Panneveld
.jpg)
Die Panneveld (soms Panveld) op die Hoëveld in Mpumalanga is Suid-Afrika se eie “meredistrik”.
Ligging
[wysig | wysig bron]Ongeveer ‘n 40 panne en meertjies lê by nagenoeg 26° 30′ suid, 30° 15′ oos in ‘n driehoek gevorm deur die dorpe Ermelo, Lothair en Chrissiesmeer (dorp).
Meertjies
[wysig | wysig bron]Chrissiesmeer, Banaghermeer, Eilandsmeer en Magdalenasmeer is die bekendste van hierdie vleie. Eersgenoemde twee is selde sonder water. Vergeleke met die direkte omgewing kry die gebied ‘n redelik hoë reënval. In sommige van die panne is die water vars of amper vars. Ander het bloot brak water. Besonders is egter dat ‘n varswaterpan en ‘n brakwaterpan met elk sy eie besondere plantegroei binne ‘n 100 meter van mekaar voorkom.
Oorsprong
[wysig | wysig bron]Waarskynlik is hulle deur die afsny van die vroeëre bolope van die Umpilosirivier deur die Vaalrivier gevorm, met latere opeenhoping van sand in die rivierlope.
Geskiedenis
[wysig | wysig bron]In die 1860’s het die regering van die ZAR aan ‘n groep Skotse immigrante hier plase toegeken om as buffer te dien tussen die bewoners van Ermelo en die inwoners van eSwatini. Die gebied het toe as New Scotland bekend geraak met plek- en plaasname soos Lothair, Glentyan, Knockdhu en Caledonia. Banagher was ‘n plaaslike leier onder die Skotte.
Bibliografie
[wysig | wysig bron]- Raper, P.E.: Streekname in Suid-Afrika en Suidwes. Naamkundereeks, nr. 1. Kaapstad: Tafelberg, 1972. ISBN 0-624-00182-2