Myst IV: Revelation

in Wikipedia, die vrye ensiklopedie
Spring na: navigasie, soek
Myst IV: Revelation
'n Skakelboek uit Myst IV, waarmee die speler tussen wêrelde kan beweeg
'n Skakelboek uit Myst IV, waarmee die speler tussen wêrelde kan beweeg
Ontwikkelaar Ubisoft Montreal
Uitgewer Ubisoft
Uitgereik September 2004
Genre Avontuur / Fantasie
Modus Enkelspeler
Platform Microsoft Windows, Mac OS X, Xbox
Amptelike webtuiste mystrevelation.us.ubi.com

Myst IV: Revelation is wys-en-kliek rekenaarspeletjie en die vierde in die Myst-reeks. Dit is die eerste speletjies in die reeks wat eksklusief op DVD vrygestel is ('n CD-weergawe sou 12 cd's nodig gehad het om al die data te bevat). Soos die vorige speletjie in die reeks, Myst III: Exile, kombineer Revelation vooraf gesintetiseerde grafika met digitale video, maar bevat dit ook intydse 3D-effekte om 'n groter gevoel van werklikheid te gee.


Die storielyn van Revelation voltooi dié van die oorspronklike Myst. Die speler word deur Atrus ontbied, 'n man wat skakels na ander wêrelde (sogenaamde Ages of "Tye") skep deur spesiale skakelboeke te skryf. Ongeveer 20 jaar vroeër het Atrus se twee seuns byna al sy skakelboeke vernietig het het Atrus hulle elk in 'n aparte Tyd gevangene geneem. Atrus versoek die speler om as 'n neutrale beoordelaar op te tree deur die broers in hulle Tye te besoek en te kyk of hulle tot inkeer gekom het. Kort na die begin van die spel verdwyn Atrus se jong dogter, Yeesha, en dit blyk dat een van haar twee broers haar ontvoer het. Die speler moet dus na elke broer se Tyd reis in 'n poging om Yeesha te red.

Die ontwikkeling van Revelation het meer as drie jaar geduur en Ubisoft het tot 80 werknemers gehad wat aan die speletjie gewerk het. Die musikant Peter Gabriel het sy stem verleen aan die klankbaan en die spel se oudio. Die klankbaan is deur Jack Wall gekomponeer (hy het ook die klankbaan van Myst III: Exile behartig). Die speletjie het oor die algemeen positiewe resensies ontvang, alhoewel sommige publikasies ontevrede was oor die speler se beheerskema.

Spel[wysig]

Myst IV: Revelation is 'n avontuurspel waarin die speler die rol inneem van 'n anonieme hooffiguur. Die speler ontdek interaktiewe wêrelde wat as Ages ("Tye") bekend staan deur die toetsbord of muis te gebruik. Tydens sy besoek aan die Tye, moet die speler raaisels oplos om die verhaal te laat vorder. Die speler kan nie na willekeur rondbeweeg nie, maar kan elke keer 'n skerm verder beweeg en dan hul blik op die toneel in enige rigting beweeg.

Die muis se pyltjie bied visuele aanduidings vir moontlike aksies en bewegings. Die pyltjie verskyn as 'n hand, wat verander na gelang van watter aksies uitgevoer kan word. Indien dit byvoorbeeld moontlik is om in 'n spesifieke rigting te beweeg, verander die hand só dat 'n vinger in die rigting wys. Indien dit moontlik is om 'n item van nader te beskou, verander die hand in 'n vergrootglas, ensovoorts.

Om die speler by te staan bied die speletjie die moontlikheid om "foto's" te neem, so kan die speler skermskote vasvang wat moontlik leidrade bied vir raaisels later in die verhaal. Die speler het ook 'n dagboek waarin hy aantekeninge kan maak of leidrade neer kan skryf. Die gebeurtenisse wat voor die speletjie se tyd plaasgevind het, kan gesien word deur 'n spesiale amulet, wat herinneringe uit voorwerpe kan oproep.