Malcolm Retief

in Wikipedia, die vrye ensiklopedie
Jump to navigation Jump to search
Dr. Malcolm Retief.

Dr. Malcolm Wilhelm Retief (Knysna, Kaapkolonie, 21 Junie 19048 September 1990) was ’n predikant in die Nederduitse Gereformeerde Kerk en ’n skrywer van boeke oor godsdiens, onder die skrywersnaam dr. M.W. Retief.

Herkoms en opleiding[wysig | wysig bron]

Ds. Retief se gesin in 1911 op die stoep van die ou pastorie van die NG gemeente Joubertina afgeneem. Ds. P.J. Retief staan agter in die middel met die donker pak. Sy eerste vrou, Frances Elizabeth Christina (née Kotzé), sit links van die pilaar. Hul seuns is Renaldo (links), Adelbert (middel) en Malcolm (regs voor). Hul dogter, Monica hou die pop vas. C.X. Lötz staan heel regs en klein Gielie Bokkie Olivier sit op die trap regs van Adelbert. Die twee ander volwasse vroue se name word nie in die bron vermeld nie.

Dr. Retief was een van die ses kinders van ds. Petrus Jacobus Retief en sy vrou, Frances Elizabeth Christina Kotzé. Ten tyde van sy geboorte was sy vader predikant van die NG gemeente Knysna (1900–'08). Hy het grootgeword op Joubertina, waar ds. P.J. Retief predikant van die plaaslike NG gemeente was van 1908 tot sy vertrek na die NG gemeente Alexandria in 1921. Op Joubertina het Malcolm Retief sy juniorsertifikaateksamen afgelê en gaan daarna na die Hoër Jongenskool op Stellenbosch (nou die Paul Roos Gimnasium), waar hy matrikuleer. Hy het hom in 1923 as student aan die Universiteit Stellenbosch laat inskryf, behaal die B.A.-graad en gaan in 1926 na die Kweekskool. Nadat hy die kandidaatseksamen afgelê het, vertrek hy in 1928 na Princeton in die VSA. Gedurende vakansietye het hy lang reise deur Amerika onderneem. In April 1930 het hy sy doktorsgraad in die teologie behaal en is toe gelegitimeer as predikant in die NG Kerk.

Kerklike loopbaan[wysig | wysig bron]

Dr. Retief se eerste standplaas ná sy terugkeer na Afrika was die sendinggemeente Madzimoyo by Chipata in Noord-Rhodesië wat bedryf is deur die NG Kerk in die Oranje-Vrystaat. Hy het net agt maande op die sendingstasie gewerk, waarna hy die eerste leraar van die NG gemeente Nkana, ook in Noord-Rhodesië, geword het. Hy was die eerste leraar van die kopermyne. Die uitgestrekte werkkring met sy veelsydige probleme het besondere eise aan die leraar gestel. Sy huis was dikwels as 't ware net 'n kuierplek omdat hy soms tot ses weke op 'n keer besig was om nagmaal elders te bedien, selfs tot in Elizabethville in die Kongo. Ná nege jaar se moedige, vasbeslote bediening het Retief en sy vrou terug Suid-Afrika toe verhuis. In Junie 1943 is hy in die NG gemeente Breyten in die destydse Oos-Transvaal bevestig. Ná vier jaar het hy ’n betrekking by die SA Bybelvereniging aanvaar, maar net ’n jaar later die beroep aangeneem na die NG gemeente Daspoort in die weste van Pretoria. In 1963 het hy organiserende sekretaris van die Christelike Polisie- en Gevangenisdiensvereniging geword, maar in 1966 ’n beroep aangeneem na sy laaste gemeente, Westdene. Skaars vier jaar later, in Januarie 1970, het hy aldaar sy emeritaat aanvaar.

Skryfwerk[wysig | wysig bron]

Dr. Retief het godsdienstige werke, soos Maak my lewend na u Woord (1940), Lig en skaduwee (1946) en Terug tot God (1943) geskryf. Ander werke sluit in Verowerings vir Christus (1948, oor die lewe van dr. W.H. Murray) en Herlewings in ons geskiedenis (1951). Verowerings vir Christus het ook in Engels verskyn, as William Murray of Nyasaland (1958).[1]

Gesinslewe[wysig | wysig bron]

Dr. Retief was getroud met Jemima Louw (13 Desember 1905 – 3 November 1999), ’n dogter van ds. Andrew Louw (1862–1956), 'n baanbrekersendeling van die Nederduitse Gereformeerde Kerk, veral op die sendingstasie Morgenster in die destydse Suid-Rhodesië. Ds. Louw se moeder, ook Jemima (1836–1904), was een van die vier dogters van ds. Andrew Murray sr. van die NG gemeente Graaff-Reinet wat met 'n predikant getrou het. Van haar ses broers wat volwassenheid bereik het, het vyf predikant in die NG Kerk geword: John, Andrew, William, George en Charles.

Bronne[wysig | wysig bron]

Verwysings[wysig | wysig bron]

  1. (en) Die boek te koop op abebooks.com. URL besoek op 31 Julie 2016.