NG gemeente Bloemfontein-Oos

in Wikipedia, die vrye ensiklopedie

Die NG gemeente Bloemfontein-Oos was ’n gemeente in die suidooste van die Vrystaatse hoofstad. Dit is in 1995 by die NG gemeente Ooshoek ingelyf.

Eredienste is sedert 1919 in ’n saaltjie in die ooste van Bloemfontein gehou vir lidmate van die moedergemeente vir wie dit onmoontlik was getrou dienste in die Tweetoringkerk by te woon. Bloemfontein-Oos het in 1930 afgestig en sewe jaar later is die saaltjie vergroot volgens die planne van die argitek George Louw.

Aangesien die vergrote saal ook te klein geword het om die groeiende gemeente te huisves, is reeds in 1945 oorweging aan kerkbou geskenk. Die lidmate het geld begin insamel en in 1953 is ’n erf gekoop. Die kerkraad het die kerkgebou in 1955 goedgekeur. Dit is deur die boumeester F.P. van Heerden ontwerp en die hoeksteen is in 1959 gelê. Die inwyding het op 30 April 1960 plaasgevind.

In die vroeë negentigerjare het die gemeente begin noustrop trek weens die veranderende demografie van die kleinhoewes in die omgewing en die suidooswaartse uitbreiding van informele nedersettings. Die groei van die stad se nywerheidsgebiede het ook tot ’n afname in die gemeente se lidmaattal gelei. In 1995 is Bloemfontein-Oos by Ooshoek ingelyf, sowat ’n jaar ná Rodenbeck. Die kerkgebou is deur die AGS oorgeneem.

Bloemfontein-Oos se eerste predikant, ds. E.J. du Toit, is op 29 November 1930 bevestig, maar reeds in Augustus 1935 het hy die beroep na Boshof aangeneem. Sedert 1950 was hy hoof van die Hugenote Kollege op Wellington.