Nan Lubbe

Nan Lubbe (*1 Desember 1885, Fauresmith – †Onbekend) was ’n Afrikaanse skrywer van ’n biografiese roman oor die Anglo-Boereoorlog.

Lewe en werk

Gertruida Petronella Oberholzer was op 1 Desember 1885 op die plaas Kleinhartbeesfontein in die distrik Fauresmith in die Vrystaat gebore. Tydens die Anglo-Boereoorlog word sy in die konsentrasiekampe aangehou, waar sy as vrywillige verpleegster diens doen. Na die oorlog gaan die gesin terug na hulle verwoeste plaas toe, waar hulle in ’n kafskuur woon terwyl hulle die plaas weer van die grond af moet opbou. Nadat die plaas verkoop is, gaan woon die gesin op Fauresmith. Hier trou sy met die onderwyser Andrew du Toit van Fauresmith en die egpaar verhuis later na Pretoria. Die egpaar het drie dogters en ’n seun. Na haar eerste man se dood trou sy met die wewenaar J.A. (Oom Japie) Lubbe. Hulle woon op Grabouw en na haar tweede man se dood woon sy op ’n kleinhoewe by The Willows by haar dogter, mevrou Loura Carstens.

Skryfwerk

In die roman Die jongste spioen skryf sy oor haar wedervaringe tydens die Anglo-Boereoorlog, met die titel wat na haar suster Lettie verwys. ’n Uittreksel uit die roman word in Augustus 1968 in Standpunte gepubliseer. Die roman word ook oor die radio in die program Uit my kontrei voorgelees.

Publikasies

Jaar	Publikasies
1969	Die jongste spioen

Bronnelys

Boeke

• Kannemeyer, J.C. Geskiedenis van die Afrikaanse literatuur 2. Academica. Pretoria, Kaapstad en Johannesburg. Eerste uitgawe. Eerste druk, 1983.
• Van Coller, H.P. (red.) Perspektief en Profiel Deel 2. J.L. van Schaik-Uitgewers. Pretoria. Eerste uitgawe, 1999.

Tydskrifte en koerante

• De Villiers, Annakie. Tant Nan Lubbe skryf nou eers lekker. Hoofstad, 13 April 1972.