Museo Storico Navale di Venezia

Museo Storico Navale di Venezia

Historiese Vlootmuseum van Venesië

---

Riva San Biagio
Castello, Venesië

---

Stigting

1919

---

Eienaar

Italiaanse Vloot

---

Webtuiste
Museo Storico Navale

Die Museo Storico Navale di Venezia is 'n vloot- en seevaartmuseum in besit van die Italiaanse Vloot, geleë in die Venesiaanse sestiere Castello naby die historiese skeepswerf Arsenale. Die museum se uitstallings word in 'n voormalige gerestoureerde 15de eeuse graanstoorhuis op die Campo San Biagio gehuisves.

Uitstallings

Fragment van 'n 17de eeuse Venesiaanse galei met versierings

'n Bragozzo, 'n vissersboot vir 'n bemanning van twee of drie vissers, soos gebruik in die Adriatiese See

'n Nie-seremoniële dogeboot

Model van die Bucintoro, die seremoniële boot waarmee die Doge as Venesiaanse staatshoof op Hemelvaartsdag die jaarlikse simboliese huwelik van Venesië met die Adriatiese See, die Sposalizio del Mar, voltrek het. Die oorspronklike boot is in Januarie 1798 deur Napoleontiese soldate vernietig wat die bladgoud probeer steel het

Die museum se uitstallings dokumenteer die geskiedenis van seevaart in die algemeen en fokus daarnaas op die historise ontwikkeling van die seemagte van die Republiek Venesië en Italië. Op vyf verdiepings met 42 vertoonlokale word op 'n oppervlakte van sowat 4 000 vk m 'n groot verskeidenheid skeepsmodelle, rekonstruksies, wapens, uniforms, vlae, seevaartinstrumente, seekaarte en ander voorwerpe vertoon.

Geskiedenis

Die museum se versameling van skepe het sy oorsprong in die sogenaamde Casa dei Modelli, 'n argief op die terrein van die Republiek Venesië se skeepswerf, die Arsenale. Hier is vanaf die laat 17de eeu modelle van alle skepe en bote bewaar wat op die werf gebou is. Die museum se wapenversameling baseer op 'n versameling uit die Dogepaleis wat daar in die Sale dell’armar, die wapensale, vertoon is. Nadat albei versamelings in 1797 deur soldate van die Napoleontiese besettingsmag geplunder is, is die oorblyfsels in die Museo dell’Arsenale bewaar en vertoon.

In 1919 het die Italiaanse Admiraliteit besluit om 'n nuwe vlootmuseum op te rig wat in 'n gebou op die Arsenale-terrein gehuisves sou word. Saam met die eweneens nuutgestigte Museo tecnico navale in La Spezia, waar die Italiaanse Vloot se skeepstegnologie gedokumenteer word, behandel die Venesiaanse museum die amptelike geskiedenis van Italië se seemag.

Sedert 1964 word die Venesiaanse museum in 'n voormalige graanstoorhuis op die Campo San Biagio gehuisves. Hier is vroeër die skeepsproviand vir die Venesiaanse vloot (brood en beskuite) bewaar.