Orpenruskamp

'n Ouer foto van 'n lowergroen Orpenkamp. Die vulstasie (middel) en amptelike toegangshek het ongeveer 600 m suid van die kamp self verskuif.

Orpen is een van die kleiner en rustiger kampe, geleë direk op die westelike grens van die Krugerwildtuin. Dit word van buite bereik met 'n goeie teerpad vanaf Acornhoek, 40 km weswaarts.

Naamoorsprong

Orpen is vernoem ter ere van 'n groot Kruger-weldoener, Eileen Orpen, die vrou van Nasionale Parke-raadslid JH Orpen, wat sewe privaat plase in die gebied gekoop het, altesaam meer as 24 000 hektaar en dit toe aan die Parkeraad geskenk het.

Orpen bestaan uit vyftien luukse eenhede met 2 beddens elk, wat beskik oor lugreëling en volle kook- en toiletgeriewe, asook enkele groot gastehuise. Daar is geen aansitrestaurant nie, maar wel 'n goed bevoorrade kampwinkel wat ook wegneemetes en koffie/tee op sy stoep bedien. Verder is daar die gerieflike ontvangskantoor van SANParke, asook 'n vulstasie 600 m suid by die park se amptelike toegangshek.

Digby die kamp, op die oewer van die Timbavatirivier, lê twee nabygeleë satellietkampe. Orpen se kampkantoor beheer hierdie satellietkampies, Maroela (vir 20 woonwaens of tente) en Tamboti (permanent gemeubileerde seiltente; 30 met gemeenskaplike kook- en ablusiegeriewe en 10 met eie luukse geriewe). Oornaggaste moet by Orpen aanmeld voor hul aankoms by hierdie twee boskampies.

Gesondheidsrisiko

Die tropiese siekte malaria kom in die laeveld voor, en besoekers moet die nodige voorsorg daarteen tref. 'n Dokter, apteker of reisburo kan vooraf geraadpleeg word.