NG gemeente Rodenbeck
Die NG gemeente Rodenbeck was sowat ’n halfeeu lank ’n gemeente in die suidooste van die Vrystaatse hoofstad.
Die gemeente is in 1943 aan die suidoostelike buitewyke van Bloemfontein van die moedergemeente afgestig. Ds. Heinrich Johannes Wiegand is op 28 April 1934 in die Tweetoringkerk as hulpprediker bevestig en het op 13 Mei 1939 medeleraar van dié gemeente geword wat verantwoordelik was vir die bediening van die Woord in ’n saal in die wyk Rodenbeck. Hy is op 30 Oktober 1943 as Rodenbeck se eerste predikant bevestig en het die gemeente jare lank bedien.
Rodenbeck se kerkgebou is in 1957 opgerig volgens die plan van die argitek Paulus Visser. Dis geleë op Hoewe 121, Sonskyn, Dewetsdorp-pad. Die gebou is in 1958 ingewy. Die pastorie is in 1951 gebou en die saal in 1977 opgeknap.
Weens die ontwikkeling van informele nedersettings in die jare negentig in ’n suidoostelike rigting is die kerkgebou eindelik omring deur die township Bloemside. Op 1 Augustus is Rodenbeck by die gemeente Ooshoek ingelyf.
Indertyd het die owerheid besluit om die grond rondom die kerk vir laekoste- of informele behuising te gebruik. Ná onderhandelings is die bedrag van R1,8 miljoen deur die provinsiale administrasie uitbetaal. Die ooreenkoms was dat die kerkgebou steeds vir godsdienstige doeleindes gebruik sou word. Nadat die NG gemeente dit ontruim het, het dit wel ’n tyd lank ’n interkerklike bediening gehuisves.
Die hoeksteen is verwyder en by die NG kerk Ooshoek geplaas, terwyl die orrel is later aan die NG Gemeente Pellissier verkoop, maar die orige meublement was deel van die verkoopsooreenkoms en is alles intussen verwyder. Die gebou is later aan die Vrystaatse Provinsiale Raad van Kerke geskenk.
In 1998 is die saal as klaskamers vir die gr. 1- en 2-leerders van die Atang Primary School gebruik. Sedert dié reëling geëindig het, staan die geboue leeg en toon dit ernstige tekens van verval.