NG gemeente Clarens

in Wikipedia, die vrye ensiklopedie
Jump to navigation Jump to search
Ds. S.J. Stander, Clarens se eerste NG leraar.
Die NG kerkgebou van sandsteen is ontwerp deur Gerard Moerdijk.
Die kerkgebou se hoeksteen.
'n Ander blik op die kerkgebou.

Die NG gemeente Clarens is ’n gemeente van die Nederduitse Gereformeerde Kerk op die Vrystaatse dorpie Clarens. Dit was met stigting die 62ste gemeente in die Vrystaatse Sinode.

Agtergrond[wysig | wysig bron]

Daar is heelwat interessante historiese gebeurtenisse verbonde aan die dorp Clarens, wat in 1912 gestig is. Die dorp heet na die dorp Clarens in Switserland om die volgende redes: (a) Net soos Clarens in Switserland is ook hierdie dorp tussen pragtige berge geleë. (b) Die dorp is uitgelê op die slagveld waar president Kruger (destyds kommandant) in 1866 teen die Basoeto's geveg het, tydens die oorlog tussen pres. Brand van die OVS en Mosesj; omdat pres. Kruger in Switserland oorlede is, het die stigters van hierdie dorp dit goed gedink om die dorp met pres. Kruger se nagedagtenis te assosieer. 'n Beter en gepaster naam kon hulle seker nie gekies het nie, aldus Ons gemeentelike feesalbum. 'n Paar kilometer buite die dorp staan ’n klein monument ter ere van die Transvalers wat daar gesneuwel het.

Nog geskiedkundige gebeurtenis aan Clarens verbonde is die oorgawe gedurende die Anglo-Boereoorlog van genl. Prinsloo met 4 000 burgers by Surrender, sowat 12 km suid van Clarens.

Gemeente gestig[wysig | wysig bron]

In 1913 is die skool in 'n bouvallige waenhuis geopen. As eerste skoolhoof is die heer J.S. de Leeuw aangestel. 'n Paar jaar ná die stigting van die dorp is die dorpsbestuur vervang deur 'n munisipaliteit. Die eerste burgemeester was die heer N.B. Swart. In 1920 is die gemeente Clarens van Bethlehem afgestig. Die eerste leraar was ds. S.J. Stander, later van onder meer Hartebeestfontein. Ook het die Clarens-tak van die OVV. hier 'n saal gebou, naamlik die President Kruger-gedenksaal.

In 1940 is 'n sierlike kerk gebou. Die hoeksteen is deur die destydse predikant, ds. J.J. le Roux, gelê. In die voorportaal van die kerk is 'n klip ingemessel, afkomstig uit die fondament van die tweede Voortrekkerkerkie wat in Natal gebou was. Bokant die klip is 'n koperplaat met die opskrif: “Hierdie klip is uit die Marianna (Tweede Voortrekkerkerkie), gebou deur die Voortrekkers in 1852 op Mount Howell, tussen die groot en klein Tugela, Natal, en is gesloop in 1874."

Vanweë die pragtige natuurskone berge, met die wonderlike rotsformasies en heerlike somerklimaat, het Clarens 'n gewilde vakansieoord geword, nie alleen van Suid-Afrika nie, maar ook vir mense ver buitekant die grense.

Bronne[wysig | wysig bron]