Gaan na inhoud

Nigeriese Krieketfederasie

in Wikipedia, die vrye ensiklopedie
Nigeriese Krieketfederasie
Kenteken van die Nigeriese Krieketfederasie
Kenteken van die Nigeriese Krieketfederasie
Engelse naam Nigeria Cricket Federation
Afkorting NCF
Land Vlag van Nigerië Nigerië
Sportsoort Krieket
Stigting 1957
Lid van Internasionale Krieketraad
Aangesluit in 2002
Vastelandse beheerliggaam Afrikakrieketvereniging
Voorsitter Uyi Akpata
Setel Nasionale Stadion, Abuja, Nigerië
Amptelike tale Engels, Hausa, Igbo en Joroeba
Amptelike webwerf nigeriacricket.com.ng

Die Nigeriese Krieketfederasie (Engels: Nigeria Cricket Federation) is die bestuursliggaam wat krieket in Nigerië beheer. Die beheerliggaam is in 1957 gestig en in Abuja gesetel. Sedert 2002 verteenwoordig dit Nigerië by die Internasionale Krieketraad (IKR) as ’n assosiaatlid en ook by die Afrikakrieketvereniging (Africa Cricket Association, “ACA”).

Geskiedenis

[wysig | wysig bron]

Die Nigeriese Krieketfederasie het in 1957, voor Nigerië se onafhanklikwording, ontstaan met die samesmelting van die in 1932 gestigte Nigeriese Krieketvereniging (Engels: Nigeria Cricket Association, NCA) vir Europeërs en die in 1933 gestigte gelyknamige beheerliggaam vir Afrikane onder dieselfde naam wat in 1951 nog los verbonde was met aparte takke vir albei bevolkingsgroepe. In 2002 het dit ’n assosiaatlid van die Internasionale Krieketraad (IKR) geword.[1] In dieselfde jaar het hulle by die Afrikakrieketvereniging (Africa Cricket Association, “ACA”) aangesluit.[2] In 2006 het die beheerliggaam sy huidige naam verkry.

Taak

[wysig | wysig bron]

Die Nigeriese Krieketfederasie organiseer verskeie nasionale spanne, insluitend Nigerië se nasionale seniorkrieketspan vir mans (Yellow Greens), vroue en jeug. Hulle is ook verantwoordelik vir die bestuur en organisasie van T20I-reekse teen ander spanne, en vir die reëling van internasionale wedstryde tuis. Daarbenewens is die Nigeriese Krieketfederasie verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Nigeriese span.

Daarbenewens bestuur die beheerliggaam kinder- en jeugkrieket in Nigerië. Net soos ander krieketlande beskik Nigerië oor ’n o/19-nasionale span wat aan die o/19-krieketwêreldbeker deelneem.[3]

Die beheerliggaam reël ook die plaaslike kompetisies. Die Nigeriese Krieketfederasie beoog die stigting van die Nigerian Super League.[4]

Kenteken

[wysig | wysig bron]

Die Nigeriese nasionale krieketspan se bynaam is Yellow Greens.[5] Die Nigeriese Krieketvereniging se kenteken toon ’n skild met die gestiliseerde uitbeelding van beide die Niger- en Benueriviere se rivierloop in Nigerië en die letters NCF met die belettering Nigeria Cricket Federation. Die Nigeriese Krieketfederasie is by die Nasionale Stadion in Abuja gesetel.[6]

Verwysings

[wysig | wysig bron]
  1. ↑ (en) "Nigeria Cricket Federation". Internasionale Krieketraad. Besoek op 12 April 2026.
  2. ↑ (en) "Members". Afrikakrieketvereniging. Besoek op 12 April 2026.
  3. ↑ (en) Martin Williamson (11 Januarie 2006). "The Under-19 World Cup". ESPNcricinfo. Besoek op 12 April 2026.
  4. ↑ (en) Shounak Sarkar (9 Desember 2023). "The Rapid Rise of Nigerian Cricket and Becoming ICC's Priority Member: A Chat with Uyi Akpata". Emerging Cricket. Besoek op 12 April 2026.
  5. ↑ (en) "Cricket Team Nicknames". Topend Sports. November 2017. Besoek op 12 April 2026.
  6. ↑ (en) "Contact us". Nigeriese Krieketfederasie. Besoek op 12 April 2026.

Eksterne skakels

[wysig | wysig bron]
Ontsluit van "https://af.wikipedia.org/w/index.php?title=Nigeriese_Krieketfederasie&oldid=2893606"