Mendelssohn-versameling

in Wikipedia, die vrye ensiklopedie

Die Mendelssohn-versameling van Africana word gehuisves in die Parlementsbiblioteek in Kaapstad. Dit bestaan uit boeke, pamflette, landkaarte en honderde oorspronklike skilderye en tekeninge.

Biografie[wysig | wysig bron]

Sidney Mendelssohn is op 31 Desember 1860 in Exeter as seun van 'n rabbi gebore. In Suid-Afrika vestig hy hom as diamanthandelaar, word voorsitter van die New Bultfontein Mining Company en stigter, besturende direkteur en later voorsitter van die Vaal River Diamond Co. Op die vooraand van die Tweede Vryheidsoorlog begin hy belangstel in Africana en ontwikkel tot een van die voorste versamelaars en kenners op die gebied. Mendelssohn het vier boeke oor die geskiedenis van die Jodedom geskryf. In 1920 publiseer hy sy bekendste werk The Jews of Asia: especially in the 16th and 17th century. Die dorpie Sydney on Vaal is gebou op grond waarvan hy die eienaar was en daarom dra die dorpie na bewering sy naam. Hy is op 26 September 1917 in Londen oorlede.

South African Bibliography[wysig | wysig bron]

Elf jaar lank werk hy aan die South African Bibliography. Dit bevat meer as 9 000 noemenswaardige verwysings na Afrika vanaf die vroeë Portugese ontdekkers tot 1910. Die twee dele is in 1911 gepubliseer en word nog as een van die belangrikste werke in sy soort beskou en dit het 'n groot bydrae tot die kulturele ontwikkeling van Suider-Afrika gelewer.

Erflating[wysig | wysig bron]

In sy testament het hy sy hele Africana-versameling aan die volk van Suid-Afrika bemaak. Daaronder is 134 sketse deur Thomas William Bowler (1812–1869). Mendelssohn se wens was dat sy versameling na sy dood verder uitgebou sou word. Die staat het William Jardine (1867–1948) se Africana-bibiloteek aangekoop en by die Mendelssohn-versameling gevoeg.

Bibliografie[wysig | wysig bron]

  • Green, Lawrence G.: In the land of afternoon. Kaapstad: Howard Timmins, 1950
  • Standard Encyclopaedia of Southern Africa, deel 7. Kaapstad: Nasou, 1972
  • Wagener, F.J.: Africana. In: Lantern. Tydskrif vir Volksopvoeding. Jaargang 6, nr. 4, April 1957