Gaan na inhoud

Nigeriese nasionale krieketspan

in Wikipedia, die vrye ensiklopedie
Nigerië
Kenteken van die Nigeriese nasionale krieketspan
BynaamYellow Greens
KonferensieNigeriese Krieketfederasie (NCF)
Personeel
KapteinSylvester Okpe
AfrigterVlag van Nigerië Uthe Clive Ogbimi (voorlopig)
Internasionale Krieketraad (IKR)
IKR-statusAssosiaatlid met T20I-status (2002)
IKR-streekAKV (Afrika)
IKR-ranglys Tans[1] Beste rang tot dusver
T20I36ste36ste (op 25 Mei 2019)
Internasionale krieket
Eerste internasionaleVlag van Nigerië Kolonie Lagos t Vlag van Goudkus (streek) Goudkus in Lagos; 25 Mei 1904
Krieketwêreldbeker-verskynings0/14
Kampioenetrofee-verskynings0/10
Twintig20-internasionale wedstryde (T20Is)
Eerste T20It Vlag van Kenia Kenia op Kyambogo-krieketovaal, Kampala; 20 Mei 2019
Laaste T20It Vlag van Rwanda Rwanda op Nigeriese Krieketfederasie-ovaal, Abuja; 14 Desember 2025
T20Is Gespeel Gewen/Verloor
Algeheel[2]9348/43 (52,74%)
(0 gelykop, 2 onbeslis)
Vanjaar[3]00/0
(0 gelykop, 0 onbeslis)
T20I-wêreldbeker-verskynings0/10
T20I-wêreldbeker-
kwalifiserings		3 (eerste in 2019)
Beste uitslag4de plek (in 2021)
T20I-klere

Die Nigeriese nasionale krieketspan (Engels: Nigeria national cricket team), met die bynaam “Yellow Greens”, is die nasionale krieketspan wat Nigerië in internasionale krieket verteenwoordig. Krieket word in Nigerië deur die Nigeriese Krieketfederasie (NCF, van Engels: Nigeria Cricket Federation) beheer. Nigerië is sedert 2002 ’n assosiaatlid van die Internasionale Krieketraad (IKR).[4] Ná die toetslande Suid-Afrika en Zimbabwe, asook die assosiaatlede Kenia, Namibië en Uganda is Nigerië saam met Tanzanië tradisioneel een van die sterker nasionale Afrikakrieketspanne.

Die eerste internasionale krieketwedstryd in die huidige Nigerië is in 1904 tussen die destydse Kolonie Lagos en die Goudkus in Lagos gespeel. Van 1982 af het Nigerië spelers beskikbaar gestel vir die gesamentlike Wes-Afrikaanse span wat egter nooit aan ’n krieketwêreldbekertoernooi deelgeneem het nie.

In April 2018 het die IKR besluit om aan al sy lede volle T20I-status toe te ken. Vervolgens word al die T20I-wedstryde wat Nigerië ná 1 Januarie 2019 teen ander IKR-lede speel as ’n volle T20I erken.[5] Nigerië is tans (April 2026) 36ste op die Twintig20-wêreldranglys.[6]

Beheerliggaam

[wysig | wysig bron]
Die hoofartikel vir hierdie afdeling is: Nigeriese Krieketfederasie.

Die Nigeriese Krieketfederasie (Engels: Nigeria Cricket Federation, NCF) het in 1957, voor Nigerië se onafhanklikwording, ontstaan met die samesmelting van die in 1932 gestigte Nigeriese Krieketvereniging (Engels: Nigeria Cricket Association, NCA) vir Europeërs en die in 1933 gestigte gelyknamige beheerliggaam vir Afrikane onder dieselfde naam wat in 1951 nog los verbonde was met aparte takke vir albei bevolkingsgroepe. Die beheerliggaam is verantwoordelik vir die reël van krieket in Nigerië.[7] In 2002 het dit ’n assosiaatlid van die Internasionale Krieketraad (IKR) geword.[4][8] In dieselfde jaar het hulle by die Afrikakrieketvereniging (Africa Cricket Association, “ACA”) aangesluit.[9] In 2006 het die beheerliggaam sy huidige naam verkry.

Die Nigeriese Krieketfederasie bestuur al die Nigerië-verteenwoordigende nasionale spanne, insluitende die mans, vroue en jeug. Hulle is ook verantwoordelik vir die bestuur en organisasie van T20I-reekse teen ander spanne, en die reël van internasionale wedstryde tuis. Daarbenewens is die NCF verantwoordelik vir inkomsteverkryging deur die verkoop van kaartjies, borgskappe en uitsaairegte, veral in verband met die Nigeriese span.

Kinders en jongmense word reeds op skool aan krieket bekend gestel en na gelang van hul belangstelling en talent begin hulle met hul afrigting. Net soos ander krieketlande beskik Nigerië oor ’n o/19-nasionale span wat aan die o/19-krieketwêreldbeker deelneem.[10]

Geskiedenis

[wysig | wysig bron]

Beginjare

[wysig | wysig bron]
Die kolfblad by die Tafawa Balewa Square in die hartjie van Lagos in 2022

Britse koloniste het krieket aan die einde van die 19de eeu na die huidige Nigerië gebring.[11] Kontakte tussen die owerhede in Lagos en hul eweknieë in Goudkus (nou Ghana) het tot ’n internasionale wedstryd by Race Course (nou Tafawa Balewa Square), Lagos, op 25 Mei 1904 gelei[12][13] wat die Goudkus met 22 lopies gewen het.[14] Daarmee het krieket die eerste moderne sportsoort in Nigerië geword waarin ’n internasionale wedstryd in dié land gespeel is.[15] Daarbenewens was dit die eerste interkoloniale krieketwedstryd in Wes-Afrika.[16]

Dié ontmoeting het ’n jaarlikse wedstryd geword en was vir die eerste drie wedstryde multi-etnies. Die vierde wedstryd in Desember 1906 is slegs deur spelers met ’n Europese herkoms beslis en die Afrikabevolking het hul eerste jaarlikse wedstryde in 1907 begin. Internasionale wedstryde is weens die Eerste Wêreldoorlog gekniehalter en eers weer in 1925 (vir Europeërs) en 1926 (vir Afrikane) hervat.[14] In die tussenoorlogse jare is krieket op ’n meer formele basis begin reël met twee aparte krieketbeheerliggame vir die Europeërs en Afrikane wat onderskeidelik in 1932 en 1933 gestig is, elkeen met die naam Nigeriese Krieketvereniging (Nigerian Cricket Association).[14][17] Eersterangse krieketspelers van Engeland het in die jaarlikse wedstryde teen die Goudkus begin verskyn,[14] en die 1939-wedstryd, die laaste voor die Tweede Wêreldoorlog, het die Goudkus met 58 lopies gewen.[18] Onder die Engelse spelers wat vir Nigerië gespeel het, was William Shirley, wat van 1928 tot 1938 in Nigerië gebly en in vyf internasionale wedstryde teen die Goudkus verskyn het, waartydens hy 350 lopies aangeteken en 21 paaltjies geneem het.[19]

Ná die oorlog is in 1947 die wedstryde vir Europeërs hervat met die wedstryde vir Afrikane wat een jaar later gevolg het.[14] Die eerste naoorlogse vyfdaagse wedstryd vir Europeërs in Lagos het onbeslis geëindig.[20] In die 1949-wedstryd het die Goudkus geseëvier.[21] Nadat die aantal Europeërs in die land begin afneem het, het meer Afrikane krieket begin speel. In 1951 is ’n gesamentlike beheerliggaam in Lagos gestig met albei bevolkingsgroepe wat aparte takke behou het en van 1956 af is die spel op ’n multi-etniese basis begin reël.[14] In 1957 het albei beheerliggame in die Nigeriese Krieketvereniging (NCA, Nigeria Cricket Association) saamgesmelt.

Ná onafhanklikwording

[wysig | wysig bron]

In die eerste jare ná Nigerië se onafhanklikwording in 1960 was daar baie belangstelling in krieket. In 1964 is die eerste wedstryde teen beide Gambië en Sierra Leone gespeel.[14][22] Dié wedstryde is tot in die laat 1970’s jaarliks beslis, toe sokker in die land meer gewild geword het. Krieket het agteruitgegaan en tydens Tanzanië se besoek in 1974 het Nigerië twee van drie die wedstryde verloor en die derde het onbeslis geëindig. In 1976 het hulle ook die driedaagse wedstryd teen die Marylebone-krieketklub (MKK) met tien paaltjies verloor. In die laat 1970’s het Nigerië ’n ekonomiese krisis beleef en minder geld was vir krieket beskikbaar. Die aantal jong mense wat in krieket belanggestel het, het gedaal en die spel is deur beide atletiek en sokker verbygesteek. Die Nigeriese krieket het deurgaans die 1970’s en 1980’s die algemene probleme in dié land soos wanbestuur, regeringsinmenging, korrupsie, onderbefondsing, gebreek aan ondersteuning vir ’n sport met ’n sterk koloniale assosiasie en konflikte tussen die verskeie etniese groepe in die gesig gestaar. Nigerië se enigste voordeel was dat hulle die meeste spelers vir die Wes-Afrikaanse span beskikbaar gestel het wat in 1976 ’n assosiaatlid van die IKR geword het.[14][23]

Wes-Afrikaanse span

[wysig | wysig bron]

Nóg Nigerië nóg Wes-Afrika was lede van die IKR en albei spanne het dus nie in aanmerking gekom vir die eerste twee krieketwêreldbekertoernooie in 1975 en 1979 nie. Die Wes-Afrikaanse span het in 1982 vir die eerste keer aan die IKR-trofee deelgeneem. Die span kon egter geen oorwinning aanteken nie, alhoewel hulle ná talle onbesliste wedstryde in die voorlaaste plek geëindig en daarmee die Krieketwêreldbeker 1983 misgeloop het. Nadat die span twee toernooie moes oorslaan en die krieketwêreldbekertoernooie in 1987 en 1992 versuim het, het hulle weer aan die IKR-trofee 1994 deelgeneem. Hulle het die eerste rondte in die laaste plek afgesluit en nie vir die Krieketwêreldbeker 1996 gekwalifiseer nie, maar hulle het die troosrondte gewen en uiteindelik in die 17de plek geëindig. Drie jaar later het die span die eerste rondte voor Argentinië in die voorlaaste plek afgesluit en daarmee nie die Krieketwêreldbeker 1999 gehaal nie. Tydens die troosrondte het hulle die 18de plek behaal.[24] Net voor die IKR-trofee 2001 het die span nie visums ontvang nie en moes vervolgens hulleself aan dié toernooi onttrek, waarmee hulle nie vir die Krieketwêreldbeker 2003 kon kwalifiseer nie. Die Kanadese amptenare het gevrees dat die spelers van Sierra Leone sou weier om na hul land terug te keer weens die burgeroorlog in dié land.[25]

Tydens die bestaan van die Wes-Afrikaanse span het Nigerië steeds op sy eie opgetree,[14] hoewel hulle by tye hulleself aan toernooie onttrek het soos tydens die Afrikakrieketverenigingkampioenskap 1998.[26][27] Vanweë sy oorheersing binne die Wes-Afrikaanse span het die Nigeriaanse krieket die moeilike jare oorleef en die beheerliggaam het in 2002 ’n assosiaatlid van die IKR geword, terwyl die ander voormalige lede van Wes-Afrika slegs geaffilieerde status ontvang het. Daarmee is die Wes-Afrikaanse Krieketkonferensie in dieselfde jaar ontbind.[14][4]

IKR-lidmaatskap

[wysig | wysig bron]

Nigerië het sy eerste verskyning tydens ’n IKR by die Afrikabeker 2002 in Zambië gemaak. Die Nigeriërs het in die vierde plek geëindig nadat hulle slegs Malawi kon klop.[28] Hulle het die Afrikakrieketverenigingkampioenskap 2004 in die vyfde plek afgesluit en slegs die laaste geplaasde Tanzanië verslaan, waarmee hulle versuim het om vir die IKR-trofee 2005 en daarmee vir die Krieketwêreldbeker 2007 te kwalifiseer.[29]

In 2006 is die Nigeriese beheerliggaam in Nigeriese Krieketfederasie (NCF, Nigeria Cricket Federation) hernoem. In Augustus dieselfde jaar het Nigerië aan afdeling twee van die Wêreldkrieketliga Afrikastreek in Tanzanië deelgeneem, ’n tweedevlaktoernooi onder die Wêreldkrieketliga en deel van die Krieketwêreldbeker 2011-kwalifisering,[30] maar in die laaste plek geëindig.[31] Daarmee is hulle aanvanklik na afdeling drie gerelegeer,[14] maar hulle het hulleself aan die 2008-toernooi onttrek.[32] Die Nigeriërs het die Noordwes-Afrikaanse Kampioenskap in 2007[33] en 2008 beklink.[34] Daarna het Nigerië afdeling twee van die Wêreldkrieketliga Afrikastreek 2008 as naaswenner afgesluit en daarmee vir die Wêreldkrieketliga 2009–14 se afdeling sewe vir die Krieketwêreldbeker 2015 gekwalifiseer. Dié toernooi het die span in die derde plek afgesluit en daarmee in die afdeling aangebly.[32]

In Mei 2011 het Nigerië afdeling sewe in Botswana as naaswenner afgesluit, nadat hulle in die eindstryd teen Koeweit vasgeval het.[35] Daarmee het die span vir afdeling ses 2011 gekwalifiseer.[36] Dit het die Nigeriërs in die vyfde plek afgesluit, nadat hulle Fidji in die uitspeelwedstryd geklop het, waarmee hulle na afdeling sewe gerelegeer is.[37] Daar het hulle regstreekse promosie na afdeling ses 2013 behaal, waar die span ook promosie na afdeling 2014 behaal het. Dit is in Maleisië aangebied en was deel van die Krieketwêreldbeker 2019-kwalifisering. Nigerië het in die wedstryd om die derde plek teen Tanzanië vasgeval en daarmee in 2016 in dié afdeling aangebly.[38] Dit het die Nigeriërs slegs in die sesde plek afgesluit, waarna hulle die Wêreldkrieketliga 2017–19 in die Afrikakwalifisering 2017 begin het.[39]

Nigerië het nie aan die T20I-wêreldbekerkwalifiserings vir die toernooie in 2007, 2009 en 2010 deelgeneem nie. In 2012 het die Nigeriërs versuim om die T20I-wêreldbekerkwalifisering te haal, waarmee hulle ook die T20I-wêreldbeker 2012 misgeloop het.[40] Nigerië het ook nie die T20I-wêreldbekerkwalifisering 2013 gehaal nie, waarmee hulle versuim het om vir die T20I-wêreldbeker 2014 te kwalifiseer. In die daaropvolgende kwalifiseringsfase het hulle nie die T20I-wêreldbekerkwalifisering 2015 vir die T20I-wêreldbeker 2016 gehaal nie. Tydens die Afrikakwalifisering 2017 vir die Krieketwêreldbeker 2023 het die span die vierde plek behaal en daarmee afdeling vyf 2017 misgeloop, waarmee hulle ook die Krieketwêreldbeker 2027-kwalifisering versuim het.

In April 2018 het die wêreldbeheerliggaam IKR aan al sy lede volle T20I-status toegeken. Vervolgens word al die T20I-wedstryde tussen Nigerië en ander IKR-lede sedert 1 Januarie 2019 as ’n volle T20I erken.[5] In Augustus 2018 is Nigerië by Krieket Suid-Afrika se T20I-Afrikabekertoernooi 2018 ingesluit.[41][42] Die noordwestelike substreek se kwalifisering is op die Tafawa Balewa Square-krieketovaal in die hartjie van Lagos beslis en die gasheer het agter Ghana as naaswenner geëindig, waarmee Nigerië die Afrikakwalifisering vir die T20I-wêreldbeker 2021 gehaal het. Daar het die span op 20 Mei 2019 in sy eerste T20I-wedstryd teen Kenia in Kampala gespeel, maar hulle is met agt paaltjies geklop.[43] Die Nigeriërs het tydens die Afrikakwalifisering die derde plek behaal en daarmee glo die T20I-wêreldbeker 2021-kwalifisering naelskraap misgeloop.[44] In Julie 2019 is egter Zimbabwe Krieket deur die IKR geskors, waarmee Zimbabwe van IKR-toernooie uitgesluit is.[45] Gevolglik is hulle tydens die T20I-wêreldbekerkwalifisering met Nigerië vervang.[46] Hulle het egter ná nederlae in al ses hul wedstryde die hooftoernooi misgeloop.[47] Voorheen het die o/19-nasionale span vir die eerste keer vir ’n krieketwêreldbekertoernooi gekwalifiseer en tydens die 2020-toernooi in Suid-Afrika sy eerste verskyning gemaak.[48]

Tydens die Afrikakwalifisering 2021 het die span die plaaslike kwalifisering gehaal, maar hulle is uitgeskakel en het daarmee die T20I-wêreldbeker 2022 misgeloop.[49] Tydens die plaaslike kwalifisering vir die T20I-wêreldbeker 2024 het Nigerië die Afrikakwalifisering gehaal, waar hulle versuim het om vir die hooftoernooi te kwalifiseer.[50] Op die Afrikaspele 2023 (beslis in Februarie 2024) in Accra, Ghana, is vir die eerste keer ’n kriekettoernooi beslis, maar Nigerië is in die groepfase uitgeskakel.[51]

In November 2024 het Nigerië die plaaslike kwalifisering vir die T20I-wêreldbeker 2026-Afrikakwalifisering aangebied. In die wedstryd teen die Ivoorkus op 24 November het Selim Salau die eerste Nigeriese kolwer geword wat ’n T20I-honderdtal aangeteken het.[52] In dieselfde wedstryd het nog rekords in dié tyd gespat, nadat Nigerië met 271 lopies sy hoogste T20I-telling aangeteken het, die teenstander met sewe lopies op die laagste T20I-telling uitgeboul en daarmee hul hoogste T20I-oorwinning aangeteken het.[53][54][55][56] Daartussen het Nigerië die eindstryd van die Kontinentbeker T20I Afrika gehaal, waar hulle egter met ses paaltjies teen Uganda vasgeval het.[57] In die T20I-wêreldbeker 2026-kwalifisering het die Nigeriërs onoorwonne die Afrikakwalifisering gehaal, waar hulle in die vierde plek geëindig en daarmee die hooftoernooi misgeloop het.[58] Nigerië sal die plaaslike kwalifisering 2026 vir die T20I-wêreldbeker 2028 huisves.[59]

Kleure

[wysig | wysig bron]

In T20I-krieket dra Nigerië groen truie met ’n geel kleuraksent, ’n groen V-halslyn en groen broeke. Veldspelers dra ’n groen bofbalpet of ’n groen sonhoed. Die kolwers se helms is ook groen geverf. Gedurende IKR-toernooie verskyn die borg se embleem op die regter mou en die belettering NIGERIA verskyn op die middel van die trui.

Die Nigeriese nasionale krieketspan se bynaam is Yellow Greens.[60] Die Nigeriese Krieketvereniging se kenteken toon ’n skild met die gestiliseerde uitbeelding van beide die Niger- en Benueriviere se rivierloop in Nigerië en die letters NCF met die belettering Nigeria Cricket Federation.

Tuisstadions

[wysig | wysig bron]
Ligging van Nigeriese krieketstadions

Nigerië beskik oor geen amptelike tuisstadion vir sy nasionale span nie. Die Nigeriese nasionale krieketspan gebruik vir hul krieketwedstryde eerder ’n verskeidenheid stadions dwarsdeur Nigerië:

No.StadionPlekEerste wedstryd
1 Nasionale Stadion Abuja 26 Januarie 2019
2 Universiteit van Lagos-krieketovaal Lagos 19 Oktober 2021
3 Tafawa Balewa Square Lagos 28 Maart 2022
4 Nigeriese Krieketfederasie-ovaal Abuja 23 November 2024

Die Tafawa Balewa Square-krieketveld in die middestad van Lagos word tradisioneel as “tuiste van krieket” in Nigerië beskou en in 2021 het dié krieketveld ’n opknapping ondergaan.[61] Die Nigeriese Krieketfederasie is by die Nasionale Stadion in Abuja gesetel.[62]

Spelers

[wysig | wysig bron]

Spelerstatistieke

[wysig | wysig bron]

Daar het altesaam 42 spelers T20I-krieket vir Nigerië gespeel. Vervolgens die spelers wat vir die Nigeriese span die meeste lopies aangeteken en die meeste paaltjies geneem het.

Lopies

[wysig | wysig bron]
T20I
Speler Tydperk T20Is Lopies
Sulaimon Runsewe 2019–hede 76 1 399
Isaac Danladi 2019–hede 59 1 224
Isaac Okpe 2019–hede 84 822
Selim Salau 2024–hede 33 793
Sesan Adedeji 2019–hede 47 772
Korrek teen: 7 Mei 2026[63]

Paaltjies

[wysig | wysig bron]
T20I
Speler Tydperk T20Is Paaltjies
Isaac Okpe 2019–hede 84 84
Sylvester Okpe 2019–hede 81 70
Peter Aho 2021–hede 62 67
Ridwan Abdulkareem 2021–hede 52 54
Prosper Useni 2021–hede 61 52
Korrek teen: 7 Mei 2026[64]

Spankapteins

[wysig | wysig bron]

Tot op hede was vier spelers reeds die kaptein vir Nigerië tydens ’n T20I-wedstryd.[65]

T20I[66]
No.NaamTydperk
1 Ademola Onikoyi 2019–2023
2 Joshua Ayannaike 2021
3 Sylvester Okpe 2021–2025
4 Sulaimon Runsewe 2025–hede

Rekords

[wysig | wysig bron]

Krieketwêreldbekerrekord

[wysig | wysig bron]
JaarUitslag
1975Nie in aanmerking nie – nie ’n IKR-lid nie
1979Nie in aanmerking nie – nie ’n IKR-lid nie
1983Nie in aanmerking nie – nie ’n IKR-lid nie
1987Nie in aanmerking nie – nie ’n IKR-lid nie
1992Nie in aanmerking nie – nie ’n IKR-lid nie
1996Nie in aanmerking nie – nie ’n IKR-lid nie
1999Nie in aanmerking nie – nie ’n IKR-lid nie
2003Nie in aanmerking nie – nie ’n IKR-lid nie
2007Nie gekwalifiseer nie
2011Nie gekwalifiseer nie
2015Nie gekwalifiseer nie
2019Nie gekwalifiseer nie
2023Nie gekwalifiseer nie
2027Nie gekwalifiseer nie
2031N.v.t.

Kampioenetrofeerekord

[wysig | wysig bron]
JaarUitslag
1998Nie in aanmerking nie – nie ’n IKR-lid nie
2000Nie in aanmerking nie – nie ’n IKR-lid nie
2002Nie in aanmerking nie – nie ’n IKR-lid nie
2004Nie gekwalifiseer nie
2006Nie gekwalifiseer nie
2009Nie gekwalifiseer nie
2013Nie gekwalifiseer nie
2017Nie gekwalifiseer nie
2025Nie gekwalifiseer nie
2029Nie gekwalifiseer nie

T20I-rekord teen ander lande

[wysig | wysig bron]
TeenstanderWedstrydeGewenVerloorGelykopOnbeslis% GewenEerste T20I-oorwinning
t. Toetslande
Vlag van Ierland Ierland101000,00–
Vlag van Zimbabwe Zimbabwe101000,00–
t. Assosiaatlede
Vlag van Botswana Botswana6510083,3321 Mei 2019
Flag of eSwatini Eswatini22000100,004 Desember 2022
Vlag van Gambië Gambië11000100,004 Desember 2022
Vlag van Ghana Ghana55000100,0022 Mei 2019
Vlag van Hongkong Hongkong101000,00–
Vlag van Ivoorkus Ivoorkus11000100,0024 November 2024
Vlag van Jersey Jersey101000,00–
Vlag van Kameroen Kameroen11000100,005 Desember 2022
Vlag van Kanada Kanada101000,00–
Vlag van Kenia Kenia153120020,0016 September 2021
Vlag van Malawi Malawi11000100,0026 September 2025
Vlag van Mosambiek Mosambiek11000100,001 Desember 2022
Vlag van Namibië Namibië3120033,3318 Maart 2014
Vlag van Oman Oman101000,00–
Vlag van Rwanda Rwanda12920166,674 Oktober 2023
Vlag van Sierra Leone Sierra Leone141310092,8520 Oktober 2021
Vlag van Sint Helena Sint Helena11000100,0023 November 2024
Vlag van Tanzanië Tanzanië5130120,0026 November 2023
Vlag van Uganda Uganda13013000,00–
Vlag van Verenigde Arabiese Emirate Verenigde Arabiese Emirate303000,00–
Vlag van Zambië Zambië33000100,004 Desember 2025
Algeheel9348430252,7421 Mei 2019
Rekords volledig tot en met T20I #3836 op 7 Mei 2026. Gelykop verwys na wedstryde wat deur ’n valbyl (soos ’n Superboulbeurt) beslis is. Wenpersentasies sluit onbesliste wedstryde uit en gelykop as ’n halwe oorwinning (ongeag die valbyl).[67]

T20I-wêreldbekerrekord

[wysig | wysig bron]
JaarUitslag
2007Nie deelgeneem nie
2009Nie deelgeneem nie
2010Nie deelgeneem nie
2012Nie gekwalifiseer nie
2014Nie gekwalifiseer nie
2016Nie gekwalifiseer nie
2021Nie gekwalifiseer nie
2022Nie gekwalifiseer nie
2024Nie gekwalifiseer nie
2026Nie gekwalifiseer nie
2028N.v.t.
2030N.v.t.

Afrikaspele

[wysig | wysig bron]
JaarUitslag
2023Groepfase

Sien ook

[wysig | wysig bron]

Verwysings

[wysig | wysig bron]
  1. ↑ (en) "ICC Rankings". Internasionale Krieketraad.
  2. ↑ (en) "T20I matches – Team records". ESPNcricinfo.
  3. ↑ (en) "T20I matches – 2026 Team records". ESPNcricinfo.
  4. 1 2 3 (en) "Nigeria". Cricket Archive. Geargiveer vanaf die oorspronklike op 7 Augustus 2019. Besoek op 7 Augustus 2019.
  5. 1 2 (en) "All T20 matches between ICC members to get international status". Internasionale Krieketraad. 26 April 2018. Geargiveer vanaf die oorspronklike op 3 Oktober 2023. Besoek op 3 Oktober 2023.
  6. ↑ (en) "Men's T20I Team Rankings". Internasionale Krieketraad. 3 April 2026. Besoek op 7 Mei 2026.
  7. ↑ (en) "About us". Nigeriese Krieketfederasie. Besoek op 7 Mei 2026.
  8. ↑ (en) "Nigeria Cricket Federation". Internasionale Krieketraad. Besoek op 7 Mei 2026.
  9. ↑ (en) "Members". Afrikakrieketvereniging. Besoek op 7 Mei 2026.
  10. ↑ (en) Martin Williamson (11 Januarie 2006). "The Under-19 World Cup". ESPNcricinfo. Besoek op 7 Mei 2026.
  11. ↑ (en) "How Nigeria's cricket team 'shocked the world'". BBC. 21 Januarie 2020. Besoek op 7 Mei 2026.
  12. ↑ (en) "Nigeria's Cricket Milestone". All Africa. Besoek op 7 Mei 2026.
  13. ↑ (en) Ijeoma Okigbo (21 April 2022). "Nigeria Invitational in Lagos points towards promising future for women's cricket in Africa". Association Internationale de la Presse Sportive. Besoek op 7 Mei 2026.
  14. 1 2 3 4 5 6 7 8 9 10 11 (en) Roy Morgan (2007). The Encyclopedia of World Cricket. SportsBooks Ltd. p. 158–159. ISBN 978-1-899807-51-2.
  15. ↑ (en) Firdose Moonda (28 Mei 2011). "Taking Africa to the next level". ESPNcricinfo. Besoek op 7 Mei 2026.
  16. ↑ (en) Rowland Bowen (1970). Cricket: a History of Its Growth and Development Throughout the World. Londen: Eyre & Spottiswoode. p. 315. ISBN 978-0-413-27860-9.
  17. ↑ (en) Rowland Bowen (1970). Cricket: a History of Its Growth and Development Throughout the World. Londen: Eyre & Spottiswoode. p. 343. ISBN 978-0-413-27860-9.
  18. ↑ (en) "Nigeria in Gold Coast, 1938/39". ESPNcricinfo. Besoek op 7 Mei 2026.
  19. ↑ (en) "William Shirley". ESPNcricinfo. Besoek op 7 Mei 2026.
  20. ↑ (en) "Scorecard of Nigeria v Gold Coast, 18 March 1947". Cricket Archive. Geargiveer vanaf die oorspronklike op 3 Maart 2016. Besoek op 3 Maart 2016.
  21. ↑ (en) "Scorecard of Nigeria v Gold Coast, 6 April 1949". Cricket Archive. Geargiveer vanaf die oorspronklike op 3 Maart 2016. Besoek op 3 Maart 2016.
  22. ↑ (en) Rowland Bowen (1970). Cricket: a History of Its Growth and Development Throughout the World. Londen: Eyre & Spottiswoode. p. 373. ISBN 978-0-413-27860-9.
  23. ↑ (en) "West Africa". Cricket Archive. Geargiveer vanaf die oorspronklike op 3 Maart 2016. Besoek op 3 Maart 2016.
  24. ↑ (en) "List of West Africa ICC Trophy Matches". Cricket Archive. Geargiveer vanaf die oorspronklike op 16 Oktober 2012. Besoek op 16 Oktober 2012.
  25. ↑ (en) Tony Munro (13 Julie 2001). "ICC Trophy: West African officials unhappy with the confusion in Canada". ESPNcricinfo. Besoek op 7 Mei 2026.
  26. ↑ (en) "African Cricket Association Championships, 1998". ESPNcricinfo. Besoek op 7 Mei 2026.
  27. ↑ (en) "Africa Cricket Association Cup Oct-98". ESPNcricinfo. Besoek op 7 Mei 2026.
  28. ↑ (en) "3rd Africa Cup 2002". Europese Krieketraad. Geargiveer vanaf die oorspronklike op 12 Junie 2012. Besoek op 12 Junie 2012.
  29. ↑ (en) "Africa Qualifying Tournaments". Europese Krieketraad. Geargiveer vanaf die oorspronklike op 24 Mei 2011. Besoek op 24 Mei 2011.
  30. ↑ (en) "ICC World Cricket League Africa Region Division Two 2006". Cricket Archive. Geargiveer vanaf die oorspronklike op 24 Julie 2008. Besoek op 24 Julie 2008.
  31. ↑ (en) "WCL Africa Division Two Points Table". Cricket Archive. Geargiveer vanaf die oorspronklike op 2 Junie 2019. Besoek op 2 Junie 2019.
  32. 1 2 (en) "2008 Africa Division Three Championship". Europese Krieketraad. Geargiveer vanaf die oorspronklike op 24 April 2008. Besoek op 24 April 2008.
  33. ↑ (en) "2007 North West Africa Championship". Europese Krieketraad. Geargiveer vanaf die oorspronklike op 12 Mei 2008. Besoek op 12 Mei 2008.
  34. ↑ (en) "North West Africa Championship". Europese Krieketraad. Geargiveer vanaf die oorspronklike op 11 April 2008. Besoek op 11 April 2008.
  35. ↑ (en) "World Cricket League Division 7, 2011". Europese Krieketraad. Geargiveer vanaf die oorspronklike op 24 Mei 2011. Besoek op 24 Mei 2011.
  36. ↑ (en) "Kuwait beat Nigeria to lift trophy". ESPNcricinfo. 8 Mei 2011. Besoek op 7 Mei 2026.
  37. ↑ (en) "Kimber helps Guernsey win final". ESPNcricinfo. 24 September 2011. Besoek op 7 Mei 2026.
  38. ↑ (en) "Jersey win WCL Division Five". ESPNcricinfo. 13 Maart 2014. Besoek op 5 April 2026.
  39. ↑ (en) Peter Della Penna (29 Mei 2016). "Jersey bowlers tie down Oman to take Division Five title". ESPNcricinfo. Besoek op 5 April 2026.
  40. ↑ (en) "Uganda take title with comprehensive win". ESPNcricinfo. 15 Julie 2011. Besoek op 7 Mei 2026.
  41. ↑ (en) "CSA launches expanded Africa T20 Cup". Cricket365. 7 Augustus 2018. Besoek op 7 Mei 2026.
  42. ↑ (en) "Ghana and Nigeria set to join Kenya, Namibia, Zimbabwe, and South African domestic sides in expanded Africa T20 Cup". Internasionale Krieketraad. Besoek op 7 Augustus 2018.
  43. ↑ (en) "Ghana and Nigeria advance to Africa finals". Internasionale Krieketraad. Besoek op 21 April 2018.
  44. ↑ (en) Denis Musali (28 Mei 2019). "Namibia and Kenya complete next step toward men's T20 World Cup". Emerging Cricket. Besoek op 7 Mei 2026.
  45. ↑ (en) "ICC board and full council concludes in London". Internasionale Krieketraad. Besoek op 18 Julie 2019.
  46. ↑ (en) "Nigeria awarded men's T20 World Cup Qualifiers entry". ESPNcricinfo. Besoek op 6 Augustus 2019.
  47. ↑ (en) Musa Musa (7 November 2019). "Curtain falls on the ICC Twenty20 world cup qualifiers in the UAE". Nigeriese Krieketfederasie. Besoek op 7 Mei 2026.
  48. ↑ (en) Tunde Eludini (23 Maart 2019). "Nigeria qualifies for first U-19 Cricket World Cup". Premium Times. Besoek op 7 Mei 2026.
  49. ↑ (en) Andrew Nixon. "The Andrew Nixon Column: 21 November". Europese Krieketraad. Geargiveer vanaf die oorspronklike op 21 November 2021. Besoek op 21 November 2021.
  50. ↑ (en) "Namibia seal their spot in 2024 T20 World Cup". ESPNcricinfo. 28 November 2023. Besoek op 7 Mei 2026.
  51. ↑ (en) Shounak Sarkar (25 Maart 2024). "Zimbabwe men win cricket gold at African Games but status kerfuffle leaves sour taste". Emerging Cricket. Besoek op 7 Mei 2026.
  52. ↑ (en) "High scores for Nigeria in T20Is". ESPNcricinfo. Besoek op 7 Mei 2026.
  53. ↑ (en) "7 all out! Ivory Coast collapse against Nigeria to record lowest men's T20I total". ESPNcricinfo. 25 November 2024. Besoek op 7 Mei 2026.
  54. ↑ (en) "Highest innings totals in T20Is". ESPNcricinfo. Besoek op 7 Mei 2026.
  55. ↑ (en) "Lowest innings totals in T20Is". ESPNcricinfo. Besoek op 7 Mei 2026.
  56. ↑ (en) "Largest margin of victory (by runs) in T20Is". ESPNcricinfo. Besoek op 7 Mei 2026.
  57. ↑ (en) "Uganda vs Nigeria Match Highlights & Results". The Times of India. 14 Desember 2024. Besoek op 7 Mei 2026.
  58. ↑ (en) "Namibia, Zimbabwe qualify for 2026 men's T20 World Cup". ESPNcricinfo. 2 Oktober 2025. Besoek op 7 Mei 2026.
  59. ↑ (en) Denis Musali (20 Januarie 2026). "The only way is up for Cricket Uganda in 2026". Kawowo Sports. Besoek op 7 Mei 2026.
  60. ↑ (en) "Cricket Team Nicknames". Topend Sports. November 2017. Besoek op 7 Mei 2026.
  61. ↑ (en) Shounak Sarkar (18 Januarie 2022). "From concrete to turf: Nigeria's TBS Oval pitches get a makeover". Emerging Cricket. Besoek op 7 Mei 2026.
  62. ↑ (en) "Contact us". Nigeriese Krieketfederasie. Besoek op 7 Mei 2026.
  63. ↑ (en) "Records / Nigeria / Twenty20 Internationals / Most Runs". ESPNcricinfo. Besoek op 7 Mei 2026.
  64. ↑ (en) "Records / Nigeria / Twenty20 Internationals / Most Wickets". ESPNcricinfo. Besoek op 7 Mei 2026.
  65. ↑ Die tydperk verwys na die ooreenstemmende krieketseisoen waarin die eerste of laaste wedstryd van die tyd as kaptein gespeel is.
  66. ↑ (en) "Records / Nigeria / Twenty20 Internationals / List of Captains". ESPNcricinfo. Besoek op 7 Mei 2026.
  67. ↑ (en) "Records / Nigeria / Twenty20 Internationals / Result summary". ESPNcricinfo. 7 Mei 2026. Besoek op 7 Mei 2026.

Bronnelys

[wysig | wysig bron]
  • (en) Roy Morgan (2007). The Encyclopedia of World Cricket. SportsBooks Ltd. ISBN 978-1-899807-51-2.
  • (en) Rowland Bowen (1970). Cricket: a History of Its Growth and Development Throughout the World. Londen: Eyre & Spottiswoode. ISBN 978-0-413-27860-9.

Eksterne skakels

[wysig | wysig bron]
Ontsluit van "https://af.wikipedia.org/w/index.php?title=Nigeriese_nasionale_krieketspan&oldid=2902188"