Mahjong solitaire

'n Mahjong solitaire-videospeletjie met die teëls in 'n skilpadformasie gerangskik.

Mahjong solitaire (ook bekend as Shanghai-solitaire, elektroniese of gerekenariseerde mahjong of bloot mahjong) is ’n passpeletjie vir enkelspelers wat ’n stel mahjongteëls gebruik eerder as speelkaarte. Dit word algemeen op ’n rekenaar of slimfoon gespeel, alhoewel dit ook met fisiese teëls gespeel kan word deur ’n spesiale houtraam te gebruik weens die lang opstelproses.

Alhoewel dit genoem is na mahjong, 'n teëlspeletjie vir vier spelers, is die spelmetode nie verwant nie.

Spel

Die 144 teëls word in vier lae gerangskik met hulle voorkante na bo. ’n Teël word as oop of blootgestel beskou indien dit óf links óf regs geskuif kan word sonder om ander teëls te versteur. Die doel is om oop pare identiese teëls te pas en dit van die bord te verwyder, waardeur die teëls daaronder vir spel blootgestel word. Die speletjie word gewen wanneer alle pare teëls van die bord verwyder is, en verloor indien die oorblywende teëls geen blootgestelde pare bevat nie.

Geskiedenis van die rekenaarspeletjie

Die oorspronklike rekenaar-speletjie soos vertoon op ’n PLATO-terminaal.

Die rekenaarspeletjie is oorspronklik in 1981 deur Brodie Lockard op die PLATO-stelsel geskep en is "Mah-Jongg" genoem, na die speletjie wat dieselfde teëls vir spel gebruik. Die rekenaarspeletjie is gratis uitgereik en is gespeel met behulp van ’n aanraakskerm. Die speletjiemaatskappy Activision het "Shanghai" in 1986 vir sekere platforms uitgereik. Dit is sedertdien na baie verskillende platforms oorgeplaas. Die naam “Shanghai” is deur Activision as ’n handelsmerk geregistreer.

Aangesien die speletjie op mahjongteëls gebaseer is, het daar verwarring ontstaan met die mahjongspeletjie vir vier spelers. Alhoewel die naam "mahjong solitaire" algemeen gebruik word, sluit ander name Die Skilpad, Shanghai Solitaire, Taipei en Kyodai in.

’n Weergawe van die speletjie is ook in 1990 in die Microsoft Entertainment Pack vir Windows onder die naam Taipei ingesluit. Windows 7 sluit ’n weergawe van die speletjie in wat bekend staan as Mahjong Titans. Verskillende weergawes van Mahjong solitaire kan ook op slimfone gespeel word.

Variasies

Mahjong solitaire word gewoonlik in elektroniese vorm as ’n rekenaar- of slimfoonspeletjie gespeel. Sommige elektroniese speletjies bied ekstra opsies, soos:

• Om die teëls te skommel;
• Om die teëlstel en patrone van die tradisionele teëls in blomme, juwele of ander voorwerpe te verander wat met ’n oogopslag makliker geëien kan word;
• Om ’n reeks verskillende uitlegte met wisselende moeilikheidsvlakke te speel (gewoonlik met Chineesagtige name soos "Die Os" of "Die Slang");
• Om “wildekaartteëls” en ander teëls by te voeg wat spesiale funksies het;
• Om meer pare by te voeg sodat 'n groter uitleg gemaak kan word. Soms is dit nuwe simbole, en soms is dit ekstra weergawes van gewone simbole; en
• Om ’n tydsbeperking by te voeg wat gebaseer is op die aantal teëls in die aanvanklike uitleg.

Mahjong solitaire kan óf alleen óf saam met ’n maat gespeel word. In laasgenoemde geval is die doel om die meeste pare te versamel, om die laaste persoon te wees wat ’n paar pas, of om die meeste punte aan te teken. Punte word verdien vir elke paar wat verwyder word, met bonuspunte vir die verwydering van ooreenstemmende pare in volgorde of vir die verwydering van pare in volgorde wat deel van stelle is. Wanneer tradisionele mahjongteëls gebruik word, sluit die stelle die drake, die blomme, die seisoene en die winde in.

Sommige weergawes bied die opsie om die teëls te skommel wanneer daar geen blootgestelde pare meer oor is nie, wat dit byna altyd moontlik maak vir die speler om die speletjie te voltooi. Baie weergawes bied ’n herstelfunksie, en byna alle weergawes sal nie ’n bord genereer wat nie gewen kan word nie.

Sien ook

• Klondike

Skakels

• Hierdie artikel is in sy geheel of gedeeltelik uit die Engelse Wikipedia vertaal.