Michael Halász

Michael Halász (* 21 Mei 1938 in Cluj-Napoca - ) is 'n Duits-Hongaarse dirigent.

Sy eerste optrede as dirigent was by die München Gärtnerplatztheater waar hy tussen 1972 en 1975 alle operetteproduksies gedirigeer het. In 1975 het hy na Frankfurt verhuis ten einde as Hoofkapellmeister saam met Christoph von Dohnányi te werk waar hy die belangrikste werke van die operarepertoire gedirigeer het. Verskeie aanstellings as gasdirigent het hierop gevolg, en in 1977 het Dohnányi hom as Hoofkapellmeister by die Staatsoper in Hamburg aangestel. Van 1978 tot 1991 was hy Algemene Musikale Direkteur van die Hagen Operahuis en in 1991 het hy die pos aanvaar van inwonende dirigent by die Weense Staatsopera.

Die Opera Newsreview het oor 'n opname van Beethoven se Fidelio wat deur Michael Halász vir die plaatetiket Naxos opgeneem is gesê, “One of the Top Ten Recordings of 2000...A terrific performance at any price.”

Michael Halász het vir Naxos opnames gemaak van o.a. werke deur Tsjaikofski (ballete), Wagner (opera-uittreksels) en simfonieë deur Beethoven, Schubert en Mahler, sowel as Rossini se ouvertures en twee volumes van Liszt se simfoniese gedigte; laasgenoemde is deur die Penguin-gids as “een van die suksesvolste versamelings van Liszt se simfoniese komposisies wat in onlangse jare verskyn het” genoem.

Behalwe vir die standaard- en suiwer orkestrale repertoire het hy ook Pergolesi se Stabat Mater en Orfeo, Mozart se Mis in C mineur en sy Kyrie in D mineur, Richard Strauss se Bourgeois Gentilhomme, Beethoven se Kreature van Prometheus), tjelloconcertos deur onderskeidelik Antonín Dvořák, Elgar, Dohnányi en Lalo, en Rubinstein se Vioolconcerto opgeneem, almal vir die Naxos plaatetiket.