NG gemeente Benoni-Wes
Die NG gemeente Benoni was 'n gemeente van die Nederduitse Gereformeerde Kerk na aan die middestad van Benoni aan die Oos-Rand en in die Sinode van Suid-Transvaal, wie se naam Sinode Hoëveld geword het lank nadat die gemeente ophou bestaan het.
Benoni-Wes het in 1948 van die moedergemeente Benoni afgestig, wat reeds in 1914 van Boksburg afgestig het. (Geeneen van dié drie gemeentes of die moedergemeente van Boksburg, die eerste gemeente aan die Oos-Rand, bestaan meer nie.) Drie jaar voor Benoni-Wes het Benoni-Oos in 1945 afgestig en reeds in 1939 Benoni-Noord. Benoni-Wes het 'n kerkgebou opgerig by Parkstraat 29, 650 m vanaf die moedergemeente se kerkgebou op die hoek van Cranbourne- en Kimboltonstraat.
In 1994, toe Benoni-Wes 460 belydende en 180 dooplidmate en die moedergemeente onderskeidelik 387 en 126 gehad het, is Benoni-Wes by Benoni ingelyf. Nie lank daarna nie is die geskiedkundige moederkerk, ontwerp deur die begaafde kerkargitek William Henry Ford, verkoop en het die saamgesmelte gemeente die Wes-kerk in Parkstraat begin gebruik. Omdat die demografie van die middedorp steeds verander het, is Benoni in 2014 ingelyf by Farrarmere (gestig in 1957), waarna dié gemeente se naam Jubilaté geword het. So het die NG Kerk ná presies 'n eeu aan die middedorp van Benoni onttrek.
Bron[wysig | wysig bron]
- (af) Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.