Nikolai Dzjoemagalijef
| Nikolai Dzjoemagalijef | ||
| Gebore | 15 November 1952, Oezinagasj, Kazachstanse SSR | |
| Land | Sowjetunie | |
| Bynaam | Metal Fang, Kolja die Mensvreter, die Almati-kanibaal, Dzjoema, Satan | |
| Misdaad | Reeksmoorde, kannibalisme | |
| Misdaadbesonderhede | ||
| Plek | Almati, Aktobe | |
| Datum(s) | 1979-'90 | |
| Slagoffers | 10+ | |
| Vonnisbesonderhede | ||
| Aangekeer | 19 Desember 1980 (1ste keer) 1991 (2de keer) | |
| Vonnis | Verpligte behandeling | |
Nikolai Espolowitsj Dzjoemagalijef (Kazachs: Николай Есполұлы Жұмағалиев; Russies: Николай Есполович Джумагалиев; gebore 15 November 1952), ook bekend as onder andere Metal Fang, is 'n Sowjetse reeksmoordenaar wat skuldig vind is aan die moord op minstens 10 mense tussen 1979 en 1990 in die Kazachstanse Sosialistiese Sowjetrepubliek (nou Kazakhstan).
Dzjoemagalijef het minstens 10 mense vermoor en geëet. Die meeste van sy slagoffers was vroue in die Almati-streek, en hy het vermoedelik nog vermoor voordat hy in hegtenis geneem is.[1] Hy is waansinnig verklaar en tot 'n geestesinrigting gevonnis, maar het in 1989 ontsnap. Hy is twee jaar later weer in hegtenis geneem en dien tans sy vonnis uit.
Agtergrond
[wysig | wysig bron]Nikolai Dzjoemagalijef is op 15 November 1952 in Oezinagasj, Kazachstanse SSR, Sowjetunie, gebore. Hy was die enigste seun van 'n Kazachstanse pa en Belarussiese ma, en die derde van vier kinders.[2]
Ná sy skoolloopbaan is hy in 1970 op 18-jarige ouderdom tot diensplig in die Sowjetweermag opgeroep. Ná sy diensplig wou hy 'n drywer word om universiteit toe te gaan, maar het nie een van dié doelwitte bereik nie. As alternatief het hy die Oeral, Siberië en Moermansk besoek. Hier het hy verskeie beroepe beproef, onder meer matroos en elektrisiën. In 1977 het hy na Oezinagasj teruggekeer en 'n brandbestryder gword. Hy het in dié jaar die seksueel oordraagbare infeksies sifilis en trigomoniase opgedoen.
Eerste moord
[wysig | wysig bron]Dzjoemagalijef het sy eerste moord versigtig beplan. In Januarie 1979 het hy 'n vrou op 'n plattelandse pad buite Oezinagasj vermoor. Haar oorskot is op 25 Januarie 1979 ontdek. 'n Misdaaddossier is aangelê, maar die moordenaar is nie aangekeer nie.
Nog moorde en eerste arres
[wysig | wysig bron]In 1979 het Dzjoemagalijef nog vyf moorde gepleeg. Op 21 Augustus het hy 'n medebrandbestryder per ongeluk doodgeskiet terwyl hy dronk was, en hy is in hegtenis geneem. Hy is met skisofrenie gediagnoseer.[2] Hy is binne 'n jaar vrygelaat en het na Oezinagasj teruggekeer. Hy het hierna nog drie moorde gepleeg.
Sy volgende moord is die een wat daartoe gelei het dat hy gevang is. Hy het 'n paar vriende en hulle vriendinne na sy huis genooi. Hy het een van hulle vermoor en sy lyk in 'n ander kamer begin opkap. Die ander gaste het dit gesien en gevlug. Die polisie is ontbied, en hulle het die kannibaal met bloed besmeer op sy knieë aangetref. Die polisie was so geskok oor wat hulle in sy huis gesien het dat Dzjoemagalijef kon ontsnap. Hy het nakend die berge ingevlug met 'n byl in sy hand. Hy is die volgende dag, op 19 Desember 1980, opgespoor en in hegtenis geneem. 'n Familielid is ook aangekeer.
Sy verhoor het binne 'n jaar begin. Omdat hy vroeër met skisofrenie gediagnoseer is, is hy weer waansinnig verklaar en gelas om behandeling in 'n spesiale sentrum te ondergaan. Hy het die volgende agt jaar hier deurgebring.
Ontsnapping
[wysig | wysig bron]Op 29 Augustus 1989, terwyl hy na 'n gewone geestesinrigting oorgeplaas is, het Dzjoemagalijef in die voertuig waarmee hy vervoer is, ontsnap. Hy het lank deur die USSR rondgedwaal en volgens sommige bronne nog moorde in Moskou en Kazachstan gepleeg.
Dzjoemagalijef is tot vlugteling verklaar. Verskeie jare lank is berig hy is in Moskou, Kirgistan en Oesbekistan gesien. Hy het twee jaar lank in die berge weggekruip, hoofsaaklik in Kirgistan, waar hy mediese plante versamel het. Dié het hy by die plaaslike bevolking vir kos geruil. Dit het al hoe moeiliker geword om weg te kruip, want hangsweeftuie en motors het na hom gesoek.
Dzjoemagalijef wou die aandag van hom aftrek en die polisie laat dink hy is in Moskou. Hy het iemand wat hy geken het, gevra om 'n brief wat hy aan 'n vriend in Bisjkek geskryf het, na Moskou te neem en dit daar te pos. Die brief eindig met die woorde: "...ek kom binnekort terug. Daar is baie mooi vroue hier. Niemand sal hulle mis as hulle wegraak nie." Sy strategie het gewerk. Verskeie publikasies het die gerug versprei dat hy in Moskou is.
Arres en lot
[wysig | wysig bron]Dzjoemagalijef het besluit om sy avonture te beëindig deur iets te steel en vir 'n klein oortreding tronk toe te gaan. Sy plan het gewerk en in April 1991 is hy in hegtenis geneem vir die steel van skape in Fergana, Oesbekistan. Hy het beweer hy is Chinees en is in 'n algemene gevangenissel geplaas. Toe hy ondervra is, het hy skuld op die diefstal beken, maar hy kon nie verduidelik hoe hy in die Sowjetunie beland het nie. 'n Versoek om bystand is na Moskou gestuur en 'n kolonel wat betrokke was in die poging om Dzjoemagalijef te vang, het van Moskou na Fergana gekom. Die "dief" is ontbloot as die kannibaal en teruggeneem na die geestesinriging in Kazachstan.
Dzjoemagalijef is tans in 'n spesiale psigiatriese inrigting in die Almati-streek, afgesluit van die gemeenskap. Hy is met doringdraad afgesper en doen herstelwerk aan klein soorte toerusting. Hy het een keer aansoek gedoen om die doodstraf te kry, maar dit is beskou as 'n agteruitgang van sy toestand.[2] Kliniekdokters en spesialiste wat met reeksmoordenaars werk, verskil sterk oor of hy vrygelaat moet word.
In September 2014 is Dzjoemagalijef aangekla en skuldig bevind aan sy 10de moord, wat hy in 1990 in Aktobe gepleeg het.[3]
In Januarie 2016 was daar op WhatsApp en Facebook gerugte dat hy dalk ontsnap het.[4][5] Dit is egter nooit bevestig nie. Die polisie het die verspreider van die vals gerug opgespoor: Dit was 'n 21-jarige vrouestudent van Dzjoemagalijef se tuisdorp. Sy is in hegtenis geneem en het skuld beken.[6]
In populêre kultuur
[wysig | wysig bron]- Die liedjie "Metal Fang" deur die Noorweegse thrash metal-groep Blood Tsunami gaan oor Dzjoemagalijef.[7]
- Dzjoemagalijef se saak word ondersoek in die Russiese dokumentêre rolprent "Satan" (2008) van die reeks Die ondersoek gelei deur ...[8]
Verwysings
[wysig | wysig bron]- ↑ "Cannibal Nikolai Dzhumagaliev 'Metal Fang escapes asylum' in Kazakhstan". news.com.au. 8 Januarie 2016. Besoek op 7 Augustus 2022.
- ↑ 2,0 2,1 2,2 "Nikolai Espolovich Dzhumagaliev" (in Russies). serial-killers.ru. Geargiveer vanaf die oorspronklike op 23 April 2012. Besoek op 29 Maart 2010.
- ↑ "Людоед Джумагалиев оказался виновен еще в одном убийстве". Мой Город (in Russies). Besoek op 15 Junie 2025.
- ↑ tengrinews.kz (6 Januarie 2016). "Информация о побеге людоеда из психдиспансера в Алматинской области оказалась ложной: 06 января 2016, 15:11 - новости на Tengrinews.kz". Главные новости Казахстана - Tengrinews.kz (in Russies). Besoek op 15 Junie 2025.
- ↑ tengrinews.kz (6 Januarie 2016). "Если бы людоед Джумагалиев сбежал, мы бы тут так не стояли - врачи психбольницы в Алматинской области: 06 января 2016, 20:30 - новости на Tengrinews.kz". Главные новости Казахстана - Tengrinews.kz (in Russies). Besoek op 15 Junie 2025.
- ↑ "A rumor about the escape of the cannibal Dzhumagaliev was spread by a 21-year-old resident of Almaty region" (in Russian). Tengrinews.kz. 8 Januarie 2016. Besoek op 8 Januarie 2016.
{{cite web}}: AS1-onderhoud: onerkende taal (link) - ↑ "Blood Tsunami – Metal Fang (Official Video)". YouTube. 5 Julie 2017.
- ↑ "Следствие вели… / 2008-2009 / «Сатана»". ntv.ru (in Russies). Besoek op 29 April 2025.
Nog leesstof
[wysig | wysig bron]- Yuri Antonyan, Vereshchagin V.A., Potapov S.A. , Shostakovich B.V.: Serial sexual murder. Tutorial / red. Yu. M. Antonyan. - M .: MUI Ministry of Internal Affairs of Russia, Publishing House "Shield-M", 1997. - 202 p. Geargiveer op 13 Februarie 2017.
- Yuri Antonyan, Violent crime in Russia / Red. L.L. Ananian; INION RAS, 2001. - 104 p. - (Ware verhale oor die bevegting van misdade in Rusland en oorsee).
Skakels
[wysig | wysig bron]- Николай Джумагалиев. People's History (in Russies). 13 Oktober 2004.
- "The cannibal Dzhumagaliev was found guilty of another murder"
Hierdie artikel is in sy geheel of gedeeltelik uit die Engelse Wikipedia vertaal.
