Nkandlawoud
Die Nkandlabos, een van die mooiste en grootste oorblywende natuurlike bosse in die land, is ‘n natuurreservaat in KwaZulu-Natal. Dit is intiem verweef met die geskiedenis van die Zoeloevolk.
Ligging
[wysig | wysig bron]Hierdie woud van 1 600 ha lê op die suidegrens van die historiese Zoeloeland. Dit is 20 km suid van Nkandla, 56 km noordwes van Eshowe en 68 km van Melmoth, op ‘n hoogte tussen 1 100 en 1 300 m bo seespieël en bestaan uit geweldige steil berghellings, ontoeganklike klowe, watervalle en verskuilde grotte. Die Mhlatuze-, Nsuze- en Tugelariviere vloei daardeur.
Fauna en flora
[wysig | wysig bron]Hierdie gebied is bekend om sy biodiversiteit. Dit is ‘n besondere ekosisteem bestaande uit ‘n klam reënwoud wat aanhoudende digte mis ervaar. Daar is ‘n ruie digte plantegroei met baie ou bome behang met bobbejaantoue. Skaars plante kom hier voor. Uniek is die bedreigde vlinders: Karkloof-blouvlinder (Orachrysops ariadne), Papilio ophidicephalus zuluenisis en die Charaxes druceanus druceanus. 147 Voëlspesies is reeds hier aangeteken. Uile sweef bo die hoë bome. Ander besondere voëls wat gesien kan word, is die Knysnaloerie, bosloerie, groenhoutkapper, withalsbosduif, bromvoël, suidelike swie en die mooimeisie. Luiperds, bosbokke, ape en mambas is volop. Na bewering loop hier ‘n trop wilde perde rond. Om die bos goed te kan besigtig, moet liefs van ‘n plaaslike gids gebruik gemaak word. Dit vorm deel van die historiese slagveldroete van KwaZulu-Natal.
Geskiedenis
[wysig | wysig bron]Die bos is van groot kulturele belang vir die Zoeloenasie. Dit word beskou as ‘n heilige plek en is die oorsprong van verskeie legendes. ‘n Populêre geloof is dat die geeste van gestorwe opperhoofde hier woon. Cetshwayo het in die laat 1880’s hier geskuil by Sigananda, die hoof van die Cube-stam, in ‘n afgeleë kraal aan die voet van ‘n waterval in die Mhomekloof. Cetshwayo is ook kort daarna in die nabyheid begrawe. Die Bambata-rebellie het ook hier sy ontstaan gehad. Tydens die Zoeloe-rebellie in 1906 was die bos die toneel van hewige gevegte.
Bibliografie
[wysig | wysig bron]- Bulpin, T.V.: Natal and the Zulu Country. Kaapstad: Books of Africa, 1966
- https://www.dailymaverick.co.za/article/2025-02-23-zululand-forests-green-jewels-in-jeopardy/
- https://gobirding.birdlife.org.za/southern-zululand-melmoth-nakandla-forest/
- https://nikrs.dst.gov.za/communities/explore/promo/10
- https://sa-venues.com/game-reserves/nkandla-forest.php