Gaan na inhoud

Marriage Story

in Wikipedia, die vrye ensiklopedie
Marriage Story
Regisseur Noah Baumbach
Vervaardiger
  • David Heyman
  • Noah Baumbach
Draaiboek Noah Baumbach
Met
Musiek deur Randy Newman[1]
Kinematografie Robbie Ryan
Ateljee Heyday Films
Verspreider Netflix
Uitgereik 29 Augustus 2019 (2019-08-29) (76ste Venesiese Rolprentfees)
Speeltyd 137 minute[2]
Land
Taal Engels
IMDb-profiel
Scarlett Johansson
Adam Driver

Marriage Story is 'n drama van 2019 vir televisie wat deur Noah Baumbach geskryf en geregiseer is. Baumbach en David Heyman was die vervaardigers. Die hoofrolspelers is Scarlett Johansson en Adam Driver, wat die rolle vertolk van 'n egpaar wat deur 'n egskeiding gaan wat gekompliseer word deur 'n gestry oor toesig oor hulle seun. Ook in die prent is Laura Dern, Alan Alda, Ray Liotta, Julie Hagerty en Merritt Wever.

Die prent is tussen Januarie en April 2018 in New York en Los Angeles geskiet. Netflix het dit uitgereik ná die première op 29 Augustus 2019 op die Internasionale Venesiese Rolprentfees.

Marriage Story het groot lof gekry, veral vir Baumbach se regie en draaiboek, asook die toneelspel van Johansson, Driver en Dern. Dit is vir ses Oscars benoem vir die 92ste Oscar-toekenningsaand, onder andere vir beste rolprent, beste akteur (Driver), beste aktrise (Johansson), beste oorspronklike draaiboek en beste musiek. Dern het vir haar spel 'n Oscar, Golden Globe, Screen Actors Guild Award, Bafta en Critics' Choice Movie Award gewen vir beste vroulike byspeler.

Storielyn

[wysig | wysig bron]

Bederwingswaarskuwing: Die storielyn en/of storie se einde volg hieronder.

Charlie Barber, 'n suksesvolle teaterregisseur in New York met sy eie teatergeselskap, beplan 'n toneelstuk met, soos gewoonlik, sy vrou van 10 jaar, Nicole, in die hoofrol. Sy is 'n voormalige tieneraktrise. Die egpaar ondervind huweliksprobleme en gaan spreek 'n berader, wat voorstel hulle skryf alles neer waaroor hulle dol is oor mekaar. Nicole is egter te verleë om haar lys hardop te lees en hulle besluit om die berading te beëindig.

Toe Nicole 'n rol in 'n televisieloodsprogram in Los Angeles kry, besluit sy om Charlie te verlaat en in Kalifornië by haar ma te gaan woon en hulle seun, Henry, saam met haar te neem. Charlie dink dit is 'n tydelike reëling en hy bly in New York agter, want sy toneelstuk gaan na Broadway verskuif. Hulle besluit om op vriendskaplike voet uitmekaar te gaan, sonder prokureurs, maar Nicole word deur haar vervaardiger aangeraai om Nora Fanshaw, 'n hoëprofielgesinsprokureur, in diens te neem en sy laat Nicole haar hart uitpraat oor hoe sy gevoel het Charlie verwaarloos haar en hoe hy haar idees en begeertes verwerp.

Charlie is opgewonde daaroor dat hy 'n MacArthur-genoot gaan word en besoek Nicole se familie in LA, waar sy die skeidokumente oor hom oorhandig. Hy gaan spreek Jay Marotta, 'n vrypostige en duur prokureur wat Charlie aanbeveel om vuil te baklei, maar Charlie huur 'n empatiese en ouer prokureur, Bert, wat 'n beskaafde benadering verkies.

Met Halloween, toe Charlie in LA is, noem Henry dat Nicole permanent in Kalifornië wil bly. Bert raai hom aan om 'n woonstel in LA te kry om die toesigsaak te bevorder. Om die hof te probeer vermy, ontmoet Bert en Charlie vir Nora en Nicole. Eindelik dank Charlie vir Bert af en huur Jay. In die hof vlieg beskuldigings heen en weer, maar buite die hof probeer Nicole en Charlie vriendelik bly en bsluit hulle om tyd met Henry te deel. Die egpaar besluit om die saak buite die hof te skik. Die hare waai egter weer, totdat hulle tot besinning kom en besluit om die skeisaak af te handel.

Laura Dern
Alan Alda
Ray Liotta
Julie Hagerty

Die volgende Halloween kom Charlie weer na LA. Hy vind uit Nicole het 'n nuwe kêrel en is benoem vir 'n Emmy vir die regie van haar televisiereeks. Hy sê vir haar hy gaan aan die Univrsiteit van LA studeer en gaan dus 'n ruk in Los Angeles woon. Terwyl almal hulle kostuums aantrek, kry Charlie vir Henry waar hy die lys met dinge lees wat Nicole geskryf het oor waarvan sy van hom hou. Henry vra Charlie om die res hardop vir hom voor te lees. Charlie raak emosioneel terwyl Nicole ongesiens van die deur af toekyk.

Nicole bied later die aand aan dat Charlie vir Henry huis toe neem, al is dit haar aand met hom. Sy merk op Charlie se skoenveter is los en omdat hy Henry in sy arms hou, maak sy dit vir hom vas voordat hy vertrek.

Hoofakteurs

[wysig | wysig bron]

Ontvangs

[wysig | wysig bron]

Op Rotten Tomatoes was 95% van 405 resensies positief, met 'n gemiddelde punt van 8,8/10. Die webtuiste se konsensus lui: "Die kragtige Marriage Story met sy uitmuntende toneelspel tel onder die skrywer-regisseur Noah Baumbach se beste werke."[5] Op Metacritic het die fliek 94 uit 100 gekry, gebaseer op 53 resensies, wat dui op 'n "algemeen gunstige" ontvangs.[6]

Owen Gleiberman van Variety het oor die prent geskryf: “Dit is terselfdertyd snaaks, roskammend en aangrypend, en die vertonings is ongelooflike skerp en menslik. Dit is die werk van ’n groot rolprentkunstenaar – een wat wys dat hy die lewe in al sy emosionele detail en kompleksiteit kan vasvang en in die proses ’n skerpsnydende uitspraak maak oor hoe ons samelewing vandag funksioneer.”[7] Alonso Duralde van TheWrap prys die spel en Baumbach se draaiboek en sê: “’n Mens wonder of Baumbach verwysings na Kramer vs Kramer (1979) of Two for the Road (1967) op die snykamervloer gelos het, maar hoe dit ook al sy, Marriage Story is ’n prent wat verdien om in hulle geselskap genoem te word. Dit is verwoestend, noodsaaklik en bestem om lank onthou te word nadat hierdie toekenningsiklus verby is.”[8]

In sy resensie vir The Hollywood Reporter stem Jon Frosch saam en skryf: “Ander Amerikaanse films oor egskeiding het dié verskynsel uitgebeeld – die regsproses wat die paartjie se gevoelens aandryf en vorm eerder as andersom – maar nie een het die krag en helderheid van dié een nie [...] Dit is ook snaaks en, wanneer jy dit die minste verwag (en dit die nodigste het), byna ondraaglik teer, grootliks danksy die sensasionele akteurs, wat die diepste, lewendigste en fyns ingestemde vertolkings van hulle loopbane lewer.”[9]

Pryse en benoemings

[wysig | wysig bron]

Marriage Story is deur die Amerikaanse Rolprentinstituut,[10] die National Board of Review[11] en die tydskrif Time[12] aangewys as een van die 10 beste flieks van die jaar. Dit het op die 77ste Golden Globe-toekenningsaand die meeste benoemings (6) ontvang, insluitend vir beste dramaprent. Dern het die prys vir beste vroulike byspeler gekry.[13][14]

Op die 25ste Critics' Choice Awards-toekenningsaand het dit agt benoemings gekry,[15] vir die Screen Actors Guild Awards drie benoemings (vir die toneelspel van Driver, Johansson en Dern),[16] vir die Baftas vyf[17] en vir die Oscars ses.[18] Dern het die Oscar vir beste vroulike byspeler gewen.[19] Time se jaarlikse lys van die beste toneelspel vir 2019 het Driver spel in die derde plek geplaas.[20]

Verwysings

[wysig | wysig bron]
  1. ↑ "Randy Newman Scoring Noah Baumbach's Next Feature | Film Music Reporter". Film Music Reporter. 17 Julie 2019. Geargiveer vanaf die oorspronklike op 18 Julie 2019. Besoek op 18 Julie 2019.
  2. ↑ "Marriage Story BBFC". British Board of Film Classification. Geargiveer vanaf die oorspronklike op 5 Februarie 2020. Besoek op 5 Februarie 2019.
  3. ↑ "Marriage Story - AFI Fest". American Film Institute. Geargiveer vanaf die oorspronklike op 22 Januarie 2020. Besoek op 6 Desember 2019.
  4. ↑ "Marriage Story (2019)". British Film Institute. Geargiveer vanaf die oorspronklike op 13 Januarie 2020. Besoek op 13 Januarie 2020.
  5. ↑ "Marriage Story". Rotten Tomatoes. Fandango Media. Besoek op 14 Februarie 2026.
  6. ↑ "Marriage Story". Metacritic. Fandom, Inc. Besoek op 14 Februarie 2026.
  7. ↑ Gleiberman, Owen (29 Augustus 2019). "Venice Film Review: Marriage Story". Variety. Geargiveer vanaf die oorspronklike op 5 September 2019. Besoek op 9 September 2019.
  8. ↑ Durande, Alonso (29 Augustus 2019). "'Marriage Story' Film Review: Scarlett Johansson and Adam Driver Break Apart in Noah Baumbach's Devastating Drama". TheWrap. Geargiveer vanaf die oorspronklike op 31 Augustus 2019. Besoek op 9 September 2019.
  9. ↑ Frosch, Jon (29 Augustus 2019). "Marriage Story: Film Review - Venice 2019". The Hollywood Reporter. Geargiveer vanaf die oorspronklike op 20 November 2019. Besoek op 11 April 2020.
  10. ↑ Neglia, Matt (4 Desember 2019). "The AFI Top 10 Films of 2019". Geargiveer vanaf die oorspronklike op 4 Desember 2019. Besoek op 4 Desember 2019.
  11. ↑ "National Board of Review 2019: 'The Irishman' Wins Best Film, Adam Sandler Named Best Actor". National Board of Review. 3 Desember 2019. Geargiveer vanaf die oorspronklike op 3 Desember 2019. Besoek op 3 Desember 2019.
  12. ↑ Zacharek, Stephanie (25 November 2019). "The 10 Best Movies of 2019". Time. Geargiveer vanaf die oorspronklike op 25 November 2019. Besoek op 3 Desember 2019.
  13. ↑ "Golden Globes 2020: Who got nominated? Here's the full list". USA Today. 9 Desember 2019. Geargiveer vanaf die oorspronklike op 9 Desember 2019. Besoek op 15 Desember 2019.
  14. ↑ Stolworthy, Jacob (6 Januarie 2020). "Golden Globes 2020 winners: The full list". The Independent. Geargiveer vanaf die oorspronklike op 27 Oktober 2020. Besoek op 6 Januarie 2020.
  15. ↑ Kiefer, Halle (8 Desember 2019). "Martin Scorsese's The Irishman Leads Critics' Choice Awards Nominations". Vulture. Geargiveer vanaf die oorspronklike op 9 Desember 2019. Besoek op 9 Desember 2019.
  16. ↑ "Nominations Announced For The 26Th Annual Screen Actors Guild Awards". 11 Desember 2019. Geargiveer vanaf die oorspronklike op 12 Desember 2019. Besoek op 11 Desember 2019.
  17. ↑ Tartaglione, Nancy (7 Januarie 2020). "BAFTA Film Awards Nominations: 'Joker', 'The Irishman', 'Once Upon A Time In Hollywood' Lead – Full List". Deadline Hollywood. Geargiveer vanaf die oorspronklike op 8 Januarie 2020. Besoek op 7 Januarie 2020.
  18. ↑ "Netflix gets the most Oscar nods of any studio, with Irishman and Marriage Story nominated for Best Picture". TechCrunch. 13 Januarie 2020. Geargiveer vanaf die oorspronklike op 3 Mei 2021. Besoek op 13 Januarie 2020.
  19. ↑ "Oscars 2020: The full winners list". Vox. 9 Februarie 2020. Geargiveer vanaf die oorspronklike op 10 Februarie 2020. Besoek op 10 Februarie 2020.
  20. ↑ Zacharek, Stephanie (26 November 2019). "The 10 Best Movie Performances of 2019". Time. Geargiveer vanaf die oorspronklike op 28 November 2019. Besoek op 28 November 2019.

Skakels

[wysig | wysig bron]
Ontsluit van "https://af.wikipedia.org/w/index.php?title=Marriage_Story&oldid=2877258"