NG gemeente Luipaardsvlei

in Wikipedia, die vrye ensiklopedie
Jump to navigation Jump to search
Die NG kerk Luipaardsvlei.
Ds. S.P. du Plessis, leraar van 1958 tot 1961.
So het Die Voorligter in April 1960 oor die inwyding van die kerkgebou berig.
Ds. H.P. van Straten, leraar van 1947 tot sy aftrede in 1958.
Ds. Gerhard Cruywagen, leraar van 1969 tot 1974.

Die NG gemeente Luipaardsvlei, waarby die ou moedergemeente van Krugersdorp ingelyf is, is 'n gemeente van die Nederduitse Gereformeerde Kerk in die Sinode Goudland (voorheen Sinode van Wes-Transvaal).

Agtergrond en stigting[wysig | wysig bron]

Reeds omstreeks 1900 is op Luipaardsvlei 'n kerksaaltjie gebou, veral op inisiatief van 'n klompie ywerige en kerkliewende lidmate. Die hoeksteen is gelê deur ds. Carel van der Merwe. In Maart 1946 is Luipaardsvlei van Roodepoort as 'n selfstandige gemeente afgestig en op 19 Desember is die eerste leraar, ds. H.P. van Straten, bevestig.

Dadelik moes daar 'n begin gemaak word met die bou van 'n woning vir die leraar en sy gesin, en voor die einde van 1947 kon hulle intrek neem in die sierlike pastorie, waar die dominee vrugtebome aangeplant, 'n grasperk uitgelê en 'n roostuin begin.

Met afstigting was die ledetal iets oor die 600; vyf jaar later het dit al tot tussen 700 en 800 aangegroei en steeds vinnig uitgebrei. 'n Tak van die Transvaalse Vroue-Sendingvereniging en van die Manne-Sendingbond is gestig en albei het goeie werk gedoen, sowel as die Mede-Sendingarbeidsters en die sterk Kindersendingkrans, waarvan daar ook 'n wykstak gestig is. Die Sondagskool het geweldig uitgebrei en is goed georganiseer. Behalwe die Dorpsondagskool was daar nog vyf wykstakke. Die Christelike Strewers en die CJV het omstreeks 1950 tot 'n Kerkjeugvereniging geamalgameer. Die Bond van Dienaresse het so in die stilte goed gewerk en 'n ruim bydrae aan die kerkraad vir die bouskuld gegee en het ook geestelike werk in die gemeente gedoen.

Met die vinnige aanbou van huise in die nuwe dorpsgebied Witpoortjie, was dit nodig om daar ook bouerwe vir die Kerk te koop en sodoende het die jong gemeente onder 'n swaar skuldelas gebuk gegaan.

Sending[wysig | wysig bron]

Die lotgevalle van die duisende swart mense in die Luipaardsvlei-township het die sendingliewende pastoriepaar ter harte gegaan en met behulp van 'n aantal ywerige sendingvriende in die gemeente is die werk aangepak en reeds in 1950 kon 'n netjiese en doelmatige kerkie ingewy word, waartoe die Randse Sendingraad ook 'n gewaardeerde bydrae gelewer het. Die sendingkerkie het ook diens as skool gedoen en 'n evangelis- onderwyser het die kleinspan onderrig, terwyl die leraar en van die ouderlinge Sondagmiddae daar diens gehou het.

Huisbesoek was destyds nie 'n maklike taak nie omdat feitlik alle huisvaders uitgewerk en eers ná vyfuur tuisgekom het.

Die moedergemeente Krugersdorp was 120 jaar oud toe dit in 2010 by Luipaardsvlei ingelyf is.

Die kerkgebou is geleë op die hoek van Stasie- en Morcomstraat, Lewisham, Krugersdorp. In 2013 was die leraar ds. Anton Mieny. Daar was in daardie jaar 163 doop- en 545 belydende lidmate.

Enkele leraars[wysig | wysig bron]

Bronne[wysig | wysig bron]

  • Small, Mario (samesteller). 2013. Jaarboek van die NG Kerke. Wellington: Tydskriftemaatskappy van die NG Kerk NPC – 'n divisie van Bybel-Media.

Eksterne skakels[wysig | wysig bron]