon teen die muur stukkend. Leonora vermoed hy het 'n affair met Xenia, 'n jong argitek wat saam met hom aan 'n kontrak werk. Op 'n kantoorpartytjie sien Leonora hoe Christian en Xenia in sy kantoor seks het, terwl Xenia haar reguit in die oë kyk.
Toe Christian probeer om van Leonora te skei konfronteer sy hom oor die verhouding. Sy dring daarop aan dat hy die verhouding met Xenia verbreek, anders rapporteer sy hom aan die polisie oor die verduistering van geld van sy maatskappy om vir Johan se behandeling te betaal. Christian probeer meer van Leonora uitvind en hoor van haar ou vriende sy het 'n kêrel met die naam Mike gehad. Hy het een aand tydens 'n partytjie onder geheimsinnige omstandighede van 'n krans af geval.
Christian konfronteer Leonora tuis oor Mike en beskuldig haar daarvan dat sy Mike van die krans af gestamp het. 'n Woedende Leonora eis dat Christian vir Xenia bel en dadelik met haar opbreek. Toe hy dit nie wil doen nie, skop sy hom uit die huis. Christian wag daardie nag dat Leonora op haar gewone roete gaan draf en ry haar met die werk se paneelwa om. Tuis kom Leonora kort daarna terug en sê sy het 'n ander roete as gewoonlik gevolg. Christian is geskok toe hy besef hy het 'n ander vrou doodgery en maak asof hy met Xenia opgebreek het. Hy besluit om by Leonora te bly.
Nadat Johan met skool klaargemaak het, ignoreer Christian Xenia se boodskappe en oorweeg kortliks om hom aan die polisie oor te gee. Leonora vind uit Christian het die werk se paneelwa ná die tref-en-trapongeluk laat was, en sy besef hy wou háár daardie nag omry. Leonora probeer Christian aan die polisie uitlewer, maar hy oortuig die polisiekommissaris hy is onskuldig. Leonora laat Christian na 'n restaurant kom en onthul sy hét Mike destyds vermoor. Sy oefen druk op Christian uit om Xenia te vermoor, omdat sy glo hy sal haar nie wil vermoor as hy haar nie vir Xenia kan los nie.
Christian en Leonora boek in 'n spaoord in. Terwyl Christian uitsluip na Xenia, voorsien Leonora hom van 'n alibi deur sy stem voor 'n kelner oor 'n kassetspeler in die badkamer te speel. Sy stuur ook vir Xenia 'n teksboodskap van Christian se foon af waar hy kamtig hulle verhouding beëindig. Intussen maak Christian en Xenia op en hulle het seks. Daarna gaan Xenia na die badkamer, waar Leonora haar met 'n mes doodsteek; sy het korrek afgelei dat Christian Xenia nie sou kon vermoor nie.
Die polisiekommissaris en sy kollega vind uit Xenia se woonstel is skoon en Xenia word vermis. Hulle ondervra Christian en Leonora en Christian erken hy en Xenia het 'n verhouding gehad, maar Xenia het dit verbreek ná sy teksboodskap aan haar. Die kommissaris bespeur onraad en gelas dat polisiehonde die gebied deursoek. Op 'n Sint Johannesfees met 'n vreugevuur later die aand moedig Christian sy vriend Kim dringend aan om hom te help om die vuur voor die tyd aan te steek. Toe die polisiehonde daar aankom en vir die vuur begin blaf, besef die kommissaris Christian en Leonora moes Xenia se lyk in die vuur versteek het. Dit is egter ta laat om in te gyp. Toe die kommissaris die toneel verlaat, kyk Cristian en Leonora van ver af toe hoe die vuur Xenia se liggaam verbrand.
Aan die einde van die prent word onthul die polisiekommissaris het die verhaal voor sy dogter se troue aan haar vertel as 'n waarskuwing oor die huwelik. Iewers in 'n vreemde land gooi Christian intussen Xenia se bene in die water.
Verwysings
[wysig | wysig bron]- ↑ Keslassy, Elsa (6 Mei 2021). "Netflix Orders 'Loving Adults' as First Danish Film Original". Variety. Geargiveer vanaf die oorspronklike op 7 Desember 2023. Besoek op 7 Desember 2023.
- ↑ Felperin, Leslie (30 Augustus 2022). "'Loving Adults' review: Unpredictable and intense". New Indian Express. Besoek op 7 Desember 2023.
- ↑ "Loving Adults". Rotten Tomatoes. Fandango Media. Besoek op 19 Junie 2025.
Skakels
[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
