Mieke Telkamp

in Wikipedia, die vrye ensiklopedie
Mieke Telkamp
Mieke Telkamp (ongeveer 1962)
Agtergrondinligting
GeboortenaamMaria Berendina Johanna (Mieke) Telgenkamp
Gebore(1934-06-14)14 Junie 1934
Oldenzaal, Overijssel, Nederland
Sterf20 Oktober 2016 (op 82)
Zeist, Utrecht, Nederland
Beroep(e)Sangeres
InstrumenteStem
Jare aktief1953–1990

Mieke Telkamp, gebore Maria Berendina Johanna (Mieke) Telgenkamp (* 14 Junie 1934 in Oldenzaal; † 20 Oktober 2016 in Zeist), was 'n Nederlandse sangeres. Sy is veral bekend vir die liedjie Waarheen, waarvoor ('n vertaling van Amazing Grace) waarmee sy haar terugkeer in 1971 maak.

Telkamp word in 1953 bekend met Here in my heart, 'n lied wat in 1952 deur Al Martino gesing is.[1] Daarna het sy talle suksesvolle snitte opgeneem, soos Nooit op Zondag en Eb en Vloed. Sy was ook in Wes-Duitsland suksesvol, veral met Prego, prego gondeliere, wat bykans 'n miljoen eksemplare verkoop het.[1] Sy het die verhoognaam Mieke Telkamp gebruik, omdat haar van, Telgenkamp, nie vir 'n loopbaan in Duitsland geskik was nie.

Sy wen die eerste prys, die sogenaamde Gouden Gondel, in 1957 tydens die Fees van Venesië. In 1962 neem sy aan die Liedjiefees van Knokke deel en in 1964 speel sy in die revue Snip en Snap.

Op advies van haar dokter onttrek sy haar in 1967 van die vermaaklikheidswêreld. In die 1970's besluit sy om nuwe lewe in haar loopbaan in te blaas. Sy tree egter nie meer op nie, maar beperk haar tot die opneem van plate, asook radio- en TV-optredes.

Ná haar terugkeer tot die musiekbedryf behaal sy groot sukses. Sy ontvang in 1971 haar eerste goue plaat vir Waarheen, waarvoor, wat meer as 'n miljoen eksemplare in Nederland verkoop het.[1] Sy bring later 'n album met haar Duitse treffers uit, getiteld Tulpen aus Amsterdam, wat byna 'n miljoen plate oor die toonbank verkoop het.[1] Telkamp was die eerste Nederlandse sanger wat ná die Tweede Wêreldoorlog weer in Duits gesing het, 'n gebaar wat hoog in Duitssprekende lande op prys gestel is. Sedert 1955 het sy talle plate in Wes-Duitsland uitgebring, waarvan Du bist mein erster Gedanke die eerste was. Haar eerste Duitse liedjie, Morgen komm' ich wieder, is reeds so vroeg as 1953 in Nederland vrygestel en was 'n groot sukses.

In 1978 word Telkamp die eerste persoon uit die vermaaklikheidswêreld om die Ridder in die Orde van Oranje-Nassau te ontvang. In 1990 tree sy vir die laaste keer amptelik op.[2]

In Augustus 2008 verskyn 'n DVD met die titel Alles voor jou met 40 van haar liedjies uit die periode 1959 tot 1989. Op 13 Desember 2008 ontvang sy 'n diamant-toekenning op Omroep MAX vir die verkoop van 1 miljoen eksemplare van Waarheen, waarvoor. Op 10 Maart 2011 neem sy finaal op Omroep MAX van die publiek afskeid en leef daarna in afsondering in Zeist, waar sy in die ouderdom van 82 oorlede is.

Verwysings[wysig | wysig bron]

  1. 1,0 1,1 1,2 1,3 Peter de Waard, Mieke Telkamp 1934–2016, de Volkskrant, 20 Oktober 2016
  2. Mark den Blanken en Tom Tates, Mieke Telkamp (82) overleden, Algemeen Dagblad, 20 Oktober 2016

Eksterne skakels[wysig | wysig bron]