Mossiesheuwels

in Wikipedia, die vrye ensiklopedie
Jump to navigation Jump to search
Die Mossiesheuwels bied onder meer 'n uitsig oor die Kosygina-straat en die boonste gedeelte van die Loezjniki-tweevlakbrug (Metrotreine ry op die laer vlak)
Boubedrywighede in Moskwa-Siti (hier in 2008) kan vanuit 'n uitsigplatform op die heuweltop dopgehou word
Kerkkoepels en hoofgebou van die Staatsuniversiteit (teen die agtergrond)
'n Nuwe kabelspoor, wat in 2018 in bedryf gestel is, neem besoekers…
...in gerieflike moderne karretjies (wat van LCD-skerms en stoorgeriewe vir fietse en sneeuplanke voorsien is)…
...na die moderne stasie op die heuweltop
Die hoofgebou (Praesidium) van die Akademie van Wetenskappe beskik oor sy eie uitsigplatform wat uitsigte oor Moskou bied. Die kompleks dateer uit die 1980's
Veerbote van die Moskouse Hoofstadredery CCK by die Mossiesheuwels-aanlegkaai. Teen die agtergrond: die residensiële wolkekrabber The House on Mosfilmovskaya

Die Mossiesheuwels (Russies: Воробьёвы горы Worobjowi Gori; tussen 1935 en 1999 Leninheuwels genoem) is 'n heuwel met 'n hoogte van 80 m bo seevlak in die Russiese hoofstad Moskou, geleë tussen die hoofgebou van die Lomonossof-universiteit en die oewer van die Moskwa-rivier, vlakby die Olimpiese Loezjniki-kompleks en die gelyknamige stadion (waar in 2018 ook wedstryde van die Sokkerwêreldbeker gehou is, insluitende die eindwedstryd). Die heuwel se naam is afgelei van die dorpie Worobjowo ("Mossie") wat van oudsher in vorstelike besit was. So is hier 'n aantal adellike paleise opgerig. Die oudste verwysings na Worobjowo dateer uit die 15de eeu.

Die hele nedersetting is in 1956 gesloop om plek te maak vir die nuwe Lomonosof-universiteitskampus. Net die dorp se klein Drievuldigheidskerk, wat in die vroeë 19de eeu in die klassisistiese styl ontstaan het, het bewaar gebly. Danksy die inisiatief van die Moskouse tronkarts Friedrich Joseph Haas (1780−1853) is prisoniers in die nabygeleë gevangenis toegelaat om aan kerkdienste in die kerk deel te neem. Die kerk is ook nie in die Sowjettydperk gesluit nie sodat sy oorspronklike interieur bewaar gebly het.[1]

Nadat die Verenigde State die Sowjetunie op 16 Desember 1933 amptelik erken het en diplomatieke betrekkinge aangeknoop het, is die bou van 'n ambassadekompleks oorweeg. Sowjetleier Josef Stalin het in Januarie 1934 aan die eerste Amerikaanse ambassadeur William C. Bullitt 'n perseel in die Mossiesheuwels (destyds Leninheuwels) in die vooruitsig gestel, maar onderhandelinge daaroor was vrugteloos, onder meer omdat die voorgestelde terrein te ver van die middestad geleë was. Die Ambassade het in 'n gebou naby die Rooiplein ingetrek totdat die nuwe ambassadekompleks in die Presnenski-distrik in 1953 geopen is.[2]

Die heuwel, wat in 1987 tot natuurmonument verklaar is en sedert 1998 as natuurbewaringsgebied (met 'n totale oppervlakte van 137 hektaar) beskerm word, maak deel uit van 'n uitgestrekte openbare park wat oor 'n afstand van vier kilometer langs die Moskwa-rivier strek. Die Mossiesheuwels word onder die oudste en gewildste van Moskou se ruim vyftig groen ruimtes en openbare ontspanningsgebiede gereken en bied 'n panoramiese uitsig oor die stad (mits daar geen rookmis oor die middestad hang nie). Die Mossiesheuwels maak sedert 2003 amptelik deel uit van Moskou se bekendste park, Gorkipark, al is hulle buite die eintlike parkterrein geleë.

Belangrike besienswaardighede, wat deel uitmaak van Moskou se stadshorison, kan vanaf die heuwel waargeneem word - soos die Kremlin-mure, 'n groot aantal kerkkoepels en elkeen van die Sewe Susters-wolkekrabbers. As ontspanningsgebied is die heuwel gewild by drawwers, balsportentoesiaste en - gedurende die wintermaande - by skisportaanhangers. Nuut getroude pare bring tradisioneel 'n besoek aan die heuwel.[3] Die befaamde rolprentateljee Mosfilm is in die nabyheid van die Mossiesheuwels geleë.

Literêre verwysings[wysig | wysig bron]

Die eindtoneel van Michail Boelgakof se roman Master i Margarita ("Die meester en Margarita") speel in die Mossiesheuwels af.


Verwysings[wysig | wysig bron]

Eksterne skakels[wysig | wysig bron]

Wikimedia

Media