Midrand Afrikaanse Akademie

Midrand Afrikaanse Akademie is ’n kleuter- en laerskool in Midrand, Gauteng, wat onderrig tot gr.7 deur medium Afrikaans bied.

Agtergrond

In die Midrand-omgewing, toe nog Halfweghuis genoem, is die Laerskool Halfway House op 18 April 1923 geopen. In die beginjare het die klein skooltjie ’n bestaanstryd gevoer, maar teen 1938 het Halfweghuis ’n dorpie geword en het die skool se leerders tot 40 toegeneem, almal Afrikaanssprekend. In 1956, toe mnr. Wasserman die hoof was, het die leerlingtal tot 111 Afrikaans en 45 Engels toegeneem. Toe mnr. Murcott in 1959 die hoofskap oorneem, was daar 127 Afrikaanse en 70 Engelse leerders. In die 1970’s het die Engelse leerders skerp toegeneem en die Afrikaanse leerders se getal verbygesteek. Die Afrikaanse onderrigbaan het in 2002 gesluit en ’n leemte in die Midrand-omgewing gelaat aangesien die naaste skole wat onderrig in Afrikaans bied, die Bryanston Parallelmediumskool en die Afrikaanse skole in Centurion is, meer as 10 km suid of noord van hier.

Kerklike samewerking

Vanaf ie 1990’s het die gebied tussen Johannesburg en Centurion rondom Halfweghuis geweldig ontwikkel en in dié tyd die naam Midrand gekry. Eers was die ontwikkeling veral langs die N1, maar later het woongebiede ook verder weg van die nasionale pad ontwikkel. In dié gebied het die Gereformeerde kerk Midrand in 1999 tot stand gekom. ’n Groot erf is op die Erand-landbouhoewes Uitbreiding 1, wes van die N1, gekoop en in vier erwe verdeel.

Van 2002 af het hierdie gemeente en die Nederduitsch Hervormde gemeente Midrand, wat op 1 Januarie 1931 as Johannesburg-Noord gestig is, maar sy kerkgebou by Atholstraat 188, Highlands-Noord, verkoop het nadat die meeste lidmate weggetrek het, ’n besonderse verbintenis omdat hulle ooreengekom het om saam ’n kerk op te rig.

Een van die erwe is vir kerklike gebruik gehersoneer. In November 2004, nadat die Hervormdes ’n tyd lank eredienste gehou het in die Laerskool Halfway House, het die kerkrade van die twee gemeentes ooreengekom om die erwe saam te besit en te beheer en om die bestaande woonhuis op een daarvan as ’n kerkgebou te ontwikkel.

Uit albei gemeentes is ’n gesamentlike eiendomskommissie aangewys wat verantwoordelik sou wees daarvoor om die woonhuis by Elfde Weg 124, Erand, in ’n kerkgebou te omskep. Op 18 September 2005 is die gebou in gebruik geneem deur albei gemeentes, wat ook saam besluit het om ’n Allen-orrel te installeer.

Skool gestig

In September 2012 het die drie Afrikaanse Kerke, Gereformeerd, Hervormd en NG, bymekaargekom en ʼn vennootskap gesluit om Midrand Afrikaanse Akademie te begin in die konsistorie van die NG kerk in Kerkstraat 50. Die skool het met twee kinders begin en 2013 afgesluit met agt leerlinge en drie personeellede. In 2014 het die skool met sowat 20 leerders en ʼn personeel van ses begin. Die skool het ter wille van groter toeganklikheid na die gesamentlike perseel van die Gereformeerde en Hervormde Kerk in 10de Straat geskuif.

Bronne

• (en) Die geskiedenis van Halfway House Primary op sy webtuiste Geargiveer 15 Februarie 2018 op Wayback Machine. URL besoek op 12 Februarie 2018.
• (af) Die geskiedenis van Midrand Afrikaanse Akademie op sy webtuiste^{[dooie skakel]}. URL besoek op 12 Februarie 2018.
• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.