Gaan na inhoud

Marion Donovan

in Wikipedia, die vrye ensiklopedie
Patent US 4,169,534 van Marion Donovan van 'n klerehanger.

Marion O'Brien Donovan (15 Oktober 1917 – 4 November 1998) was 'n Amerikaanse uitvinder en entrepreneur. Sy word erken as een van die era se mees prominente vroulike uitvinders,[1] en het altesaam 20 patente vir haar skeppings verkry. In 1946 het sy 'n herbruikbare, ondeurdringbare luierbedekking geskep wat in babadoeke gebruik is. Uiteindelik het dit gelei tot die uitvinding van die weggooibare doeke, wat toe deur Victor Mills, die skepper van Pampers, gekommersialiseer is.[2] Donovan het ook verskeie ander oplossings vir huishoudings ontwikkel en is in 2015 in die National Inventors Hall of Fame opgeneem.[2][3][4]

Vroeë lewe en opvoeding

[wysig | wysig bron]

Donovan is op 15 Oktober 1917 in South Bend, Indiana, gebore,[5] as kind van Anne en Miles O'Brien.[6] Na die dood van haar moeder in 1925, is Donovan deur haar vader grootgemaak. Saam met sy identiese tweelingbroer, John, het Miles O'Brien die South Bend Lathe Works-vervaardigingsaanleg bestuur.[7] Donovan se vader en oom was ook uitvinders, wat erken word vir die uitvinding van produkte soos die "South Bend-draaibank " wat vir die vervaardiging van motorratte en geweerlope aangewend is.[8] Donovan het die meeste van haar vrye tyd in hul vervaardigingsaanleg deurgebring, waar sy die basiese beginsels van masjinerie en ingenieurswese onder die knie gekry het. Haar vader het haar as kind selfs gehelp om haar heel eerste uitvinding, naamlik 'n tandepoeier, te vervaardig.[9]

Op die ouderdom van 22 het Donovan haar BA in Engels aan Rosemont College in Pennsilvanië verwerf. Negentien jaar later, as een van die drie vroue in haar gradeplegtigheidsklas, het Donovan 'n meestersgraad in argitektuur aan die Yale-universiteit verwerf.[10]

Na afloop van haar graduering is Donovan as assistent-skoonheidsredakteur by Vogue-tydskrif in New York aangestel.[11] Later het sy bedank om 'n gesin met leerinvoerder James F. Donovan te begin, en het sy na Westport, Connecticut, verhuis.[12] Sy het drie kinders saam met Donovan gehad (Christine Donovan, Sharon Dodd Donovan en James F. Donovan).[13] Sy het in die 1970's van Donovan geskei en is in 1981 met John F. Butler getroud.[14]

Uitvinding van die "Boater"

[wysig | wysig bron]

Moederskap het vir Donovan 'n goeie rede gegee om die innoverende instinkte van haar eie kinderjare weer te herleef. Weens die frustrasies met die herhalende take om haar dogters se lapdoeke, klere en beddegoed gedurig te moet ruil, het Donovan gewonder of sy moontlik 'n meer praktiese oplossing kon skep om luier-of doeklekkasie te voorkom.[15]

Sy het in haar solder met verskeie materiale begin eksperimenteer en dit het haar uiteindelik daartoe gelei om 'n liggewig stortgordyn te hergebruik om 'n waterdigte luierbedekking te maak.[16] Sy het hierdie uitvinding die "Boater", oftewel "bootvaarder", genoem, want dit help babas om "drywend te bly".[17] Hierdie ontwerp het korte mette van die standaard rubberbroeke van die era gemaak, deur asemhalende, maar lekbestande materiaal te gebruik. Hierdie ontwerp het ook drukknope in plaas van veiligheidspelde toegelaat, wat die risiko van toevallige prikke verminder het.[18] Hierdie verbeterings het ook nie die baba vasgeknyp nie. Die ontwerp het 'n sakkie vir die luierinsetsel geskep, wat die nat luier van die baba weggehou het. Die finale produk is eintlik van nylon-valskermdoek gemaak, aangesien die materiaal die baba se vel toegelaat het om asem te haal.[19] Toe Donovan probeer het om die "Boater" aan topvervaardigers te verkoop, is dit egter verwerp. As gevolg hiervan het sy self met vervaardiging begin.

Die debuut van die doeke-oortreksels het in 1949 by Saks Fifth Avenue in New York plaasgevind. Dit was 'n onmiddellike treffer. Winkelbestuurders kon nie voorbly met genoeg voorraad op die rakke nie.[20] Verkope het toegeneem, en 'n sterk markvraag na 'n produk wat wasgoedladings betekenisvol verminder het en babahigiëne verbeter het, is geskep.[21]

Donovan se patent is in 1951 toegestaan. In dieselfde jaar het sy haar maatskappy en die gepaardgaande regte aan Keko Corp vir $1 miljoen verkoop. Sy het intussen 'n nuwe idee ontwikkel, benewens haar aanvanklike waterdigte lapdoekoortreksels. Dit was 'n selfs meer noodsaaklike innovasie: die weggooibare papierdoek. Sy moes 'n spesiale tipe papier vervaardig wat nie net sterk en absorberend was nie, maar wat ook water van die baba se vel weggehou het om sodoende enige uitslag te voorkom. Na heelwat eksperimentering het Donovan 'n weggooibare doek ontwerp wat daarop gemik was om die probleem van lekkende doeke selfs verder op te los.[22][23][24]

Donovan het egter nie onmiddellike sukses met haar innovasie behaal nie. Sy het haar finale produk na elke groot vervaardiger in die land geneem, maar niemand het belanggestel nie. Sy is deur Amerikaanse papiermaatskappye uitgelag omdat sy so 'n 'onnodige' en 'onpraktiese' item voorgestel het.[25] Dit was eers 'n dekade later, in 1961, dat Victor Mills, skepper van Pampers doeke, op Donovan se idee gekapitaliseer het om volledig weggooibare en meer absorberende doeke te vervaardig. Vandag word beraam dat 95% van babas in die VSA weggooibare doeke dra.[9][26][27]

Intussen het Donovan teruggekeer universiteit toe om argitektuur te studeer. Sy het beweer dat sy "nog altyd 'n argitek wou wees", aangesien sy gefassineer was deur struktuur. Sy het in 1958 'n graad in argitektuur aan Yale-universiteit verwerf. Sy was een van slegs drie vroue in haar gradeplegtigheidsklas. Donovan het daarna haar eie huis in Greenwich, Connecticut, in 1981 ontwerp.[28][29]

Tussen die jare 1951 en 1996 het Donovan 20 patente verkry. Die uitvindings was daarop gemik om praktiese probleme in die huis aan te spreek. Die uitvindings was ondermeer 'n sneesdoekieboks (1953), 'n handdoekhouer (1957), 'n sykoushakie (1962), 'n storingsboks (1966), 'n kasorganiseerder (1979), 'n seepbakkie, die "Zippity-Do", 'n elastiese koord wat oor die skouer aan die ritssluiter agteraan 'n rok gekoppel is, en die DentaLoop, 'n flosproduk wat sy, soos haar waterdigte doeke, self gemaak en bemark het.[20]

Donovan het bewys dat huishoudelike omgewings ruimtes vir innovasie kan wees, deur haar huis as haar laboratorium en huishoudelike items as haar materiale te gebruik. Sy het algemene uitdagings in haar lewe raakgesien en daardie insigte gebruik om beter oplossings vir andere te vind, met verskeie van haar uitvindings wat veral op vroue gemik is.[17][30]

Afsterwe

[wysig | wysig bron]

Donovan is op 81-jarige ouderdom op 4 November 1998 in die Lenox Hill-hospitaal in Manhattan aan hartkwale oorlede.[31]

Eerbewyse

[wysig | wysig bron]

Donovan is in Mei 2015 verkies tot die National Inventors Hall of Fame. Daar is 'n foto van haar op die muur van die Hall of Fame.[32]

Bronnelys

[wysig | wysig bron]
  • Busch-Vishniac, Ilene; Busch, Lauren; Tietjen, Jill (2024). "Chapter 15. Marion Donovan". Women in the National Inventors Hall of Fame: The First 50 Years. Springer Nature. ISBN 9783031755255.

Verwysings

[wysig | wysig bron]
  1. ↑ Matchar, Emily. "Meet Marion Donovan, the Mother Who Invented a Precursor to the Disposable Diaper". Smithsonian Magazine (in Engels). Geargiveer vanaf die oorspronklike op 31 Julie 2021. Besoek op 31 Julie 2021.
  2. 1 2 "Marion Donovan | Lemelson". lemelson.mit.edu. Geargiveer vanaf die oorspronklike op 15 Julie 2021. Besoek op 31 Julie 2021.
  3. ↑ "National Inventors Hall of Fame Inductee Marion Donovan, Who Invented Diapers". invent.org (in Engels). Geargiveer vanaf die oorspronklike op 27 Januarie 2021. Besoek op 6 April 2021.
  4. ↑ "Marion Donovan (1917–1998), Inventor of the Disposable Diaper". America Comes Alive (in Engels). 7 Maart 2013. Geargiveer vanaf die oorspronklike op 24 Junie 2021. Besoek op 6 April 2021.
  5. ↑ Matchar, Emily. "Meet Marion Donovan, the Mother Who Invented a Precursor to the Disposable Diaper". Smithsonian Magazine (in Engels). Besoek op 12 Mei 2026.
  6. ↑ "Papers Illustrate Woman Inventor's Life and Work". Lemelson Center for the Study of Invention and Innovation (in Engels). 1 Julie 2000. Besoek op 5 Desember 2023.
  7. ↑ "Lemelson Center: Article: First Papers of a Woman Inventor Acquired by Archives Center". Invention.smithsonian.org. Geargiveer vanaf die oorspronklike op 11 Maart 2010. Besoek op 24 Februarie 2010.
  8. ↑ "Marion Donovan: Inventor of Disposable Diapers". women-inventors.com. Geargiveer vanaf die oorspronklike op 27 April 2021. Besoek op 6 Desember 2021.
  9. 1 2 "Marion Donovan". National Inventors Hall of Fame. Besoek op 6 April 2026.
  10. ↑ Macaulay, Susan. "Marion Donovan (Inventor/Entrepreneur)". amazingwomenrock.com (in Engels). Besoek op 12 Mei 2026.
  11. ↑ "Marion Donovan | Lemelson". lemelson.mit.edu. Besoek op 12 Mei 2026.
  12. ↑ Hall, Sharon (22 September 2014). "Mothers of Invention: Marion Donovan (Disposable Diapers)". Digging History (in Canadian English). Besoek op 12 Mei 2026.
  13. ↑ Kelly, Kate (7 Maart 2013). "Marion Donovan (1917-1998), Inventor of the Disposable Diaper". America Comes Alive (in Engels). Besoek op 12 Mei 2026.
  14. ↑ Macaulay, Susan. "Marion Donovan (Inventor/Entrepreneur)". amazingwomenrock.com (in Engels). Besoek op 12 Mei 2026.
  15. ↑ Hall, Sharon (22 September 2014). "Mothers of Invention: Marion Donovan (Disposable Diapers)". Digging History (in Engels). Besoek op 12 Mei 2026.
  16. ↑ "Papers Illustrate Woman Inventor's Life and Work | Lemelson". invention.si.edu (in Engels). Besoek op 12 Mei 2026.
  17. 1 2 "Marion Donovan Disposable Diaper". Lemelson-Mit. Besoek op 6 April 2026.
  18. ↑ Laskow, Sarah (14 Oktober 2014). "The Woman Who Invented Disposable Diapers". The Atlantic (in Engels). Besoek op 12 Mei 2026.
  19. ↑ "Marion Donovan | Discovering Women Scientists" (in Engels). Besoek op 12 Mei 2026.
  20. 1 2 Heather, Satrom. "Papers Illustrate Woman Inventor's Life and Work". Smithsonian. Besoek op 6 April 2026.
  21. ↑ "Marion Donovan: The National Inventors Hall of Fame®". www.invent.org (in Engels). 11 Mei 2026. Besoek op 12 Mei 2026.
  22. ↑ "The Fascinating History Of Cloth To Disposable Diapers". www.allaboutclothdiapers.com (in American English). 29 Oktober 2013. Besoek op 12 Mei 2026.
  23. ↑ Inventors, Women; Resources, Inventor; FAQ, Inventors; Inventors, Women; Resources, Inventor; FAQ, Inventors; Inventors, Women; Resources, Inventor; FAQ, Inventors. "Marion Donovan: Inventor of Disposable Diapers". Women Inventors (in Engels). Besoek op 12 Mei 2026.
  24. ↑ Mathews, Jo Ann (25 April 2024). "Women and Adversity: Marion Donovan Inventor of Disposable Diapers". Jo Ann Mathews (in Engels). Besoek op 12 Mei 2026.
  25. ↑ "Marion Donovan | Discovering Women Scientists" (in Engels). Besoek op 12 Mei 2026.
  26. ↑ "Marion Donovan: The Innovator Behind the Disposable Diaper". revistalevel.com.co (in Spaans). Besoek op 12 Mei 2026.
  27. ↑ Digital, M. R. S. (19 April 2024). "Unravelling The Environmental Legacy Of Baby Nappies". Water Babies Ireland (in Engels). Besoek op 12 Mei 2026.
  28. ↑ "women inventors Archives". New England Historical Society (in Engels). Besoek op 12 Mei 2026.
  29. ↑ "Engineering Diapers | The Engines of Our Ingenuity". engines.egr.uh.edu (in Engels). Besoek op 12 Mei 2026.
  30. ↑ Digital, M. R. S. (19 April 2024). "Unravelling The Environmental Legacy Of Baby Nappies". Water Babies Ireland (in Engels). Besoek op 12 Mei 2026.
  31. ↑ Mcg, Robert (18 November 1998). "Marion Donovan, 81, Solver Of the Damp-Diaper Problem – Obituary; Biography". The New York Times. Geargiveer vanaf die oorspronklike op 9 Maart 2014. Besoek op 24 Februarie 2010.
  32. ↑ "Marion Donovan: Mother, Inventor, Visionary | National Inventors Hall of Fame®". www.invent.org (in Engels). 11 Mei 2026. Besoek op 12 Mei 2026.
Ontsluit van "https://af.wikipedia.org/w/index.php?title=Marion_Donovan&oldid=2909565"