Mircea Lucescu

Mircea Lucescu

Lucescu in 2017
Persoonlike inligting
Geboortenaam	Mircea Lucescu
Geboortedatum	(1945-07-29)29 Julie 1945
Geboorteplek	Boekarest, Roemenië
Sterfdatum	7 April 2026 (op 80)
Sterfplek	Boekarest, Roemenië
Lengte	1,77 m
Speelposisie	Vleuel
Jeugloopbaan
1961–1963	Școala Sportivă 2 București
Seniorloopbaan*
Jare	Span	Kere†	(Doele)†
1963–1977	Dinamo București	250	(57)
1965–1967	→ Știința București (leen)	39	(12)
1977–1982	Corvinul Hunedoara	111	(21)
1990	Dinamo București	1	(0)
Totaal		401	(90)
Nasionale span
1966–1979	Roemenië	64	(9)
Spanne bestuur
1979–1982	Corvinul Hunedoara (speler-afrigter)
1981–1986	Roemenië
1985–1990	Dinamo București
1990–1991	Pisa
1991–1995	Brescia
1995–1996	Brescia
1996	Reggiana
1997–1998	Rapid București
1998–1999	Inter Milaan
1999–2000	Rapid București
2000–2002	Galatasaray
2002–2004	Beşiktaş
2004–2016	Sjachtar Donetsk
2016–2017	Zenit Sint Petersburg
2017–2019	Turkye
2020–2023	Dynamo Kijif
2024–2026	Roemenië
* Kere vir seniorklub uitgedraf en doele is net vir die plaaslike liga.. † Kere uitgedraf (Doele).

Mircea Lucescu (Roemeense uitspraak: [ˈmirtʃe̯a luˈtʃesku]; 29 Julie 1945 – 7 April 2026) was 'n Roemeense sokkerspeler en afrigter.

Lucescu was een van die suksesvolste spelers van die Roemeense liga-kampioenskap, nadat hy al sewe van sy titels met Dinamo București gewen het. Hy het ook vir Știința București en Corvinul Hunedoara gespeel, en het 64 wedstryde vir die Roemense nasionale span gemaak, wat hy by die Wêreldbekertoernooi van 1970 as kaptein gelei het.

Sy eerste aanstelling as afrigter was as spelende afrigter vir Corvinul Hunedoara. In November 1981 het hy oorgeneem as hoofafrigter van die Roemeense nasionale span en het hy die span na die Europese Kampioenskap in 1984 gelei. In November 1985 het hy die afrigting van Dinamo București oorgeneem, terwyl hy steeds vir die nasionale span gewerk het.

Ná die Roemeense Rewolusie van 1989 het Lucescu in Julie 1990 na Italië vertrek om by die Serie A-klub Pisa af te rig. Hy het daarna verskeie klubs in Italië en sy vaderland afgerig voordat hy as hoofafrigter van Galatasaray aangestel is, wat hy in 2002 na die Süper Lig-titel gelei het. Hy het daarna na die Instanboel-rivaal Beşiktaş oorgeskakel, wat hy die volgende jaar na die Süper Lig-titel gelei het.

In Mei 2004 het hy aan die mees bepalende fase van sy afrigloopbaan begin, as hoofafrigter van Sjachtar Donetsk in Oekraïne, wat hy na agt Oekraïense Premierliga-titels gelei het, sowel as verskeie ander beker-trofeë, insluitend die UEFA-beker in 2008/09.

Sy laaste aanstelling as afrigter was by die Roemeense nasionale span. Op 26 Maart 2026 is Roemenië uit die Wêreldbeker-kwalifisering uitgeskakel ná ’n 1–0 nederlaag teen Turkye in die uitspeel-halfeindstryd wat in Istanboel gespeel is. Hy is enkele dae later in die hospitaal opgeneem en is oorlede op 80-jarige ouderdom, nadat hy tot op die einde aktief in topvlak-sokker gebly het.

Hy is aangewys as Roemenië se Afrigter van die Jaar in 2004, 2010, 2012, 2014 en 2021, en Oekraïne se Afrigter van die Jaar in 2006 en tussen 2008 en 2014. In 2013 is hy bekroon met die Afrigter van die Dekade-toekenning in Roemenië, en in 2015 het hy die vyfde persoon geword wat 100 UEFA Champions League-wedstryde as afrigter gelei het, saam met Alex Ferguson, Carlo Ancelotti, Arsène Wenger en José Mourinho. Hy is ook derde in terme van amptelike trofeë wat gewen is, met 38.