Metroblitz

in Wikipedia, die vrye ensiklopedie
Jump to navigation Jump to search
Die MetroBlitz in die Johannesburg-stasie in September 1984.

Die Metroblitz was Suid-Afrika se eerste sneltreinpassasiersdiens wat in 1984 tussen Johannesburg en Pretoria begin loop het, maar later weer gestaak is. Die Suid-Afrikaanse Vervoerdienste het in die tagtigerjare verskillende prototipes voorstedelike treine getoets wat aan die plaaslike vereistes, veral die land se Kaapse spoor van 1 067 mm, aangepas is.

Die Suid-Afrikaanse ingenieur Dr. Herbert Scheffel het al vroeër die sogenaamde Scheffeldraaistel ontwerp wat die indiensstelling van sneltreine op die plaaslike Kaapse spoorwydte vir die eerste keer moontlik gemaak het. Die Metroblitz het in 'n toets 'n maksimumsnelheid van meer as 240 km/h behaal, terwyl die gereelde treindiens later teen 160 km/h geloop het. Vir die Metroblitz met sy kenmerkende grys en rooi lokomotief en agt passasierswaens, wat 480 passasiers kon vervoer, is spesiale luukse vliegtuigtipe-sitplekke ontwerp. Die lokomotief wat die Metroblitz getrek het was 'n Klas 12E-lokomotief.