Marco Polo (speletjie)

in Wikipedia, die vrye ensiklopedie

Die speletjie Marco Polo i/ˈmɑːrk ˈpl/ is 'n vorm van die speletjie frot of aan-aan wat in 'n swembad[1] gespeel word. Die oorsprong van die speletjie is onbekend.[2]

Reëls[wysig | wysig bron]

Een speler word as "frot" of "aan" gekies. Dié speler maak sy of haar oë toe en moet die ander spelers raak sonder om sy of haar sig te gebruik. Die speler wat "aan" is, skree "Marco" en die ander spelers moet reageer deur "Polo" uit te roep, wat die een wat "aan" is gebruik om hulle met gehoor te probeer opspoor. As 'n speler geraak word, word daardie speler "aan". [3]

Die spel kan ook op die grond gespeel word, met effens ander reëls, of kan gespeel word met die toevoeging van reëls van vis op droë grond en ander. Dit is soortgelyk aan blindemol, waar een persoon geblinddoek word, terwyl die ander wegkruipplekke in die kamer kies.

Geskiedenis[wysig | wysig bron]

Die speletjie het dieselfde naam as die 13de-eeuse Venesiaanse ontdekkingsreisiger Marco Polo,[4] en "volgens oorlewering het die beroemde ontdekkingsreisiger nie 'n idee gehad waarheen hy op pad was nie, net soos die persoon wat 'aan' is".[5] WiseGeek skryf: "Dit lyk of niemand weet wat die oorsprong van die naam is nie, hoewel daar 'n aantal ongeloofwaardige stories is." Die webwerf skryf ook: "Dit lyk nie of daar 'n werklike verband tussen die speletjie Marco Polo is en die ontdekkingsreisiger met dieselfde naam nie, ondanks kreatiewe pogings deur party mense, en dit is moeilik om te bepaal wanneer die speletjie Marco Polo die eerste keer gespeel is."[6] Die speletjie toon ooreenkomste met blindemol (basies dieselfde speletjie wat op die grond gespeel word) en kan as 'n uitvloeisel daarvan beskou word. WiseGeek skryf: "Blindemol dateer van ten minste die 16de eeu, en dit was eens 'n baie gewilde huisspeletjie, veral onder vroue.[6] Teen die 1960's was Marco Polo bekend as 'n waterspeletjie. Tussen 1965 en 1970 het party deelnemers aan 'n opname van Dictionary of American Regional English "Marco Polo" geantwoord toe hulle gevra is om 'n spel te noem wat mens in die water speel.[7]

Hoewel waterpolo in daardie stadium 'n ander gewilde swembadspel was, het die naam van die speletjie "Marco Polo" blykbaar niks daarmee te doen nie.

Deesdae word Marco Polo wêreldwyd gespeel. Verskeie streke het hul eie weergawes van die spel,[6] met name soos meermin op die rotse en krokodil. Die term "marco polo-spel" word soms gebruik om 'n aanlyn spel te beskryf waar 'n soortgelyke roep-en-antwoord-stelsel van speel gebruik word.

Ontleding[wysig | wysig bron]

Marco Polo is 'n speletjie wat "maklik aangepas" kan word, en is gegrond op die idee van roep-en-antwoord. Marco Polo is 'n plek-gebaseerde speletjie omdat spelers beperk is tot 'n bepaalde plek en omdat spelers mekaar moet opspoor deur gehoorwenke te gebruik. Die Encyclopedia of Play in Today's Society meen "daar is 'n bipolariteit in die omkeer van rolle... daar is herhaalde aksies, 'n roetine wat herhaal moet word, reëls waarby gehou moet word en verbale tekens om te gebruik". Wanneer kinders die speletjie speel, stel dit hulle in staat om met verskillende sosiale rolle te eksperimenteer, byvoorbeeld deur te leer wat dit beteken om 'n uitgeworpene te wees in die rol van "frot" (geïsoleerd, beperk tot 'n sekere ruimte en nie in staat om ander te sien nie). Die Nevada-streeksmediesesentrum sê: "Marco Polo is nie net pret nie, dit kan ook 'n goeie oefensessie wees. Dit plaas ook minder stres op jou bene en gewrigte omdat die water jou liggaam laat dryf."

Verwysings[wysig | wysig bron]

  1. Bittarello, Maria Beatrice (2009).
  2. editor, Rodney P. Carlisle, general (2009).
  3. Jeffrey, Phillip; Mike Blackstock; Matthias Finke; Anthony Tang; Rodger Lea; Meghan Deutscher; Kento Miyaoku.
  4. "Marco Polo".
  5. "Marco Polo – Retroland" Geargiveer 13 September 2016 op Wayback Machine.
  6. 6,0 6,1 6,2 "What Is the Game Marco Polo?". wiseGEEK.
  7. Games Played In The Water Dictionary of American Regional English Survey.