Nonnas

Nonnas
Regisseur	Stephen Chbosky
Vervaardiger	Gigi Pritzker Rachel Shane Jack Turner
Draaiboek	Liz Maccie
Met	Vince Vaughn Lorraine Bracco Talia Shire Brenda Vaccaro Joe Manganiello Linda Cardellini Susan Sarandon
Musiek deur	Marcelo Zarvos
Kinematografie	Florian Ballhaus
Ateljee	Fifth Season 1Community Madison Wells Matador Content
Verspreider	Netflix
Uitgereik	9 Mei 2025 (2025-05-09)
Speeltyd	114 minute
Land	VSA
Taal	Engels
IMDb-profiel

Nonnas is 'n Amerikaanse biografiese komedie-drama van 2025 vir televisie. Dit is geskryf deur Liz Maccie en geregisseer deur Stephen Chbosky. Die hoofakteurs is Vince Vaughn, Susan Sarandon, Lorraine Bracco, Talia Shire, Brenda Vaccaro en Linda Cardellini.

Die rolprent is geskoei op die lewe van Joe Scaravella, die eienaar van die restaurant Enoteca Maria op Staten Island, wat die gevaar loop om alles te verloor om sy ma, wat kort tevore oorlede is, te vereer deur 'n Italiaanse restaurant te open met werklike oumas as sjefs. Dit is op 9 Mei 2025 op Netflix uitgereik en die resensies was meestal positief. Die première was op die moedersdagnaweek in die VSA en was die topfliek daar.

Storielyn

---

Bederwingswaarskuwing: Die storielyn en/of storie se einde volg hieronder.

---

Vince Vaughn

Susan Sarandon

Lorraine Bracco

Linda Cardellini

Terwyl hy treur oor die afsterwe van sy ma, dink Joe Scaravella terug aan sy kinderjare in die 1980’s in Brooklyn, toe sy ma en ouma (Italiaans: nonna) in die kombuis vir vriende en familie gekook het. Hy onthou wat hulle hom geleer het en herskep al die geregte wat hulle gemaak het, hoewel hy nie sy ouma se Sondagsous presies kan regkry nie.

Joe se beste vriend, Bruno, en dié se vrou, Stella, spreek tydens 'n ete hulle kommer oor hom uit en moedig hom aan om sy ma se lewensversekeringsgeld te gebruik om iets goeds vir homself te doen. Joe besoek ’n opelugmark op Staten Island, waarheen hy gereeld saam met sy ma en ouma gegaan het. Daar loop hy Olivia, sy hoërskoolliefde, raak asook Antonella, haar ouer buurvrou saam met wie sy inkopies doen. Nadat hy die mark gesien het, besluit hy hy wil ’n restaurant open en dit Enoteca Maria noem, na sy ma. Hy besluit ook die sleutelkenmerk moet wees dat die kombuis beman word deur nonnas, sodat die kookkuns almal aan hulle kinderjare herinner.

Ondanks weerstand van die plaaslike gemeenskap gaan Joe voort met sy plan. Hy roep Bruno se hulp as kontrakteur in en omskep die ruimte in 'n klassieke Italiaanse restaurant. Intussen huur hy Antonella; sy ma se beste vriendin, Roberta; haar voormalige haarkapster, Gia; en 'n kandidaat wat aansoek doen, Teresa. Die nonnas bots aanvanklik omdat hulle uit effens verskillende agtergronde kom, maar nadat Gia hulle na 'n privaat bederfsessie by haar salon genooi het, bou die vroue ’n hegte band en raak bevriend.

Terwyl die nonnas die spyskaart ontwikkel, maak hulle capuzzelle, wat ’n brand in die kombuis veroorsaak net voor die inspekteur opdaag. Die inspekteur keur die restaurant af weens die brandskade en sê vir Joe dit kan ’n jaar neem voordat hy weer ’n inspeksie kan reël. Dit lei tot ’n argument tussen Joe en Bruno, wat eindig met Joe wat Bruno uit die restaurant skop.

Joe gaan later verskoning vra en ontdek Bruno het sy eie koste gedek deur sy geliefde motor, wat hy by sy pa geërf het, te verkoop. Aangeraak deur sy vriend se gebaar, raak Joe en Bruno versoen. Olivia, ’n prokureur, spoor die inspekteur op en ontdek hy het ’n geskiedenis van onetiese praktyke, en sy dwing hom om onmiddellik nog ’n inspeksie te doen. Die restaurant slaag en hulle begin voorberei om te open.

Op die openingsaand tref ’n groot donderstorm die gebied en niemand kom na die restaurant behalwe Bruno en Stella nie. Antonella ontdek later een van die hoofverkopers op die mark het sleg van die restaurant gepraat en dat dit bygedra het tot die swak besigheid. Joe probeer sake aanwakker deur die kosresensent Edward Durant te nooi om 'n resensie oor die restaurant te skryf, maar hy weier omdat hy net restaurante in Manhattan dek.

Ná weke sonder besigheid besluit Joe huiwerig hy sal die restaurant moet sluit. Hy hou 'n laaste ete in die restaurant en maak ’n groot indruk op al die gaste. Hy besluit uiteindelik om die koevert oop te maak wat sy ma vir hom nagelaat het, iets wat hy sedert haar afsterwe vermy het. Binne-in vind hy die resepte vir al haar en sy ouma se geregte, insluitend die Sondagsous. Joe keer terug na sy ou lewe. ’n Paar dae later besoek Bruno hom met ’n koerantartikel oor die restaurant, geskryf deur 'n resensent wat die laaste ete anoniem bygewoon het in opdrag van Durant. Sy skryf ’n pragtige resensie, wat lei tot ’n oplewing in sake. Die restaurant word ’n sukses, wat Joe in staat stel om Bruno se motor terug te koop.

Aan die eide van die prent word beelde van die werklike Enoteca Maria gewys, met vermelding dat die restaurant al 15 jaar oop is en nou beman word deur nonnas van oor die hele wêreld.

Rolverdeling

• Vince Vaughn as Joe Scaravella
• Susan Sarandon as Gia, Joe se ma se haarkapster
• Lorraine Bracco as Roberta, Joe se ma se beste vriendin
• Talia Shire as Teresa, 'n aansoeker vir die werk as sjef
• Linda Cardellini as Olivia, Joe se skoolliefde
• Brenda Vaccaro as Antonella, Olivia se buurvrou
• Joe Manganiello as Bruno, Joe se beste vriend
• Drea de Matteo as Stella, Bruno se vrou

Ontvangs

Op Rotten Tomatoes het die rolprent 'n goedkeuringsyfer van 80% gekry, gebaseer op 51 resensies. Op Metacritic het dit 'n punt van 57 uit 100 gekry, gebaseer op 14 resensies, wat dui op 'n "gemengde of middelmatige" reaksie.

In 'n grootliks positiewe resensie het The Guardian die fliek drie uit vyf sterre gegee en die opregtheid daarvan geprys. RogerEbert.com het dit drie uit vier sterre gegee en gesê: "Dit is nie 'n prestigeryke prent nie; dit is die soort storie wat ons daaraan herinner dat ons geheel kan word deur verbindings met die verlede en met mekaar."

Skakels

• Nonnas in die Internet-rolprentdatabasis

• Nonnas op Netflix

• Hierdie artikel is in sy geheel of gedeeltelik uit die Engelse Wikipedia vertaal.