Michael Laudrup

Michael Laudrup

Laudrup in 2016
Persoonlike inligting
Geboortenaam	Michael Laudrup
Geboortedatum	15 Junie 1964 (1964-06-15)
Geboorteplek	Frederiksberg, Denemarke
Lengte	1.83 m
Speelposisie	Aanvallende middelvelder, voorspeler
Jeugloopbaan
1971–1973	Vanløse
1973–1974	Brøndby
1974–1980	KB
Seniorloopbaan*
Jare	Span	Kere†	(Doele)†
1981	KB	14	(3)
1982–1983	Brøndby	38	(24)
1983–1985	Lazio	60	(9)
1985–1989	Juventus	103	(16)
1989–1994	Barcelona	166	(41)
1994–1996	Real Madrid	62	(12)
1996–1997	Vissel Kobe	15	(5)
1997–1998	Ajax	21	(11)
Totaal		478	(119)
Nasionale span
1982–1998	Denemarke	104	(37)
Spanne bestuur
2002–2006	Brøndby
2007–2008	Getafe
2008–2009	Spartak Moskou
2010–2011	Mallorca
2012–2014	Swansea City
2014–2015	Lekhwiya
2016–2018	Al Rayyan
* Kere vir seniorklub uitgedraf en doele is net vir die plaaslike liga.. † Kere uitgedraf (Doele).

Michael Laudrup (Deense uitspraak: [ˈmiˌkʰɛˀl ˈlɑwˀtʁɔp], gebore 15 Junie 1964) is ’n Deense professionele sokkerafrigter en voormalige speler. Bekend vir sy kalmte, passes, visie, tegniese vaardighede, balbeheer en dribbelvermoë, word Laudrup wyd beskou as een van die grootste middelveldspelers van alle tye. Hy is die ouer broer van die afgetrede sokkerspeler Brian Laudrup.

Tydens sy spelersloopbaan het Laudrup ligatitels gewen met Ajax, Barcelona, Real Madrid en Juventus. Hy het hoofsaaklik as ’n aanvallende middelvelder gespeel, hoewel hy ook in ander aanvallende posisies kon speel. In ’n era waarin hy as een van die beste sokkerspelers van sy generasie beskou is, het hy ’n sleutelrol gespeel in Johan Cruijff se “Dream Team”. By Barcelona het Laudrup altesaam nege trofeë gewen, insluitend vier opeenvolgende La Liga-titels van 1991 tot 1994, asook die Europese Beker in 1992. Hy het in 1994 na aartsmededingers Real Madrid geskuif, met wie hy sy vyfde agtereenvolgende La Liga-titel gewen het.

Laudrup het op sy 18de verjaarsdag in 1982 sy debuut vir die Deense nasionale span gemaak en 37 doele in 104 wedstryde aangeteken. Hy het uitgeblink tydens die 1986 FIFA Wêreldbeker, en vanaf November 1994 was hy kaptein van Denemarke vir 28 wedstryde, insluitend die oorwinning in die 1995 Konfederasiebeker-toernooi. Hy het saam met sy broer Brian in die span gespeel wat die kwarteindronde van die 1998 Wêreldbeker gehaal het, en het ná daardie toernooi as aktiewe speler afgetree.

In 1999 is Laudrup aangewys as die Beste Buitelandse Speler in Spaanse sokker oor die voorafgaande 25 jaar. In April 2000 is hy tot ridder geslaan en het hy die Orde van die Dannebrog ontvang. In November 2003 is hy tydens UEFA se Jubileumviering deur die Deense Sokkerunie aangewys as die Goue Speler van Denemarke, die uitstaande speler van die afgelope 50 jaar. In November 2006 is hy amptelik aangewys as die beste Deense sokkerspeler van alle tye deur die Deense Sokkerunie (DBU). Hy is ook deur Pelé ingesluit in die FIFA 100-lys van die wêreld se grootste lewende spelers tydens ’n FIFA-toekenningsgeleentheid in 2004. In April 2013 is hy deur Marca-lesers opgeneem in die "Beste buitelandse elf in Real Madrid se geskiedenis".

Op 16 Oktober 2021, tydens ’n viering van die 125ste bestaansjaar van die Nasionale Olimpiese Komitee en Sportkonfederasie van Denemarke, is 125 kandidate vir die titel van grootste Deense sportster tot agt verminder — en Laudrup is as die wenner aangewys.

Na sy spelersloopbaan het Laudrup as afrigter begin en was hy assistentbestuurder van die Deense nasionale span. Hy het sy eerste afrigterspos in 2002 by sy voormalige klub Brøndby aanvaar, en hulle na die Deense Superliga-kampioenskap in 2005 gelei. In Mei 2006 het hy besluit om nie sy kontrak met Brøndby te verleng nie. Hy het toe die afrigting van Getafe oorgeneem en daar noemenswaardige sukses behaal. Die klub het betreklik goed gevaar in die Copa del Rey en UEFA-beker, en die span se aanvallende speelstyl is wyd geprys. Op 15 Junie 2012 is Laudrup aangestel as bestuurder van die Premier League-klub Swansea City op ’n tweejaar-kontrak. In sy eerste seisoen in Suid-Wallis het hy die Liga-beker gewen — die eerste groot Engelse trofee in Swansea se 100-jarige geskiedenis. Op 4 Februarie 2014 is hy deur Swansea afgedank na ’n “beduidende” afname in prestasie in die Premier League, toe die klub net twee punte bo die relegasiesone was. Laudrup het daarna van 2014 tot 2018 Katarse klubs Lekhwiya en Al Rayyan afgerig.