Onwettige huwelik
Onwettige Huwelik is 'n 92 minuut lange Afrikaanse drama wat in 1970 vrygestel is.[1] Die film is deur Mario Schiess geregisseer met 'n draaiboek - gebaseer op 'n Duitse verhaal - deur Werner Grünbauer en Sigi Grünbauer, vervaardig deur Protea Films (Werner Grünbauer) en versprei deur Ster Films /Flip Bezuidenhout Produksies.[1]
Sinopsis
[wysig | wysig bron]Die rolprent vertel die verhaal van 'n musiekprofessor (Pieter Geldenhuys) wat sukkel om sy vrou (Eunone van den Bergh) en agt kinders met sy inkomste te onderhou. Wanneer sy welgestelde suster sterf, is daar sprake van 'n erflating. Die suster is egter in haar jeug deur haar broer verwerp weens haar buite-egtelike kind. In haar testament bepaal sy nou dat haar broer, of iemand in sy onmiddellike familie, 'n buite-egtelike kind moet hê voordat die erfporsie aan hom toegeken sal word. Na talle intriges en komiese gebeure ontdek die professor dat hy self die vader van agt buite-egtelike kinders is, want sy huwelik blyk onwettig te wees – dit het bloot plaasgevind sonder om aan die vereistes vir huweliksvoltrekkings te voldoen. En siedaar, die erfporsie is syne.[1]
Rolverdeling
[wysig | wysig bron]Die rolverdeling is Pieter Geldenhuys (as die Professor), Laurika Behrens (as Atlanta), Marius Weyers (as Herbert), Hannes Horne (as professor Markus), June Neethling (as Madame de la Rocco), Eunone vd Bergh, Gabriel Bayman, Hilde Kohl, Pieter Bornman, Johan du Plooy, Miempie de Kock, Willem Vermaas, Cisca Marais, Margaret Schiess, Sonja Soekoe, Petru Dercksen, Franziska du Toit, Karen Dercksen, Johan van Graan, Gerrie Minnaar, Jan Eghard van der Hoven, Dennis Maraba.[1]
Verwysings
[wysig | wysig bron]- 1 2 3 4 Steyn, Christa. Die argivering van die Afrikaanse film (1916 – 2014). MA-verhandeling: Universiteit van die Vrystaat.