Maurice Garcia

Maurice Garcia is in 1798 in ‘n Joodse gesin gebore en het in 1820 met 20 ander Britse Setlaars aan boord van die Dowson in Suid-Afrika aangekom. Garcia baan mettertyd sy weg na George waar hy op 25 Julie 1824 met die 15-jarige Anna Ludolphina Niepoth in die huwelik tree. Die egpaar het 10 kinders.

Gedurende 1828 word Garcia as tolk by die hof van landdros B.A. Wentzel aangestel. Toe die pos die volgende jaar afgeskaf word, wys Garcia ‘n betrekking as klerk van die vrederegter in Somerset-Wes van die hand. In Januarie 1830 word hy aangestel as die posmeester van George. In 1842 word hy die klerk van landdros J.W. van der Riet belas met die fondse vir die instandhouding van paaie, driwwe en brûe. In 1851 is hy ‘n direkteur van die spaarbank op George. In Januarie 1863 word hy die siviele kommissaris in Richmond (Kaap) en in September 1864 volg hy James Rose-Innes op as siviele kommissaris in Riversdal. In hierdie gemeenskap speel hy ‘n leidende rol. Sy grootste prestasie was die verkryging van die Garciapas. Louis Henry Meurant (beter bekend as Klaas Waarzegger) volg hom by sy aftrede op 22 Junie 1877 op. Garcia sterf in 1884 op Riversdal.

Bibliografie

• Friedman-Spits, Clara: Maurice Garcia - Jewish 1820 Settler. In: Lantern. Tydskrif vir Kuns, Kennnis en Kultuur. Jaargang 30, nr. 1, Desember 1980
• Pama, C.: Die Groot Afrikaanse Familienaamboek. Kaapstad: Human & Rousseau, 1983. ISBN 0-7981-1561-0
• van Wyk, Frans: Riversdal 150 jaar 1838-1988. Riversdal, 1988. ISBN 0-620-12490-3